HMAN TLAK THALAI

Bible ref: Tita 3:14, Ephesi 2:10

Kristian Thalai te hi Kohhran kut ke leh inghahna, ban pawimawh tak kan ni a, kan hmantlak tur a ni. Tunlai khawvelah hian hmantlak loh, chhawr hleihtheih loh thalai, phur ve satliah kan tam ta hle niin a lang. Chuvang chuan hmantlak thalai kan nih hi a pawimawh takzet a ni. KTP member te hian KTP a hming inziahluh ringawt hi kan pawl thiltum a nilo tih hre thar ila, thiltum leh innghahna mumal tak kan nei a, chung kan thiltum leh innghahna kan neih te tihlawhtling tur chuan hmantlak thalai kan nih theuh a pawimawh hle a ni.

KTP member list a kan inziahluh chiah hian kan thupui leh innghahna te hi bye heart tum ila, hemi hre chung hian KTP ah inhmang ila, Mahni thiltum pawh hrelo a pawngpaw phur ve satliah ringawt nih hi chu a daihrei tak tak theilo a ni. Hmantlak kan nih a ngai a ni. Hmantlak thalai kan nihna tur kawng 3 chauh han tarlang ila:

1) Kohhrana hmantlak thalai: KTP te hi Kohhran hnathawh tipuitlingtu tura din kan ni a,

Kohhran kut ke kan ni. Kohhranin a duh chuan KTP a thiat thei a, a duh leh hruaitu tur hi a ruat thei bawk. Chuvang chuan Kohhran hi KTP ah hian a thu hle a ni. Kohhran chuan mumal taka Kohhran a kal theih nan KTP member te chu Kohhran nungchang zira Kohhran tana thawk tura beisei kan ni a, chutiang tihhlawhtlin chu KTP hna pawh a ni. Kohhran mawina hi thalai te chezia atanga thlir a ni fo thin. Kohhran innghahna leh Kohhran ina a chhawr tlak KTP member kan nih a pawimawh hle a ni. Kohhran leh KTP te hian hnatlang te leh programme dang dang a nei thin a, hetiangah hian KTP lam awn viau a Kohhran programme leh hnatlanna vela kal peih leh miah silo kan nih chuan kan KTP chhan kan chiang lo hle tihna a ni.

            Branch leh Group KTP a thahnem kan ngaih ang thova Kohhran thiltihnaa thahnem kan ngaih a, Kohhran inkhawm leh hunruat te kan ngaihpawimawh a tul hle. KTP te hian Kohhrana hmantlak thalai kan ni tih hi i lantir zel ang u. KTP member nih ringawt te, KTP a phur viau nih ringawtah te hian tawp lo ila, min enkawltu leh min tuammawitu Kohhran hmantlak ni tura inchher mek kan ni tih hriain Kohhran hmantlak leh kutke ni turin theihtawp kan chhuah thar zel a ngai a ni.

2) Khawtlanga hmantlak thalai: Tlemlai deuh khan Kohhran leh YMA hi kar awm anga sawi a ni thin. Mahse a nihna tak hrechiang apiang ten Kohhran leh YMA inkungkaih thukzia leh thawhho tul zia hi an hrechhuak zawk fo thin. KTP member te hi khawtlang tan enge tangkaina kan neih? Khawtlang hian chhawr tlakah min ruat em? Khawtlang rawngbawlna te hi kan phak ang tawkin kan buaipui/tel ve thin tur a ni.  Intih muk em em, intih thlarau mi em em, mi ruala nuih pawh nui ve peihlo khawpa inti mitak nih te hi a hlawkthlak vaklo. An hnunglam atanga midangte sawi sep sep an ni duh fo.

