I tawngtai em?

Hmanni lawkah Cyclone Mahasen in kan ram a nuai dawn ni a kan hriat avangin kan mangang em em a, tihtak zetin Pathian kan au a. Vanneihthlak takin Cyclone chuan kan ram min hel hlauh mai a, kha kha Pathian hnathawh a niin i hria em? Nge a ve tur rengah i ngai zawk? Tun thlenga nunna i la neih avang hian Pathian hnenah lawmthu sawiin i tawngtai tawh em?

Saikhumphai bawk hal a ni a, nunau leh pawisawilo tam takin an tuar a, chutih lai chuan tanpuina pek chungchangah pawh harsatna a thleng a. Hetih hian hian Saikhumphai mipui tan hian vawi khat tal i tawngtai tawh em? Nge zirlai pawl leh YMA lamtang inhnialnaah a pawr pawlah i tang ve thin zawk?

CYMA ten Phunchawng leh Rangvamuala hnamdang awmho an umchhuak mek a, heng hnamdang baihvai ho tan hian i tawngtai tawh em? Nge misual an ni a, an duh dan danin awm rawh se, an chungah engpawh thleng rawh se, tiin i enliam mai mai zawk?

Laipuitlangah chhiatna nasa tak a thleng a, kha thil thlengah khan chhiatna tawkte tan khan i tawngtai tawh em? Nge kha thilthleng kha sawrkar inthlahdah vang ani tiin tanpuina pawh thawk hmanlo lekin mawhpuh tur i zawng?

Kan ramah sualnain bu a khuar, kan ram kan hnam a damlo i ti a, kan ram leh hnam dam nan hian vawi engzatnge i tawngtai tawh a, engtiang takin nge Pathian i lo kar ve tawh?

He thu ziak i chhiar avang ringawt hian khawvela mihring tluklehdingawn 6 (Facebook account nei velo) te ngaituahla, he khawvela ziak leh chhiar thiamlo mi tluklehdingawn 2 te aiin i vannei tih hria a, Pathian hnenah lawmthu sawiin tawngtai ringawt mai teh!!!