CYCLONE MAHASEN LEH KEI (Pathianin Mizoram hi min van hmangaih em!!)

May 16, 2013 Nilaithawhtan ni kha i la hria em? Mahni eizawnna  pawh buaipui hleithei lova nunna humhim duha hmun him lam kan pan tak dawr dawr kha! Cyclone Mahasen vang vek. Internet atangin a chhut thiam leh enthiam zawng zawngin an en a, an hmuh chhuah chu a inang vek. Cyclone Mahasen hian Mizoram a tuam ngei dawn tih chu hmuhchhuah inang tlang vek a ni. Kan ram leilung kan en a, kan insak dan kan en a, kan lung a awi thei lova kan thla a ngam theilo. Kan banbul kan ring tawh lova, kan Bank account in min hnem lova, kan concrete building lah chu a len leh a chhawng a san poh kan kan hlauhna a nasa a ni mai si a. Bei a va dawng tak em! Upa lam leh thil kalhmang hre deuh ten a hlauhawm lohve tiin min hnem an tum a, 'Cyclone te chu kumtin kan tuar alawm, chuti tehchiam a hlauh tur a ni lo' kan ti a, mahse a sawitu te ngei ngei pawh kan tang huai lo hle. Kan thla a ngam biklo, a chhan chu TV ah an puang a, scientist ten Cyclone kal kawng an rinlawk ang zawng zawng pawh tunlai thiamna hmangin kan mit ngeiin kan hmu thei vek a, inrinloh laia tuar ang ngawt kha a ni lova, kan hre lawk a, kan hmu lawk vek. Chuvang chuan kan hlau a kan ngaih a ngam theilo a ni.

A hma zawng khan kan sawilawk tawh a, engahmah ka ngailo. Ka hlau lo, a chhan chu hlauh khan awmzia awmin ka hrelo tlat a ni. Lo inrinlawk ngaihna pawh ka hrelo. Pathianin tul a tih chuan kan chenna in hi a tichhe vek ang a, tul a tilo anih chuan min zuah mai ang, ka ti a. Engmah dang tih ka tum lo. Dan pangngaiin May 16 ah pawh chuan ka hnathawhnaah ka kal a, ka bul vela mi zawng zawng te chuan zan dar 10 vela Cyclone lo thleng tur chanchin hlir chu an sawi a, mahse ka bengkhawn duhlo. Ka hlau lova, ka tan hlauhvin awmzia a awmlo ka tih tawh kha. A sawi apiang chu a hlauhawm loh zia leh inven ngaihna vak a awmloh zia ka sawipui zel a.

Chhun lamah ruah a tla nileng deuhthaw a, mahse chawhnu lamah chuan vanneih thlak takin a han leh ta deuh. Khua a eng leh ta hle a, ngaih a titha sawt mai. Cyclone chuan min hel dawn a nih hi te ka ti rilru mai mai a. Thlamuang takin dawrah ka thu a, facebook vel ka khawih kual mai mai a. Dar 3:30 a ri a, boruak a rawn inthlak ta thut mai. A hmaa khaw eng uarh thin kha a rawn thim tan ta mup mup mai. Bazar vela dawr zawng zawng hmanhmawh bak lengin an inkhar ri rum rum a, nunau an inaukhawm chuah chuah bawk a, "Chhehei, Cyclone an hlau ani chiang mai' ka ti rilru a. Ka awm a nuam lo tan. Bazar tual velah ka va kalchhuak a, dawr inhawng a awmlo. Traffic duty an awm lo, motor veivak a tlem a a reh thuap mai. Chu chuan ka awm a tinuam ta chiah lova, a hma zawnga Cyclone engahmah ngailo khan ka hlau ta tlat mai. Ka thauah min man a, ka tiril ah ka zam ru ta tlat mai, a va zialo em. Kei chuan ka hlau lo, mahse mi zawng zawngin an hlau hian min ti hlau ta tlat a ni!

Chhun lamah khan chanchinthar ka ngaihven reng a, Cyclone Mahasen chuan sawi lawk ang ngeiin Bay of Bengal atangin khawmual lam a rawn pan zel a, a kawng rawn zawh zelin Bangladesh a tuam mek a, mi 1 a thi tawh...etc tih te chu chanchin thar ka hriat te an ni. Mithiam ten an sawilawk ang ngeiin a thleng dik tlat mai, Mizoram a rawn tuam ngei dawn si a ka ti rilru a, engtin tak lo tuar ve ang imaw tih ka ngaihtuah a. Hemi pual hian Zoram hmun hrang hrangah Kohhran mi leh Kohhran mi lemlo pawhin Pathian an au ani tih thawm ka hre bawk a, chu chuan min thlamuan deuh. Mahse thla erawh a muang kim chiah lo!

