A va tha em! tih piahlam

Serchhip hi Chief Minister Bial ni rei ber kan ni a, hei hi tam tak chuan inchhuan nan tak kan hmang a, ‘CM Bial kan ni lawm ni?’ tih hi kan invaukhanna leh sawi duhdan a ni fo mai. Amaherawhchu CM Bial nih ringawt hian hmasawnna hi a lo thleng tawp lemlo a, CM Bial ni chunga kan thutthluan mai mai si chuan eng hmasawnna mah kan thut chhuak tak tak dawn lo a ni tih hi kan hriat chian a tul khawp mai. Mipui te hian thawh ve tur kan nei a ni.

Kan ramah Sawrkarin a tihtur ang a tilo fova, Department lamin an thawh tur ang an thawklo fo thin. Hei hi mipui ten kan tuar a, siamthat kan duh em em a ni. Hei hi kan ram kalphung, State a hlankai kan nih atanga kan chindan thalo inhlanchhawn tawh anih avangin a tibo turin mipui te hian theihtawp kan chhuah a tul ta hle a ni.

Kan khawchhungah Sawrkarin Building emaw, Kawng emaw, Lei emaw a rawn siam thar hian a siamthar avanga kan lawm viau rual hian, A va tha em! kan tih piahlamah hian chu thil chu a nihna tur ang taka siam a ni em? A thilsiam leh pawisa sen a inphu tawk em tih te hi mipui lam ten kan enfiah thin a tul ta hle a ni. Chu chu kan huat em em corruption dona kawnga mitin ina kan thawh ve theih leh kan hmalakna pawimawh tak a ni ang.

MNF sawrkar hun lai khan ni tain ka hria Serchhip Darnam-ah Cold Storage tha tak tur din a ni a, kut hnathawktute an lawm hman hle a, mahse an Cold Storage siam chu hman pawh hman theih lohvin a awm a, tunah phei chuan Horticulture Dept lamin leitha dah nan an hmang vel mai mai ni awm tak a ni. Kut hnathawktute an khawngaihthlak hle.

Congress a han sawrkar a, thalai ten kan awh em em Sport Stadium din turin hma an han la rup mai a, kan lawm hman hle. Kum 2011-ah bul an tan a, kum 2013-ah chuan Complex Field tharah kan inkhel hman ang ti a kan sawi ruk sauh sauh laiin kum 2018-ah pawh a field hmun dang la peih si lovin Grass an phah tan ta phut mai a. Tin a tir atang rengin a sak dan tur anga ruahman sa ni lova hmalakna te awm thinin vawi tam tak khawtlang hruaitute, Party leh Sub Hqrs YMA lam theih theihtawpin an vil chung pawhin sawisel tur a awm reng te hi a mak ngawt mai. Anni hian enpui lo phei se tun dinhmun pawh hi kan thleng kher lovang.

Serchhip ah Auditorium lian tak mai, a veng neitute sawiselna karah sak a ni a. North East-a mipui punkhawmna Auditorium lian ber Serchhip ah sak a ni, tih chu kan hriat dan a ni a. Mahse an han sa zo a, official a an hawn hnuah pawh la hman hleihtheihloh a ni te saw a zahthlak hle mai, a hmang luih talh thintute tan pawh Sound hawh chawp ngai, Genrator tui inthunchawp ngai te a la ni a, a nih tur ang a la nilo hle a ni. A sawrkar lam ai mah chuan Serchhip mipuite tan hian a zahthlak zawk mahin ka hria.

Serchhip ah PWD Highway Division a awm dawn a, kan kawngpui pawh a tha tawh ang chu, kan lo ti a ring kan lo fan kan lo fan a. Mahse Highway Division luahtur Building lian leh manto tak an sak pawh luahtu awm lovin a chhe titih tawh a, tunah Private School pakhatah in luah dawn tih te a ni leh ta daih mai. A beidawnthlak thin khawp mai.

Heng lo pawh hi sawi tur atam mai. Chutih lai chuan sawrkar hian kan khawtlangah thil tihthat tam tak a nei bawk  tih erawh kan hriat a tha khawp mai. A pawimawh berah chuan Serchhip mipui te hi kan tanrual a ngai ta ani tih erawh a lang chiang hle. Kan Department a hnathawk tam tak hian Serchhip hmasawnna aiin an hmingthatna an duh niin a lang a, kan sawrkar hian Serchhip mipui tana rotling din aiin vote zawn nan chiah hmasawnna thlentir a duh niawma ngaih theih te pawh a ang ta rum rum mai. Hetiang anih lai hian Serchhip mipuiten theih tawpa kan tanrual a ngai a ni. Kan sawrkar lam mawhphuh rirngawt pawh a fuh ber lovang. Serchhip mipui te hian kan khawtlang tana tha tur hi ngaihtuah ila, sawrkar ina hmasawnna min thlensak a tum te hi kan khawtlang hian kan mamawh reng em? A hmanna tur angin kan hmang angem tih te hi ngun taka kan chhutpui ve a ngai. Kan khuain khawtlang ro thil tur engemaw kan neih dawn hi chuan kan lawm vanga kut ben zawha hawisan mai lo hian A va tha em! tih piahlam hi kan thlir tel thin a pawimawh ta a ni e.

- Laldinpuia

 15-02-2018