A tih theih tawk a ti a ni

Bible Chang chhiar tur : (Marka 14:3-9)

    Lal Isua kha he khawvela rawng a bawl lai khan thil tam tak a tawng a, kum 3 chhung lek rawngbawla a zinkual naah khan thu ropui tak tak a sawi a, tehkhin thu tha tak tak hmangin mite a zirtir thin bawk tih Bible-ah kan hmu a. Bethani khuaa Simona inah chaw a kil lai pawh khan Hmeichhe pakhat chuan hriak rimtui, a hunlai chuan man to tak mai tur kha a luah a rawn thih tih kan hmu a, a zirtir te lah chuan khatia hriak rimtui man tam tak mai Isua lu a luan raltir mai ai chuan sum tam takah chantirin mirethei te chawm nan leh chhawmdawl nan hmang se tia rilru an lo neih laiin Isua chuan chu hmeichhia chu lawmthu a hrilh hlauh mai a. ‘A tih theih tawk a ti a ni’ tiin a chungchang thu a sawi nghe nghe. Helaia Lal Isua chhanna thu hi a pawimawhin zirtur a tam hle a ni.
    Kha hmeichhia khan Lal Isua a zui awm kan hre lova, a hmain a rawngbawlna a tawiawm thawm leh a rawngbawlna atana thawhlawm a thawh awm reng reng hriat a ni lo. A thiltih awmchhun chu kha hriat rimtui man to tak mai Isua lu chunga leihbuak ringawt kha a ni. Mahse kha a thiltih pakhat te avang khan khawvel zawng zawngah chanchintha an hrilna apiangah athiltih chu sawilan zel anih tur thu Isuan a sawi tlat mai. A tih theih tawk a tih khan Isua kha a tilawm em em a ni.

    Pathian rawng kan bawl a, theihtawp kan chhuah a, midangte aia thawk tam leh thawk hnem nih kan duh theuh a, keini aia rawngbawlnaa tlatlum leh thawhhlawk ni awma kan ngaih te kan hmuhin kan ngaih a tha lova, thikna rilru keimahniah a awm fo thin. Rawngbawlnaah a ler a chuang nih kan duh theuh a, keimahni ang bawka thahnem ngai turin midang kan phut a, kan phut anga an tihhlawhtlinloh changin kan vuivai a, kan dem phah fo thin. Kan phak loh leh tlinloh thil tihhlawhtlin talh kan tumna hian kan rawngbawlna leh ringtu nun min vaw let fo. Hetiang kara cheng thin ringtute hian kan chanvo tawk zel leh kan tih theih tawka rawngbawl kan thiam hi a tul ta hle a ni.
    Kan phak ang tawk leh tihtheih tawka rawng kan bawl theih dan tur kawng 2 chauh lo tarlang ila:

