Aadhaar Card Bank Account nena thlunzawm dan

Consumer te i harh ang u - IX

            Aadhaar Card hi tunah hian a pawimawh chho ta tawlh tawlh mai a, sawrkar hnathawk leh sawrkar hnuaia tanpuina emaw sum leh pai la thin tan reng reng chuan Aadhaar Card tello chuan thil a tih hleih theih ta lo. Chuvang chuan Aadhaar Card hi a pawimawh chhoh tak zel avangin kan Bank Account nena kan thlunzawm hi a pawimawh hle tawh a ni. Aadhaar Card hi Bank Account nen hian thlunzawm a ngai a, hemi hi sawrkar nena awlsam taka kan indawr theih nan a tangkai hle a ni. Nationalised Bank te zinga State Bank a Account nei tan Aadhaar leh Bank Account inthlunzawm dan chu a hnuaia kawng hrang hrang hmang hian a tihtheih -

1) Internet Banking kaltlangin: Internet Banking hmang thin i nih chuan www.onlinesbi.com ah lut ta, My Accounts tih option hnuaiah khan ‘Link your Aadhaar number’ tih a lo awm ang a, khami ah khan lutin i Aadhaar number digit 12 chhutna tur a lo awm ang a, chutah chuan awlsam taka thlunzawm mai theih a ni.

2) ATM Booth kaltlangin: ATM Booth atang hian kan Aadhaar leh Bank Account hi awlsam takin a thlunzawm theih bawk a. ATM Machine ah i card swipe la, option hrang hrang a lo lang ang a, chutah chuan ‘Services’ tih kha click la, a hnuah ‘Registrations’ tih lo lang kha click leh la, chumi ah chuan ‘Aadhaar Registration’ tih a lo awm leh ang a, chutah chuan i Aadhaar number chhu lutin i Bank Account ah i link thei ang.

3) SMS kaltlangin: I Bank Account ah i mobile number chu a inregister chuan (Bank a pawisa i lakchhuah/dahluh a i phone a message i dawng thin anih chuan i mobile number chu i Bank Account ah a in register tihna) toll free no 567676 ah hetiang hian SMS i thawn ang: UID(space)(I Aadhaar number)(space)I Bank Account number tih SMS type la 567676 ah thawn rawh. Tichuan i phone-ah confirmation sms i dawng ang.

            A chunga tarlan hrang hrang zinga engemaw ber hmang hian kan Aadhaar number te kha awlsam takin Bank a thawktute tibuai kher lovin kan Bank Account nen kan thlunzawm thei a ni. A chunga tarlan te zinga a engamah khi kan tihlawhtling theilo anih erawh chuan mahni Account hawnna Bank-a kal a, kan Aadhaar Card leh Passbook te kengin a thawktute tihtur mai tur a ni.

            Tunlai khawvelah chuan engkim hi keimahni kutah a awm tawh tihtheih a ni a, chuvang chuan Bank dawr dawn pawhin Bank a intlar kher ngai lovin mahni ina kan duh ang tih theih dan hi kawng hrang hrang a awm tawh a, hetiang hi kan hman tangkai thiam chuan kan hun leh tha kan senna tur tam tak kha kan pumpelh thei dawn a ni.

            State Bank lo Bank dang, entir nan Rural Bank leh Apex Bank angah te Account kan nei anih chuan kan Aadhaar Card kha kan Bank Account hawnna Branch ah kengin a thawktute a thlunzawm tir theih bawk. Bank Account nei zawng zawng te chuan kan Bank Account leh kan Aadhaar card hi thlunzawm tir ngei ngei tur a ni. Thlunzawm tir nan hian pawisa chawi a ngailo.

- Laldinpuia

Secretary

Serchhip District Consumer Association