Inhmangaih tawnna kan neih a tul

    Mother Teresa chuan, "He khawvela kan hmuhtheih mihring te mah kan hmangaih theihloh chuan engtin nge hmuhtheihloh Pathian kan hmangaih theih ang ni?" a lo ti. Inhmangaih tawnna hi a lo pawimawh hle mai, Kohhran mite tan phei chuan a pawimawh lehzual. Inhmangaih tawnna ka sawi hi nula leh tlangval inhmangaihna(opposite sex love) lam ni lovin inkungkaihna(relationship) lam a ni. Kan mihringpui te hmangaihna kan neihloh thin avangin harsatna tam tak mihring ten kan tawk thin. Kan inhmangaih tawn theihloh chuan kan inhua a, kan inrel a, kan rawngbawlpui te kan itsik a, kan sawichhia a, chu chuan thawhhona kan neih theihloh phah thin.

    Tirhkoh Paula pawhin "Inhmangaih tawnna chauh lo chu tuma engmah ba suh u" a lo ti a, ringtu te hian hei hi kan bawhpelh nasa lutuk thin a, kan rawngbawlnain hma a sawn theihloh phah fo thin. Inhmangaih tawnna nilo hi kan chhehvela miteah bat kan ngah thin lutuk a, an lei kan ba a, anmahni sawisel chak riauna te kan ba a, midang bula sawichhiat chakna te kan ba a, thenawm khawveng te midang bula rel chak riauna rilru te kan pu a. Heng hian kan Kristianna a vawchhia a, midang mithmuhah kan biak Pathian a timualpho a midang te Kristianna hi an hmuh mawiloh phah thin.


   Midang sawisel vak hi a sawtlo khawp mai, chu ai chuan an tlinlohna leh thatlohna kan hmu anih pawhin ngawi mai ila, an thatna kan duh anih chuan anmahni fuih zawk ila, midang bula sawisel lovin kan mihringpui te hi hmangaih takin dawhthei takin, Pathianin keimahni ang thova nunna a pek, a hmangaih te an ni tih hrereng zawkin dawngsawng ila i hmangaih tawn theuh ang u. Midangte hmangaihna nei lo leh hmangaih theilo rawngbawltu chuan nuam takin Pathian rawng a bawl thei thin lo. Inhmangaihtawnna hnuaia rawngbawlna hmunah erawh chuan engkim an tiho dial dial a, hnathawh a nuam a, hmalak ho a nuam a, midang inngaihchan nachang an hria a, chu chuan nasa takin rawngbawlnaah hmasawnna a thlen thin. Inhmangaih tawnna chuan inlungrualna a hring a, chu chuan thawhhona tha a hring a, chu chuan ringtu nun a tinuam a, rawngbawlna a tichak thin.

    He khawvelah hian tumah kan kumhlun dawn lo, kan damchhung te hi a rei lo hle, he khawvela kan hun hmanlai zawng zawng a midang te mil theilo leh midang te hmangaih theilo mi kan nih chuan kan damchhungin hreawm reng rengin hun kan hmang thin tihna a ni. Midang te nena inlungrual taka awm te hi a nuam a, inhmangaih tawn dial dial te, thawhho dial dial te hian khawvel nun a tinuam a, nakinah kan thih hnua van nun kan chen hunah kher lo pawh he khawvela kan chen lai pawh hian nuam takin, hlim takin hun hi a hman theih a ni tih ringtute hian kan hriat a tul. Ringtute hi kan chhehvela ringlo mi leh ringtu tluchhe mek te hian kan nun min thlir a, min zir thin tih kan hriat a pawimawh hle. Inkhawm peih viau, tawngtai ring thei viau, mahse pawn lama midang mil thei lo leh huat ngah em em mai, Kristian nun dan tura nung silo te hi te hian midang te nun an hruaisual a Kohhran rawngbawlna leh Kristianna hi midang mithmuhah an lan mawilohtir mek a ni. Chuvang chuan ringtute hian kan rawngbawlna kawngah hian midang te hmangaihna nun nei ila, mahni hlimhlawp ngawt ngaihtuah lovin midangte hlimna pawh ngaihtuah tel thin ila, inhmangaih tawnna nun nei chungin he khawvela kan awmchhung hian hlim takin hun i hmang ang u.

-Laldinpuia 12/8/2017