Engtin nge ni ang???

THALAI ARSI Editorial (26.8.2012 Issue).......

    Tunlai khawvela kan hriat lar tak em em leh kan ngaihtuahna tibuai fo tu chu ‘rilru natna’(depression) hi a  ni awm e. Hei hi kan thalai te rilruah a lian hle a, hei vang hian kan thalai tam tak ten sual rawng an bawl a, mahni intihhlum phah hial nana hmang te pawh kan awm ta nual mai. Serchhip ngei pawhin he thil hi a takin kan hmu mek zel a, KTP member leh KTP a inhmang rual pawh la ni lo kan tleirawl tam tak te hi he thil hian a tibuai mek a ni. Chuvang chuan KTP te hian hetiang ang kan thalai leh tleirawl tena an buaipui mek hi kan ngaihven a ngai a, engtin nge he harsatna hi kan sutkiansak theih ang tih hi kan ngaihven a rilru kan sen a hun hle a ni.

    Tunlai kan thalai te nun han en hian kan hmabak hi a khirh hle niin a hriat, tunlaia sualna tam zawk hi nula tlangval ai chuan kan tleirawl te hian an hmelhriatin an luhchilh hneh tawh zawk a ni tih hi kan hriatchian a pawimawh a, chuvang chuan KTP te hian member hla te kan vei a, member hla te puala theih ang tawka hun kan hman mek lai hian, KTP member la ni mai tur leh member thar tleirawl zawkten sual kawng an zawh mek hi kan hmuhpui a heng mite chhanchhuak thei tur zawnga rilru ngaihtuahna kan sen a, ruahmanna kan siam thiam pawh a tul ta hle a ni.
    Heng kan tleirawl rualho leh kan nau te hian chhanchhuaktu an mamawh a, KTP member an nih hma hauh atanga sualin a tihbuaia sual kawnh zawh mek te hian khawharna leh mal ngawih ngawihna, beidawnna lian tak an tawk mek a, hemi chhanchhuak tur hian KTP te hian hma kan lak thiam hi a tul ta hle a ni.