Serchhip tana ka hmathlir

Serchhip hi Mizoram-a khawpui te zingah chuan a rualpawl leh hriathlawh pawl tak kan ni awm e. Mizoram-a kawng hrang hranga mi hriathlawh te hi Serchhip District chhung ami an ni nual mai. Tin chu bakah a khaw awmna hrim hrim hi Mizoram hmun laili taka awm kan ni a, hei vang hian kawng engemawti zawng tal chuan he kan hmun laili na pawh hi chhawr tangkai tham chu a ni ve hrim hrim mai.

Amaherawhchu thil remchang tak pawh hi a hmangtu thiamloh chuan a nih tur angin a hman theih loh fo thin. Chutiang chiah chuan kan khawpui pawh hi khawtlang hruaitu te zirloh nge mipui te zirloh vang, tun thlengin kan khawpui inrelbawl danah hian duhthu a sam lova, 'heti zawk hian nise' ti a thahnem ngaihna awka hriat tur a la awm reng mai. Hetiang kawngah hian ruahmanna tha zawk ni a kan hriat te thalai ten fakselna leh chanchinbu hmang ten kan puangzar fo thin a, rual u leh khawtlang hmangtu te pawhin chanchinbu hmang ten an lo puangchhuak fo tawh thin. Mahse heng mipui aw hian thuneitute beng a fah lo deuh nge ni chu aw tih theih turin hmasawnna leh danglamna hmel hmuh tur a tam lo hle. Khawtlanga mi tihmawh tlemte te avanga Sainik School kan chan thu te, Refferal Hospital kan hnawl thu leh hmasawnna tur thil kan chan thu te chu tun tumah chuan sawi ka tum lo a, tuna kan khaw dinhmun thlira kan hmasawnna tur leh hmalam pana ruahmanna kan siam theih nan rawtna tlem te han chhawpchhuah ve ka tum a ni.

1. Damdawiin kawng phei hi: Hospital Department hian kan khawpui laili tak an chang a, ram pawh an nei zau khawp mai. Mahse an ram hman danah hian khawtlang thatna aiin anmahni remchan dan angin sum sen hautak lo leh khawtlang tana hnawksak zawngin ram an hmang em ni chu aw a tih theih. CMO Office an sak dan han en hian a tlak lama ram awl zau tak awm duai si a, kawngpui hnaih thei ang bera an han sa te, Trauma Centre Building in mipui vantlang kawng a hnaih zia leh rikrum thila mipui te tan chetvelna harsat khawpa kawtkai an tihchep laia a thlang lama an ram la awl duai si te han hmuh hi chuan 'engatinge, engvang nge?' tih zawhna inzawh mai a awl khawp mai.

            Tin, Vengchung leh Saron veng chhoh dawna kawng chunglamah hian hmanah chuan phul hmun a awm cham diai a, a nuam hle. Tlaiah nula leh tlangval, naupang chena tual chaina leh len khawthawnna ber a ni a, a nuam thei hle thin. A hmun a nawm mai bakah khawchhung vel han thlirna hmun remchang tak a ni a, hei vang hian nula leh tlangval tan chuan lenvahna hmun nuam tak a ni reng a ni. Zan lamah te pawh tlangval lungleng zual te chu Guitar nen hlim takin he hmunah hian an zai thin anih kha. Amaherawhchu Department lamin thalaite nekchep zawngin a hmun tha lai laiah a hmun nuam renlo thei ang berin Building an sa ta uaih mai a, tunah chuan hmana Serchhip thalai ten tual kan chaina hmun kha tlawhpawh loh hmun khawro a chang zo ta!

            Damdawiin leh Doctor Quarter phei vel hi mawihnai taka chei a chakawm ka ti thin. A hmunin a zir bawka phai ram te angin zau tha takin kawngpui han khamphei ruih mai se, a sir tawn tawnah thutchawlhna thutthleng sei hung phei thluah ila, a ti nuam turin thing ding phei khup mai bawk se, tin zan lama tieng turin lamp/street light han inhung phei thluah mai sela a va nuam dawn em! Helai vela kal thin tan mai bakah Damdawi ina damlo awmpuitu te tan chawlh hahdamna tha tak a ni bawk ang. Thuneituten a nachang hria se han cheibawl deuh chu a tha mang e ka ti, khawpui tinuamtu atan.