Chutia bazar vel reh thup leh dar 3:30 vel chauh ni chunga khaw thim deuh ruih mai leh thli thaw deuh vuk vuk ka hriat chuan ka tih tur zawng zawng chu ka theihnghilh duak a, bak lengin in lamah ka tlan haw a. Inah chuan chhungkimin an lo awm thiap tawh mai a. Kan chhehvela thenrual thate pawh kan in a him an rin vang ni chuang lovin chhunglehkhat ten a hu hova tuar hian a tawrhdan a ziaawm deuh ange tih thu hlaah kan inah an rawn kal khawm a, thenkhatin puanthuah an rawn pu lut a, hak thlak, tui bottle, leh an inchhung bungraw pawimawh chena rawn in kenglut pawh kan awm. Kan inring hle mai.

Kei pawh chuan a hlau lo ber te tilo chuan, ka room ah midang hmuh lohvah ka lut a, ngawi rengin ka computer chu polythene in ka tuam a, ka bank account bu leh wallet chu ka safe chhungah awm mahse engemaw thut a awm takin tiin Polythene in ka tuam phui tlat a. Inring renga awm atul tih hria in engpawh lo thleng se... tih rilru puin tlanchhuak mai thei turin ka insiam lawk vek bawk a. Heng zawng zawng hi chhungte hriat lohva a ruka ka tih vek a ni. A chhan chu chhungte ngaihah chuan Cyclone hlaulo kha ka ni tlat.

A tawi zawngin sawi tawh mai ila... Dar 4:40 vel a ri tawh a thli a thaw vuk vuk a. Kei chuan chanchin ngaihvenin Laptop ka inchhawp a, internet ah lutin Cyclone Mahasen chanchin leh a kal kawng awm thei zawng zawng chu ka zawng char char a, Internet atanga ka en vel chuana  hmaa zan dar 10 vela thleng tur nia an sawi kha a kawng a thlak leh a dar 5:30 velah a rawn thleng dawn tih a ni leh thut mai a. Chu thu chu chhungte ka han hrilh chu a darh chak hle mai. Kan inchhungah ralkhel dar kan vua a ni ringawt, khaw danga kan chhung leh khat te kan phone darh nghal chum chum a. Cyclone lo thlen hma chaw eiang kan ti a, chaw bel kan hnuk ri nghal rum rum bawk a. Chutih lai vel chuan chhungte tan chuan BBC leh CNN palai hi ka ni ringawt.

Internet chu a khat tawkin ka thlir reng a, mahse a hmaa mithiam te lo sawilawk ang kha ni lovin mak tak maiin Cyclone Mahasen chuan a kawng a thlak ta tlat mai. Dar 6:00 vel a ri tawh a, thlir leh ruah chu tam vak lovin a sur a, internet chu ka en reng a, mak tak maiin Cyclone chuan Mizoram hel zawngin kawng a zawh ta tlat mai a. BMD leh IMD tena an website a an tarlan leh weather forecast website dang te chu ka thlir reng a, thilmak a thleng ta! Kan hlauh em em mai Cyclone Mahasen chuan Mizoram chu mak tak maiin a hel kual ta tlat mai a, thilmak a ni tih loh rual a nilo. 'E hei, Cyclone chuan a kawng a thlak tlat mai, Mizoram chuan a siper bak kan tuar dawn lo anih hi' ka ti a. Ka thinlung lawm zia chu ka sawifiah zo lo. Internet thlalakah pawh Mizoram bul vel chu Cyclone hnu a awm laiin Mizoram zawn chu a eng deuh chiai tlat mai! Thilmak tak ani tiin ka ngaihtuah neuh neuh a. Ka rilruah Cyclone kan pumpelh theih nana tawngtaia Pathian au tute an lo lang hmasa ber a. Tawngtaina chhangtu Pathian chuan a mite tawngtaina a chhang a ni tih ka ngaihtuah a. Cyclone kha mithiam te sawi lawk ang khan kan ram hian tuar ta ila chu chhiatna a thlen nasat zia tur te ka ngaihtuah a. Kan ramah sual nain nasa taka hna a thawk mek chung pawhin mi fel te zarah misual te thlenin Pathian hian min la hum duh a, ama hnena lawmthu sawia tawngtai hi kan va ba nasa em tih ka ngaihtuah a. Cyclone Mahasen kan pumpelh dana kan chunga Pathian hnathawh ropui tak kha ka sawi bang thei ta reng reng lo a ni.