Thihna hnehin a tho leh ta!

[Easter Sunday kan la ti zel dawn em?]

            Isua thawhlehna ni champha kan lo thleng leh ta, he ni hi Kristian te chuan Lal Isua kan tan Kros a thi a athawhlehna champha anih avangin khawvel hmun hrang hrangah kan serh a, urhsun takin kan lawm thin. Lal Isua chu Kros lera a thih hnu khan a tuk thum tukah ropui taka kaihthawhin a awm a, chu chuan thihna hnehtu anih zia pawh chiang takin a tarlang a ni. Vawiin hi thawhlehna ni anih avangin mi zawng zawng ten hlim taka kan hman hun a ni a, kan rilru hahna thin zawng zawng te, sual vanga kan rum a kan tahna thin zawng zawng te kha Lal Isuan thihna hmangin a hneh ta a amah kan rin phawt chuan awlsam takin chatuan nunna kan nei thei ani tih chiang takin he thawhlehna hian min hrilh a ni. Chuvang chuan vawiin hi ni danglam leh chhinchhiah tlak tak, Kristian te tan chuan Lal Isua thisena kan sual zawng zawng tlenfai anihna anih avangin a pawimawh em em a ni.

Hetih lai hian Easter Sunday kan hman thin hi a lo chhuah dan tlem han tarlang ila : Easter tih hi khaw thlang lam European ho chinchhuah a ni a. Easter tih hi ramhuai be ho  chhinchhiahna chikhat Eastre(or Eostre) tih atanga lokal a ni a. Northern Europe a Saxon hnam hoten Pathiannu anga an biak a ni a. Intihhlimna chikhat 'Eastre' tih chu Spring Equinox laiin he Pathiannu chawimawi nan hian an hmang thin a. (Spring Equinox chu ni ina kan awmna lei lai tak a tan tlang hun, chhun leh zan inchen hunlai vel hi a ni a. Kum khatah vawi 2 a thleng thin a March 20 leh September 22 bawr velah a awm thin). Pathiannu Eastre chhinchhiahna chu Sazupui a ni a, chu chu fanau malsawmna thlentu chhinchhiahna niin an ngai bawk.

            Easter Sunday hi kumtin a danglam thin a, Equinox (ni ina kan awmna lei equator zawn lai tak a paltlang hun) a thleng hnu a thla bial hun hmasa ber zawha Pathianni hmasa berah hman thin a ni a. March 20 atanga April 25 inkarah hman a ni tlangpui. Kum 2014 ah chuan Easter Sunday hi April 20 ah hman a ni ang. He Easter hman hun hi Bible thu nena a inlaichinna em em a awm lova, mahse he ni hi ringlo mite Pathiannu chawimawina ni anih avangin Roman Catholic Kohhran te chuan ringlo mite hman chhan anga hman mai hi duh lovin Kristian te tana pawm nuam turin Equinox leh thla bial hun hi a hman hun atan an phuah rem ta a ni.

            Kristian te rin danah chuan Easter Sunday hi Isua Krista thihna hnena a thawhlehna hun champha atan kan hmang ve thung a. Kristian tena ni pawimawh kan neih upa ber leh Kohhran ni pawimawh ber a ni. Hetianga a lo chhuahna tak hi ramhuai Pathiannu hming chawia lo chhuak anih avang hian Kohhran tam tak chuan Easter Sunday hi lamri duh lovin a aiah 'Resurrection Day' (Thawhlehna ni) tiin an lam a, an chhinchhiah bawk thin. Mizo Kristian te pawh hian hrechiang mang hlei lo hian Easter Sunday hi kan ti veleh ringawt thin a, Easter tih hming lam rikloh te pawh hi kan inzirtir ve a tul mai thei e.

            Engpawh nise vawiin hi Lal Isua kan tana thi a a thawh lehna ni champha a ni a, chuvang chuan ringtu zawng zawng te chuan vawiin hi hlim taka kan hman a tul hle a ni. Thihna hnehna ni, nun thar kan neihna hun a ni. Chuvang chuan Pathian faka zaia amah chawimawi a a thawhlehna puanchhuah hi ringtuten kan tih tur a ni. W.E. Sangster-a chu a thih dawn hnaih, a tawng theihloh hnua Isua thawhlehnani an hman naah chuan tihian a fanu hnenah a ziak a,”Isua Thawhlehnani zinga thawh a, ‘a tho leh ta’ ti tur awrawl ka neilo hi a hreawm hle a ni,’ tiin. Mahse chu ai chuan awrawl nei si a a thawhleh thu puang duhlotu nih hi a hreawm zawk ngei ang le. Lal Isua chu thihna hnehin a tho leh ta, tiin I puangchhuak theuh ang u.

-          PC Laldinpuia