State Bank Service Charge lak dan thar tur tlangpui

            India rama Bank lian ber leh customer ngah ber State Bank of India-ah Account i nei anih chuan he thil hi i hriat ngei ngei a ngai ang. I hriatloh hlanin Bank Account i neih avang khan kawng tam takah i Account atangin Service charge a hnuaia tarlan ang hian lak a ni dawn a, tuna tarlan te hi mipui ina kan hriatfiah thiam tur chin leh atlangpui chauh tarlan a ni a, hei hi tun April 1, 2017 atanga hmantan tur a tih a ni. Service charge an lak dan kimchang erawh chu an State Bank Website-ah tarlan a ni.

1. Bank Account-a pawisa neih tlem man!: State Bank te hian kan Bank Account a pawisa englai pawha awm ngei ngei tur zat an rawn ruahman a. Current Account nei tan minimum Balance hi Rs 10000/- a ni a, Saving Account nei tan hetiang hian an Bank Account ah Balance englai pawha pawisa a awm a ngai: Khawpui(urban) mi tan Rs 3000/-, khawpui chhehvela(semi-urban) awm te tan Rs 2000 leh thingtlang(rural) lama awm te tan Rs 1000/-. Hetiang ang zat hi kan Account-ah pawisa kan neilo anih chuan a hnuaia tarlan ang hian pawisa kan chawi thin tawh dawn a ni.

            Current Account(Sumdawng tena Account an hawn thin)-ah hian thla khat chhunga minimum balance awm tur khi kan Account-ah a awmlo anih chuan Rs 500+Service Tax thla tin kan chawi tawh ang. Saving Account nei tan chuan khawpui(urban) area a awm te chuan thla khatah Rs 40 atanga Rs 80+ Service tax kan chawi ang a, semi-urban leh thingtlang(rural) a awm te chuan kan Account a balance kan neih dan a zirin Rs 25 atanga Rs 75+ service tax, kan Account-a pawisa kan neih tlem lutuk chuan kan fine thin tawh bawk ang.

2. ATM Charges: ATM Card hi man nei a ni a, ATM Card kan neih avang ringawt hian kumtin kan Account atangin State Bank hian Rs 175/- vel a cut thin. Debir Card thar dil man hi Rs 300/- a ni ang a, ATM Booth-a i Bank Account Balance i check ringawt khan Rs 25+Service Tax an charge ang che. Branch-a ATM Pin thar(duplicate) i dil khan Rs 50/- i chawi bawk ang. ATM atanga midang Account(Third party Account) a pawisa i transfer khan vawikhat transfer ah Rs 22/- + service tax i chawi zel ang. ATM a pawisa i lak tum kha i Account a awm aia tam lak tuma khawla i chhut palh chuan i tihsual manah Rs 20+ Service Tax i chawi ang. Debit Card atanga Card Linked AC-a pawisa transfer na man erawh a awmlo thung ang. I address an hmuh zawhloh avanga i ATM Card tur Post Office lamin Bank-a an return chuan Rs 100+ service tax i chawi ang.

3. Pawisa dahluh leh lakchhuah: Thla khat chhungin a thlawnin nangma account-ah ngei pawh vawi 3 chiah pawisa i deposit thei tawh ang(Saving Account-ah). Hemi aia tam i deposit chuan i deposit apiangin Rs 50/- + Service tax i chawi belh ziah tawh ang. Thla khat chhungin i Account atangin a thlawnin vawi 4 pawisa i la chhuak thei a, vawi 4 aia tam lakchhuahah hian lakchhuah apiangin Rs 5+ service tax charge a ni ang. Nikhatah Home Branch atangin Rs 20000/- a lakchhuah theih a, Debit Card atangin Rs 10000/- a  lakchhuah theih bawk.

4. Account hawn man leh passbook: Tun hmaa State Bank Account hawnna free thin kha tunah chuan enrollment atan Rs 20/- lak a ni tawh ang. I passbook i hmangzo tawh anih chuan Passbook thar a thlawnin an pe ang che a, i passbook i tibo palh anih erawh chuan duplicate passbook dilchhuah  manah Rs 100+service tax i chawi ang.

5. Demand Draft/Cheques: Demand Draft siam man hi Rs 5000/- hnuai lamah Rs 25/- chawi tur a ni a, Rs 5000-Rs1000/- ah Rs 50 zel chawi tur a ni ang. (Rs 50000/- Draft kan siam chuan a siam manah Rs 250/- kan chawi dawn tihna!).

6. NEFT/RTGS Transaction: Branch kaltlanga NEFT/RTGS transaction siam man hetiang hi a ni ang. Rs 10000/- chinah Rs 2.50+ serive tax a ni ang a, Rs 10000 atanga Rs nuai 1 inkarah Rs 5+service tax, Rs nuai 1 atanga Rs nuai 2 Rs 15+service tax, Rs nuai 2 chin chunglamah Rs 25+service tax chawi tur a ni ang.

Source: https://www.sbi.co.in/portal/web/services/servicescharges-01-4-2017

- Laldinpuia

Secretary, Serchhip District Consumer Association