CHHUM ZINNA PIAHLAM

    He thlalakah hian tlang phenah hian chhum a zing phui khup mai a, mahse chhum zinna piahlah hian vur tlang mawi tak Mt. Annapurna an tih chu a awm si. He vur tlang mawi leh nalh em em mai hi lan hun bik pawh nei lovin hun reilo te chhung mawi takin a lang a, a hnu lawkah chhumin a khuh leh thin. He vur tlang hmuh tum hian khawvel ram hrang hrang atangin khualzin mi tam tak nitin Pokhara, Nepal-ah hian an lo lut thin a. Mi tam takin an hmuh laiin mi thenkhat thung erawh chu an kal laiin chhum a zin thin avangin vur tlang hmu lova beidawnga hawng leh ta te pawh an awm an ti. Mahse chhumzinna piah lama tlang mawi tak hmuh tuma nghak tang tang te chuan an nghakchhuak nge nge thin. Thlalak hmasa zawk hi vawiin(31.12.2016) dar 12:27pm a ka lak a ni a, a hnuhnung zawk hi zing dar 7:21 a ka lak a ni thung.


    He vurtlang ang bawk hian kan hringnun hi a awm thin niin ka hria. A chang chuan mawi takin kan par chhuak a, a chang ve thung chuan ka hringnun chu chhumin a hliahkuh a, midang tan hmuh theihloh leh midang tan pawha mawina neilo khawpa kan sawprawp chang a awm thin. Mahse he hringnunah hian beidawng mai tur kan lo ni lo. Chhum zing hian kian hun a nei dawn a, chhum zinna piaha ram mawi tak chu hmuh theih hun a la awm dawn ani tih kan rin tlat chuan engtikah mah kan tlu chhe ngai lovang.
    Chhumzinna piahlam ram beisei a thlirtute hian he khawvela kan awm chhung hian beiseina nung nei ila, kan chunga harsatna leh vanduaina te, beidawnna chhum ten kan hringnun a hliahkhuh lai pawhin chhum zinna piahlam ram mawi chu thlir tlat ila, "thim a la kiang anga nakinah khua a la var ang" tih ring tlat ang u. Chu chuan he khawvela dinhmun hreawm taka kan awm lai pawh hian thlamuanna min pe ngei ang.
    Kum 2016 chhunga kan hun hman liam tak zawng zawng te kha nawhreh theih a ni tawh lo a, khang te khan chatuan hmun min thlenkhalh tawh a ni. Chuvang chuan kum 2016 a kan hun hmanliam tak atang khan hmasawnna tur kan neih te dahchhuak ila, he hringnunah hian lungngaia beidawnna atan hun kan nei tam lo tih hriain nunna kan neih chhung chuan beiseina nei ila. Chu beiseina chuan kum 2017 lo thleng turah hian kan nunah hmasawnna kawng tam takah min thlen theuh rawh se. Kum 2016 chu tlai nitlak rualin mangtha la, kum 2017 hmachhawn turin inbuatsaih rawh le.

"Somewhere beyond the clouds i can see the morning break" - Bill Kaulitz

-Laldinpuia
from Pokhara, Nepal