1) Tih theih tawk tih, KTP/Kohhran rawngbawlnaah:
    KTP leh Kohhranah te rawngbawlna peng hrang hrangah hma kan la thin a, heng kan hmalaknaah te hian member mitinte hian kan tih theih tawk leh kan chanvo theuh hi kan hriat thiam a tul hle mai. KTP leh Kohhranah chuan hruaitu an awm a, member kan awm bawk a. Hruaitu mawhphurhna a dan rualin member pangngai mawhphurhna a dang. Amaherawhchu Pathian lamah erawh chuan kan mawhphurhna a len leh tet avanga lawmman dawng tur kan ni lova chatuan nunna kan chan tur chu a inang vek a ni tih erawh kan hriat fo a tul. KTP hruaitu kan nih chuan mawhphurhna lian tak kan nei a ni, Branch OB, Committee member leh Group hruaitute phei hi chuan member te aiin  mawhphurhna kan ngahin kan chanvo pawh a tam hle. Chuvang chuan member te kaihruaitutur leh member te aia thahnemngai zual tur kan ni.
    Tin, member te pawh hian kan chanvo leh kan tihtheihtawk hi kan hriat a pawimawh hle. KTP member tam tak KTP activities a an tel tam hmanloh avanga inkhawm hreh ta tlat te, hmelhriat neih thatloh avanga inhmang tha duh lo te, hruaitu dinhmun a din loh avanga tui lo ta riau te pawh awm theih a ni. Heng ang rilru pu kan nih chuan kan inenfiah a ngai hle a ni. Member satliah, mawhphurhna nei lemlo kan nih avangin kan hlu lo ta riau tihna a ni lo. KTP member kan nih chuan KTP thiltum hrang hrang te kha kan kova innghat leh kan mawhphurhna atana bel nghal a ni. Chuvang chuan hruaitu kan nih loh avangin KTP ah kan thu lova kan nep ta bik riau tihna a ni miah lo. Member kan nih avanga kan inkhawm a, faith promise kan pek te, KTP leh Kohhran thiltihnaah te kan tel ringawt khan kan tih theih tawk kan ti a ni a, kha khan Pathian a tilawm em em a ni. Pathian hian kan lakah hian thil tam tak min phut lova, kan tih theihtawka amah kan fak leh a rawng kan bawl hi erawh a phut tlat a ni. Zaithiam ka ni lova, Pathian chuan amah fak na atana aw mawi tak ka chhuah a phut kher lo; sports lampangah thiamna ka nei miah lo; chuvang chuan Pathian chuan inkhel thiam tak ni turin min phut lo. Mahse lehkha zirmi, zirlai ka ni a, ka phak ang tawkin thuthar thehdarhna lamah ka thawh bakah IT te ka hmang tangkai thin bawk. Pathian chuan helam kawnga ka theihna leh kan thilthiam te chhawr tangkaia amah fak nan leh a rawngbawlna atana hmang tangkai turin min phut tlat thung a ni. Sawrkar hna kan thawk emaw, lovah kan feh thin emaw, mi hnuaia inhlawhfa kan ni emaw, zirlai kan ni emaw, kan nihna ang angah Pathian chuan kan theih ang tawka amah fak turin min phut a ni.
    Keimahni phak bak piahlamah min phut ngai lova keimahni dai chin zelah a ni Pathian hian kan lakah phut a neih hi. Midangte rawngbawlna lo thik ve ngawt emaw, an tih ang kan tih ve theihloh avanga lo lunghnur ngawt emaw hi kan tihtur a nilo. Hla siamtuin engtin nge a tih kha,
    Kan theih tawk tlem hle mahse,
    Kan theih tawka kan tih hian,
    Pathian chawimawiin a awm thin,
    Kan rawngbawlna Lalpan a pawm si’ a lo tih kha. Kan theih tawk te hi a tlem emaw a tam emaw a pawimawh ber lo, a pawimawh ber erawh chu Pathian rawngbawlnana kan theih tawk ang kan chhuah ve kha a ni. Zaipawl member a kan tel chuan hla zir a Pathian fakna atana theihtawpa  zai mai kha kan tih tur a ni, thuhriltu pawhin thuhril mai, member dangte pawhin Pathian biak inkhawma thusawitu thusawi ngaithlaa thut ringawt te, khuang vawtu pawhin khuang vuak mai te etc. a tam mai. Khatiang zel khan kan theih tawk ang theuhva Pathian kan fak a a rawng kan bawl hi Pathian hian a phut tlat a ni.