2. Kan kawngpui mawlh hi: Mihring chenna chin, Chhiahtlang Highway Restaurant bul vel atanga Thenzawl peng Sailiam thleng hian kan kawngpui hi zawh ila hmun thuma thena hmun hnih(2/3) hi chu a chhe hle tih kan hretlang vek ang. District Capital meuh kawngpui atan chuan a lungawi thlak lutuk loh. Nikum lawk khan a tam zawk hi chu PWD te khan an repair niin ka hria. Mahse fur khat kan han paltlang a tuna kan hmuh ang hi a ni leh si a, a beidawnthlak hle mai. Tiang hian ngaihtuahna a hman theih deuh hial ta mai : Mipui lam chuan kawngpui tha tak neih reng hi kan duh a, mahse a siamtu lam chuan tha vaklo a siam a siam leh ngai thuaia awmtir hi an tum pawh a ni mai thei. Sum siamna awlsam atan an hmang ve duh pawh a ni mahna, kan hriat phak a ni ve tawh si lova. A mipui nawlpui ina kan hriat theih chin chu kan kawngpui hi a tha lo hle tih chauh a ni.

            Khawtlang hruaitute leh VC lam te pawh hian hei hi kan vei a tul khawp mai, kan kawngpui a that loh avang hian kan khaw paltlang a tlan thin Motor dang leh Sumo tam tak pawh hian kan khaw lama tlan hi an hreh hle tawh a ni, hei hian sumdawnna kawngah pawh harsatna min siam tan ta. Hawh u kawngpui tha hi mipui te hian nei turin kan khawtlang hruaitute hi i kaiharh hlawm teh ang u.

3. Cultural Centre: Serchhip hi Mizoram laili taka awm kan ni kan tih tawh kha. Mizoram History a tana hmun pawimawh tak tak pawh kan nei nual mai, a District huap ang phei chuan Mizoramah a nei tam ber kan ni hial mai thei. Mahse town huamchhung bik hi sawi dawn ta ila, Sailo lal hmingthang Lalpuithanga Lungdawh chu kan khaw bul lawkah a awm a. Tin kan khaw hluiah Mizo te tana pawimawh em em mai Mary Winchester(Zoluti) laklet lehna  hmun kan nei bawk a. Mizo zawlnei ropui Pastor Chhawna khua kan ni bawk nen! Heng khualzin hip thei tur ang chi hmun pawimawh kan neih te hi kan humhalha kan tihlar thiam a tul hle.

            Tin, Serchhip a awm thei se tha deuh tur ni a lang chu Cultural Centre siam hi a ni. Aizawl khawbul Tuirial kamah Ramhlun YMA ten ‘Zo khua’ an din a, tlawhtu an thahnem thei hle. Tin Falkawna Mizo khua te pawh tlawhtu an tam theiin video shooting neih nan pawh hman lar ber pawl a ni. Chutiang chuan Serchhip ah pawh hian kan Mizo pipu leh hunlai a mi ang tur khan Zo khua te hi din ve ila, Mizo mai bakah hnamdang khualzin te hipna tha tak tur a ni ang. Chumi atan chuan Kawlri leh Entlang vel bawr, ka khaw hlui khi hmun remchang tak tur a ni ang. Kawlri hmunah khian Zo khua han din ila, chutah chuan khualzin riak duh te tan riahna tur building tha tak awm nghal bawk se. Tin, hmanlai Mizo pipu te sulhnu dahthatna tur Museum te pawh han awm thei nghal se la. Chu chuan Mizoram mai bakah rampawn atang pawhin khualzin tam tak a hip theih phah ngei ang. Mizoram hmun laili tak kan nih bawk avang hian tuna rawtna khian Zoram chhim leh hmar ami te a hipkhawm theih fu a rinawm.

4. Kan chhehvel khuate nena inkalpawhna: kan District chhunga khaw awm tam zawkah hian ka zin tawh a, tin Mizoram District danga khaw hrang hrangah te pawh ka zin kual nual tawh bawk a. Chuta ka thil hmuhchhuah pakhat chu kan District hian kan chhehvel khua te hi kan pawh lo hle tih hi a ni. Serchhip hi District Capital kan ni a, kan awm tawp a, kan District huamchhunga khaw dangte nen hian kan inpawh tam lo hlein a hriat. Inkalpawhna kawng a chhe em em a, tin chhehvel khua a kal turin motor han chuanna mai tur a buaithlak bik em em bawk. Kan chhehvel khua te tan pawh kal chakawm lo khawpin inkalpawhna hi a buaithlak a ni. Chuvang chuan kan chhehvel khua te kan District a bei nghet/tlangnel tura kan hip theihna tur chuan inkalpawhna leh motor service tha tak hi a awm a ngai a ni.

