Eng ang chiaha pawimawh nge??

Consumer te i harh ang u -VIII

Aadhaar Card:

            Sakawlh tiin kan insawi thaih a, sawisel tam tak karah tunah chuan nei lo theilo dinhmunah kan ding chu a ni ta der mai. Aadhaar hi ID Card a ni mai lova, a pawimawh bera chu a card ni lovin a number (12 digit) zawka kha a ni, he number awmna Card hi UID(Unique Identification) an tih chu a ni. He number hi India khua leh tui zawng zawng te chhinchhiahna tur digit 12 nei Personal Identification Number (PIN) a ni. He number hi India khua leh tui zawng zawng te chuan an damchhung zawng an nei tawh dawn a ni. He UID Card hi neih ngei ngei tur ani chuang lova, Driving License, Bank Account, Pan Card te ang a a mamawh tana neih tur a ni a. Amaherawhchu sawrkar atanga Subsidy a kan dawn thin, Gas, Ration, Khawnvartui etc ang chi zawng zawng hi Aadhaar number(UID Card) neilo tan chuan dawn theih a ni dawn tawhlo thung. Chuvang chuan India khua leh tui tan chuan he Aadhaar number hi neih ngei ngei chi a ni. A number hi khawi hmun atang pawhin check theih a ni a, a neilo tan chuan India sawrkar hnuaiah thiltih reng reng a har tawh a, sawrkarah officialin thil engmah a tih theih tawhloh tluk a ni tawh.

Pan Card:

            PAN CARD kan tih hi a lampum chu Permanent Account Number tihna a ni a, he thil hi Income Tax Department ten Central Board for Direct Tax(CBDT) kaihhruaina hnuaia an hnuaia Tax petu te tana an card siam a ni a, tunah chuan ram puma document pawimawh ber a ni chho mek tawh a ni. PAN Card ah hian number leh alphabet inkawpin code a awm a, hei hi a card neitu nihna leh dinhmun kimchang tarlanna a ni. PAN Card hi hmun hrang hrangah an dinhmun hriatfiahna (ID Proof) atan hman thin a ni.

PAN Card ah hian alphabet leh number inpawlhin code a awm a, heng code te hian entirna hrang hrang a nei a ni. Income Tax petu te tan PAN Card hi neih ngei ngei tur a ni a, kum 2005 atang phei kha chuan Income Tax Department kaltlanga Challan siamah reng reng PAN card number hi tarlan tawh tur a ni. Tin hemi bakah hian immovable property transaction chi reng reng, inhmun leh ram leina te, motor leina ang chi reng rengah PAN Card hi hman zel tawh tur a ni a, tin Rs 25,000/- chin chunglam hmanna hotel leh restaurant ah te leh ramdang a zin dawnah te PAN Card hi neih ngei ngei tur a ni. Tin hemi bakah hian Telephone leh Mobile simcard book dawn te, Bank emaw Post Office emaw a Rs 50,000/- chin chunglam deposit dawn te leh Mutual Fund a Rs 50,000/- chin chunglam investment tih dawn te hian PAN Card hi neih a ngai a ni. PAN dilna hi Form 49A hmangin dil tur a ni a, dilna form hi Income Tax department website atangin download theih a ni. Tin hei bakah hian agent te hnen atangin dilna form hi lak theih a ni bawk.

PAN Card hi a dilna hmun tur bik leh ruat bik a awm chuang lova Income Tax Department hnuaia in register company/firm kaltlangin online in a duh apiang tan dil mai theih a ni. Mahni in lam atang pawhin Internet Connection neih chuan awlsam takin a dil theih bawk. Tin PAN Card dil tur hian Passport Copy 2 bakah Voters ID emaw Driving License emaw Aadhar Card emaw a ngai a Date of Birth ID a a lanloh chuan a tichiang turin Birth certificate a ngai tel bawk. Online a a dil hian India khua leh tui tan Rs 107 Income Tax ah a dilna fee a ngai a, Foreign Citizen tan chuan Rs 994 a ngai thung. Agent kal tlanga dilte chuan hemi bakah hian pawisa tlem azawng an chawi belh thin bawk.

-Laldinpuia