2) Tih theih tawk tih, ram leh hnam siamthatna kawngah:
    Tunlai khawvelah kan Zoram chhungah rorelna dik duh kan tam sawt hle a, corruption huatna thlipui a tleh mek a, tun hmaa kan lo chung en leh ngaihsan ruk em em te pawh an diklohna hailan anih meuh chuan kan en dan a danglam tan mek tawh bawk a. Hetiang hunah pawh hian corruption duhlo inti te hian kan tih theih tawk hi kan hriat a ngai khawp mai. Sawrkar hnathawk hlemhletna titute kan dova, hetianga hma kan lakna kawngah hian a mipui nawlpui hi kan pawimawh hlein kan hre thin. Mizoramah mipui nuai 10 vel awm mekah hian sawrkar hnathawk hi mi 50,000 vel an awm a. Midang nuai 9.5 te chu sawrkar hnathawk lo kan ni. Heti hian ka ngaihtuah thin, mipui nuai 9.5 te hian dik takin thil ti ila sual do ngam ila chu sawrkar hnathawkte hi an diklo ngamlo hrim hrim, kan ram hruaitute hian politics ah dawt min hrilh ngamlo hrim hrim.
    Khawvela democracy ram lian ber kan ni a, mahse kan ram sawrkara thil diklo tam tak hi engatinge mipuite hian kan siam that zawh loh le? tih hi ka ngaihtuah fo thin. Sual kan dova, corruption kan dova, rorelna dik kan duh anih tak zet chuan keimahniah hian i tan hmasa ang u. Mika 6:8-ah chuan Aw mihring, tha chu a entîr tawh che a ni; LALPAN a phût che chu eng nge ni? Dik taka tih leh khawngaihna ngainat leh i pathian nena thuhnuairawlh taka lendun a ni lo vem ni? a tih kha. Hei hi Pathianin mimal tinte a a phut a ni.
    Ram leh hnam tha leh nuam kan duh chuan keimahni hian chumi tur chuan hma kan lak hmasaka kan tih theih tawk kan lo chhuah ve a ngai a ni. Ram rorelnaah kan telve lo a ni thei e, sawrkar officer te zingah kan hming a lang ve lo a ni thei e. Mahse mimal tin te hian he ram leh hnam siamthatna tur atan hian tih theih tawk kan nei theuh a ni. Khua leh tui tha nih te, sawrkar dan siam zawm mai te, dik taka thiltih mai te hi kan tih theih tawk awlsam te a ni. Hetiaang te te tihhlawhtlinna atang hian a ni ram leh hnam siamthatna lungphum chu a intan ni. India ram hruaitu ropui Mahatma Gandhi-a chuan, “Danglamna he khawvela thleng tura i duh kha nangmahah thlentir hmasa zet rawh” a ti.
    Keimahni lamin kan tih theih tawk kan tih phawt hi a pawimawh hle a ni. Hemi chungchangah hian thawnthu pakhat lo tarlang lawk ila:  
    Nikhat chu mi pakhat hi tuipui kamah hian a leng vel a. Zan lama tuifawn chuan tuipuia tuikep leh sangha te chu vaukamah a chuan a rawn hnawl chhuak \hin tih a hmu a. Chu zing nichhuak leh boruak mawi tak mai dawng chung chuan tuipui kamah chuan a kal zel a. Hla takah chuan hlim thla chevel, lâm ni awm tak hi a hmu a, tu emaw in hetiang ang hun nuam hi chenin a lâm kual vel anih dawn saw tiin a ngaihtuah a. A va pan hnai zel a, a bul hnai a va thlen chuan lâm emaw a tih kha a lo ni lova hmeichhe naupang te pakhat hi a lo ni a. Chu hmeichhe naupang chuan zan lama tuifawn ina vaukama sangha leh tuikep a rawn lenchhuah te chu a lo chhar a, tuipui lamah chuan a lo vawmlut zel a. "Engatinge khang sangha te kha tuipui lama i vawmluh zel a?" tiin chupa chuan a zawt a.
    "Heng sangha te hi tuipui kam a ka kalsan mai chuan nakinah niin a em ro ang a, an thi mai dawn a ni. Nung tura ka duh avangin tuipuiah hian ka vawm let leh a ni" tiin chu hmeichhe naupang te chuan a chhang a. Chupa chuan chu hmeichhe naupang ngaihdan chu mawlmang a ti khawp mai a, tuipui kam vel chu a han thlir kual vel a, chu naupang hnenah chuan, "He tuipui kamah ringawt pawh hian sangha maktaduai tam tak tuifawn in a a lenchhuah an awm a ni a, engtinnge chung zawng zawng te nun chu i chhanhim ang a, danglamna i thlentir theih ang ni?" tiin a zawt a.
    Chu naupang te chuan chupa thusawi chu ngun takin a ngaithla a, rei lote a ngaihtuah hnuah tiauvut a sangha pakhat let reng chu zawimuang hian a chhar a, tuipui lamah chuan a vawm phei a. Chumi zawhah chuan chupa lam chu hawiin, "I tidik e. Mahse kha sangha pakhat tan khan danglamna ka thlentir der asin!" tiin a chhang a.
    Thil tetham te te a bul kan tan hian thil liantham atana kan inbuatsaihna leh bul tanna a ni. Chuvang chuan danglamna thlentir tur hian thil te lua a awm lo, a te ber atanga bul kan tan that a, a tantir te atanga kan ram leh hnam siamtha tura bul kan tan hi a tul hle a ni. Midang siamthat a dah mai lovin, hlemhletna leh thil diklo pawh midang do atana dah mai lovin i theih tawk kha chhuah ve phawt mai teh.
    Pathian rawng kan bawlna kawngah te, khua leh tui kan nihna kawngah te hian mitin te hian kan phak ang tawkah tih tur kan nei theuh. Midang chanvo kan sawisel sak chiam tum lampang hi insiamthatna atana hmanraw tha ber a ni lo. Chu ai chuan keimahni theuh hian kohhrana mawhphurhna kan neih te, khawtlanga mawhphurhna kan neih te, khua leh tui tha ni tura mawphurhna kan neih te hi hlenchhuak theuh ila chu chu kan rawngbawlna hlawhtlinna tur leh kan ram leh hnam siamthatna tur a ni. Kan tih theih tawk hi sit lo ila, kan tih theih tawk kan kovah chanvo awm hi hlenchhuah i tum theuh zawk ang u.


- Laldinpuia 30.9.2012

| Ni 1.10.2012 Serchhip Hmar Veng Branch KTP Inkhawmnaa ka thusawi |