            Champhai District-ah chuan an District huamchhunga khaw awmah chuan a tam zawk chu Bus leh Sumo a service deuh vek a, hei hian khaw tlawhpawh a tih awlsam phah hle. Chutiang chuan Serchhipah pawh hian kan chhehvel kalpawh zung zung theihna tur motor service te hi awm thin sela chu tun ai hian kan khua hi a pui lehzual ngei ang. Tin, Town Bus pawh hi Hmarlam hawi ringawta tlan lo hian chhimlam, Sailiam thleng tal saw chuan regular takin tlan thin sela mipui te tan pawh a awlsam phah deuh zawk a rinawm.

5. Kuthnathawktute tan Cold Storage kan mamawh: Serchhip khua hian thlai thar lamah hma kan sawn hle a, a bik takin thlasik thlai kan tih ang chi antam, bean, zikhlum etc. te hi ka ram leilung in a zir bawka kan thar tha tlangpui. Amaherawhchu a hralhna lamah hian mumal taka kalpui a awmloh avangin thlai chingtute kan ti beidawng fo thin. Sailiamah sawn Cold Storage tha deuh mai tlemlai deuh khan sak zawh a ni a, amaherawhchu a thar tirh atangin a khawl lam chian kuanloh avangin a hman theih loh nghal a ni awm e. Pawisa tam tak senna anih tawh avangin hman theiha han siamthat nghal mai awm tak kha tun thlengin hmantheih lohvin an dah ta mai mai a, tunah chuan Dept lamin lei tha chhekkhawlna hmun atan an hmang ta ringawt a ni awm e. A pawi hle mai. Siamtha tura nawrtu leh sawiseltu mipui lamah kan awmloh avangin thuneituten an mangnghilh pawh a ni mai thei.

            Hei hian kan kuthnathawktuteah beidawnna a siam a, chu chuan thlai tharchhuah dahthatna leh tih riralna mumal a awmloh avanga tharchhuah tam tur ang tharchhuah theih lohna a hring a ni. Cold Stogare mumal tak hi kan neih ngei a ngai, kan thlasik thlai thar te hi chhe mai thei, rei tak vawnthat theihloh anih avangin khawl hmanga vawnthatna hmun nei ila chu kuthnathawktute hi kan tiphur ang a tun ai hian thlai pawh kan khua hian kan thar tam ngei a rinawm.

6. College ram chhunga vantlang kawng awm hi: Kan College neihchhun Govt Serchhip College saw khawtetlang kawnga awm a ni a, zirna in te anih avangin fianrial leh mipui tlawhpawh tam loh deuh laia a awm a tul hle. Khawtetlang DC Complex leh sawlai vela kal tur sawn College Campus an kaltlang reng a ngai a, chuvang chuan College saw a inhung bik thei lova, hei hian a thawktute leh zirlai lamah harsatna a siam fo thin niin a lang. Pu K. Lalthanliana(L) Principal hunlai khan Khawtetlang panna kawng hi College kaltlang lo zawng hian a thlang deuhah kawng zawn a ni a, engemaw chen chu laih a ni tawh nghe nghe. Mahse tun thlengin hman a la ni lova, hei hi thuneitu leh a awmna hmuna khawtlang hruaitu ten kan ngaihven a hun hle. Kan College campus hmun nuam tak saw hlut thiam ila, humhalh thiam ila kan venhim sak thiam a tul a ni.

            Chuti anih loh chuan Aizawla Pachhunga University College-in a tlemlai deuha buaina an tawh ang kha kan la hmachhawn ve lovang tih a sawi theih loh. Chuvang chuan helai hmuna vantlang kawng tlang ruih mai hi a bulhnaia kawng remchang tak awmsaah hian sawndan ngaihtuah nise a tha hle ang.

            Sawitur chu ta tak a awm thei ang, kan ram hian Politics diklo takin kan kalpui mek a, Party system in kan ram a eichhe mek a, hei vang hian hmasawnna tur tam tak pawh hi Politics game a kan hnuhluh avangin a nih tur  angin hmalak a nilova tih khawtlai a ni fo thin. Hetah tak hian mipuite hi kan fin thiam a, kan tanrual thiam a ngai. Hawh u, thiltha leh dikna duhtu te hi tangrual ila Serchhip khua hi khaw nuam takin i siam ang u. Together we can make a Change!

-          Laldinpuia