            Thalai te hi Kohhrana kan tangkai ang thovin khawtlangah kan tangkai tur a ni. ‘KTP member chu khawhar in an kal tlai thin,’ ‘KTP sachek siam chu a dal bik’ tih hunlai te khan mual liam tawh sela, tunah chuan KTP member te hian khawtlang tan mi hmantlak leh chhawrtlak kan ni tih hi kan khawtlangah i lantir tawh zawk ang u. Kohhran dang leh Kohhrana inhmang ve ngailo te tan entawnah insiam zawk ila. Anni aia taima leh thawktam, rilru tha leh ngaihtuahna fing nei nih i tum zawk ang u. Pathian mite hi Biakin a rawngbawla duhtawk mai tur kan ni lova, Biakin hi chu Pathian kan Biak a a thuchah kan ngaihthlak a amah kan fakna hmun tur a ni. Kan rawngbawlna hmun tur chu Biakin pawnah, khawtlang rorel naah, thenawm khawven naah leh midangte zingah a ni. Chuvang chuan Kristian Thalai te hi KTP rawngbawlna a zei leh thiam tak chauh ni lovin khawtlang rawngbawlnaah te, ram inrelbawlna politics ah te leh pawl ho rawngbawlnaah te pawh hian hman tlak, chhawr tlak kan ni tur a ni. Khawtlang pawhin rawn ena a en loh leh hmantlak a a ngaihloh chu Kohhranah pawh an chhawr hleihtheih chuang loh. Khawtlang tan pawha chhawr leh hmantlak thalai nih I tum theuh ang u.

3) Pathian hmantlak thalai: Mahni phak ang tawk tawkin Branch leh Group KTP-ah te phur takin rawng te bawl thin mah ila a pawimawh bera chu ‘Pathian hmantlak’ kan ni em? tih hi a ni. Pathian hmantlak thalai nih hi a pawimawh hle. KTP member ni ve si, danglam lo, sual kalsan chuang silo, phur ve em em ringawt, khawmpui nikhua leh hnatlan nikhuaa chance lo zawng hram thin te hian KTP an timualpho a, Kohhran an ti mualpho a Pathian hmantlak loh an ni.

            Tunlai khawvelah hian thil chi hrang hrang ten min chim vel a, thalai te tan penna tur leh han thlek bo zeuhna tur kawng a tam hle, kawng dik awm taka lang mahse kawng dik ni silo te, kawng ngil awm taka ngaihtheih mahse kawngkawi lo nitlat te a tam ta hle mai. Hei hian harsatna tam tak min siam a, rawngbawltuteah ngaihdan inanglo a siam a, mahni duhdan leh mawina tur zawnga Pathian thu lo kaihlek ta vak te pawh awm theih a ni. Hetiang karah hian Pathian hmantlak ni tur chuan chhel taka tuar a tul chang a awm ta fo mai, Kristian Thalai te hi kan fimkhur a tul hle a ni. Kan rawngbawlna hian Vanram a kawk em? Kan thahnemngaihna hian chatuan a daih em? Pathian hmantlak kan ni em? tih te hi kan inzawh fo a tul ta hle a ni. Belhchian dawl leh entawn tlak, khawvel mitena an ngaihsan leh Pathian hmangaihna nun neitu, Pathian hmantlak thalai nih i tum theuh ang u.

            KTP te hi hmatlak thalai kan ni tur a ni. Kan awm mai mai tur a ni lo. Hmantlak thalai ni tur hian qualification dang a awm chuang lova KTP member te hi kan qualify vek a ni tih kan hriat a pawimawh. KTP rawngbawl hna te, hruaitu chanvo te hi tupawhin kan chang thei vek, Pathianin talent min pe vek a, kan zavai hian chumi atan chuan kan hman tlak vek a ni. Ka school a teacher common room bangah sawn he thu ziak hi ka tar a, “If there is anything that a man can do well, I say let him do it. Give him a chance” – Abraham Lincoln. He thu ka han tarlan duh nachhan chu rawngbawlnaah hian a ti tur bika belruat kan awm chuang lova eng chanvo pawh hi kan chelh thei vek tih hi a ni. Chanvo pha pha nih te, thiamlo tura inngai tlat nih te hi a thalo. Miin theihtawp a chhuah chuan a tithei zel thin. Pathianin chumi tur atan chuan a mite chu a ruahman thin reng a ni.

Chuvang chuan KTP member te hian keimahni kawng zawn theuhah hmantlak thalai, tangkaina leh hlutna nei thalai nih i tum theuh ang u.

-          Laldinpuia

27.1.2017

| Ni 30.1.2017(Thawhtan) Zan Serchhip Hmar Veng Branch KTP Inkhawma ka thusawi|