Eirawngbawlna Gas a harsatna nei te tana complaint dan

 Consumer te I harh ang u XLIV 

Tunah chuan mihring nunphungin hma a sawn zel a, eirawngbawlna atan Liquid Petroleum Gas(LPG) chu khawpui leh thingtlang thlengin kan rinrawl ber a ni ta a. Tunah pawh Indian Oil Corporation(IOC) lam duhdanin Mizoram hmun tam takah chuan Home Deliver hmangin rirawngbawlna Gas hi sem a ni ta a, a lawmawm hle. Hetiang a Home Deliver a Gas sem hi mipui lamah awlsam leh thil tha tak anih laiin sawi neuh neuh a awm thin a, point delivery ai khan a leak a tam, a leak a awmin a buaithlak etc tih ang reng sawi neuh neuh a tam hle mai a. Hei hi mipui ten dan kan hriatchian tawk loh vang a ni a, point delivery a nih laia kan duhtui ang tho khan Home Deliver ah hian kan duhtui a ngai a, kan duh ang nilo a delivery agent ten Gas min pe anih chuan thuneitute hnenah kan complaint vat a tul a ni.

         Gas semtu ten a leak min pe emaw, Gas bur phai lutuk min pe emaw, tui awm min pe emaw anih chuan a complaint na awlsam ber chu mahni agency te hnenah a ni a, Gas connection kan neihna agency hnai berah khan a rang thei ang bera complaint thin tur a ni. Tin, hemi bakah hian IOC lama complaint ngei ngei tur a ni a, hei hi thuneitu lam ten an ngai pawimawh em em a ni. Tunah hian IOC lama complaint dan hrang hrang te kan tarlang dawn a ni –

 

Call 1906

Hei hi Indane Gas Emergency Helpline no a ni a, he mi no call hian saptawng emaw hindi in emaw kan harsatna te chiang taka sawi tur a ni a. An nin distributor ah kan chungchang hrilhin a tul angin agent ten hma an rawn la dawn a ni. LPG Agent te hian hemi no kaltlanga kan complaint hi an ngai pawimawh hle a ni.

 

Customer Service no 1800-2333-555

Hemi no hi India ram puma Indane Customer Service Complaint number a ni a, harsatna nei te tan he customer care no ah hian zing dar 8 atanga zan dar 8 inkarah biak pawh theih a ni a, service agent ten kan harsatna te min lo dawng sawng dawn a ni.

 

Online Complaint

IOC website www.cx.indianoil.in ah lutin complaint hi a register theih bawk. Hemi bakah hian https://spandan.indianoil.co.in/DBTLGrievance/ ah lutin complaint hi a siam theih bawk a ni. Heng site atang te hian kan complaint a hma an lak dan te pawh a en let theih vek a ni.

 

Whatsapp complaint

Whatsapp kaltlanga Gas book na no 75888 88824 ah hian whatsapp msg kaltlangin a complaint theih bawk a. Whatsapp hi Gas Book nan mi tam takin kan hmang a, a awlsamin a tha hle mai a. Awlsam taka Whatsapp kaltlanga Gas a book theih rual hian awlsam takin Gas leak hi whatsapp kaltlang hian a complaint theih a ni. Hemi kaltlanga complaint hi IOC hotute hnenah a thlen nghal thin avangin an ngai serious hle a ni. 

A complaint dan hetiang hi a ni : Gas book na no i save kha whatsapp atangin Gas i book dawna i tihdan ang chiah khan han hawng la, option pathum a lo awm ang a, Book LPG Refill, Make Payment, Cylinder Leakage tih te a lo awm ang a, khang option zinga a hnuai ber, Cylinder Leakage tih kha click mai tur a ni. Tichuan kan cylinder leak complaint kha IOC hotute hnenah a thleng nghal dawn a ni. Cylinder leak complaint hi thil serious tak anih avangin duh hun hunah tih mai tur a ni lova, Gas semtuten Gas an rawn sem tirhah a leak min pek an tum emaw, min pek luih chuan complaint vat thung tur a ni.

 

Mobile apps

Indianoil One Mobile Apps hi online a Gas book thin te tan chuan a tangkaiin a tha hle a. He Mobile apps hi Android leh iOS atangin a thlawna download theih a ni. He Mobile apps hi Gas book thin te tan chuan a a tangkai hle a, whasapp a book te, missed call hmanga book te ai mahin a tha in a awlsam zawk a ni. He Mobile apps atang hian Gas kan book dan a enlet theih a, mahniin KYC a tih theih bakah address a siam that theih a, subsidy chungchang te pawh a check theih a, a tangkai hle a ni.

Gas chungchanga harsatna kan neihin he Mobile Apps atang hian a complaint theih a, apps ah lutin Home screen a Customer Support Option atang khan a complaint theih bawk.

- Laldinpuia

Secretary, Serchhip District Consumer Association