Pathian lawm tlak rawngbawlna

Josua 24:14-15, Rom 12:2, Matthaia 7:21-23

* Tu rawng nge kan bawl?

            KTP member, Pathian rawngbawltu ni a inchhal te hian tu rawng nge kan bawl? Pathian rawng kan bawl alawm kan ti mai thei, mahse kan biak Pathiana hi kan hrechiang teh meuh em? Eng ang Pathian nge kan biak hi? tih hi kan inzawhna tur pawimawh tak a ni. Kan rawngbawlsaka hi kan hrechiang em? Kan biak Pathiana hi eng ang mi nge ani tih kan chiang meuh em? Mahni biak Pathian pawh hre chianglo tan chuan rinawm taka amah zui chu a har viau dawn a ni. Mahni biak Pathian hre lo chuan a thu zawm dan tur a hrelo ang a, sualah a tluk leh tlukloh pawh hrelovin a hriat miahlohin Pathian pawi nasa takin a khawih thinin ka ring.

            Thuthlung hlui hunah pawh khan Mosia leh Josua hunlai khan Israel fate khan an biak Pathian, Aigupta ram ata hruaichhuaktu kha an hre chiang lova, an chhehvela hnamdang te, Amor Ho te, Hit ho te, Edom ho te Pathian nen an khaikhin kual vel mai mai a, an lunglen chang changin an hmuh hneih hnai ber Pathian kha an be vel mai mai niin a lang. Chuvang chuan Josua chuan, Pathian thuneihna leh hlauhawmna te, a thiltihtheihna te hrilhin tu rawng nge in la bawl cheu dawn? a ti a ni.

* Khawvel dan

            Tirhkoh Paula chuan ‘he khawvel dan ang hian awm suh u’ min ti a. He ta Tirhkoh Paula thusawi hi he khawvel inrelbawlna dan (constitution leh fundamental duties) zawm loh lam a kawk lo tih kan hriat a tha. Hmasang Juda te hunlai chuan hun hi chi hnihin an then tawp a, tun hun leh nakin hun. Tun hun hi hun tha lo leh sual niin an ngai tlangpui. Chuvang chuan an hunlai kha thlir ila Rom sawrkar in a awplai chuan Kristian tihduhdahna nasa tak a thleng a, sakhaw thil tihbawrhban a ni a, Pathian rawngbawltu leh chanchintha puangtute tih retheih an ni a, khang zawng zawng te kha Pathian mite ngaihah chuan he khawvel dan a ni.

            Tunlai ringtute hunah chuan he khawvel dan  kan tih chuan ‘ sual tura thlemna’ hrang hrang te hi a tih theih ang chu. He khawvel sualnaah hian tlulut velo turin ringute hi Pathian chuan min duh a ni. Khawvel miten tha an tih hi Pathian mithmuhah a bawlhhlawh thin a, chuvang chuan he khawvel dan a awm lova Pathian duhzawng leh lawmtlaka awm turin KTP member te hi kan inbuatsaih a ngai hle a ni.

* Enge Pathian lawmtlak chu?

            Tirhkoh Paul vek hian ‘Unau te u, ka awmdan zir tute lo ni rawh u’ a ti a, a chhuanawm hle mai. Min entawn rawh u, titu rawngbawltu chu a chhuanawm hle mai. Keini zawngin kan thusawi tam ber chu, ‘kei chu engmah ka ni lo, entawn tlak ka nilo, keimah ni lovin Pathian lam en rawh u’ te kan ti a, member hla te tan chuan thusawitu en lova hmuh theihloh Pathian entawn chu a har khawp ang. Mahse Tirhkoh Paula a hunlaia dan kherkhiap ber mai Pharisai dan hremi, kohhran tiduhdah thintu leh dan lama sawisel bo ni a inchhal chuan a pianthar hnua a rawngbawlna chu fak tlak a ti a, a tihdan chu zir turin min duh a, a rawngbawlna chu engtiang chiaha ropui leh Pathian lawmtlak nge maw a nih bik le?

            Philippi 4:11-13 naah chuan Tirhkoh Paula chuan ‘Ka tlakchham thu sawi zawng ka ni love; kei zawng eng ang pawhin awm mah ila, lungawi zel ka ching tawh si a. Tlawm taka awmdan ka thiam a, hausaa awm dan pawh ka thiam bawk a; thil tinrengah leh thil zawng zawngah tlai leh riltama awm dan, hausa leh tlachhama awm dan thuruk chu ka hre chhuak tawh. Mi tichaktuah chuan engkim ka ti thei a ni’. a ti. Hei hi Pathian lawmtlak rawngbawlna chu a ni.

            KTP member te hian Pathian lawmtlakin rawng i bawl ang u. Chumi ti thei tur chuan lungawi zelna nun nei ila, thil zawng zawngah a chin tawk hria ila, thinrim leh inhrosa chunga rawngbawl lovin tlawm takin, midang ten min sawichhiatnaah pawh zawhdawhna leh hmangaihna nena hnehtu i ni zel ang u.

* Lalpa, Lalpa ti nazawngin vanram an thleng dawn lo

            Lalpa, Lalpa ti nazawng hian Vanram an thleng dawn lo. Pathian duhzawng leh lawm tlak titute chauhvin Vanram hi an thleng dawn. Thahnemngai taka kan rawngbawlna te, kan inkhawm na te, KTP a kan hnatlanna te hi Pathian lawm zawng lo ni zel sela. Hei hian Vanram min hnaih tir zel rawh se. Pathian hminga kan tawrhna te hi Pathian lawm zawng anih loh chuan Vanram min hruaithlengtu tur a ni chuang lo. Chuvang chuan rawngbawltute hian tih mai mai a rawngbawl lovin kan phaktawk zelah hian tihtak zetin Pathian rawng i bawl ang u.

            Pathian lawmtlak rawngbawlna hi ngai pawimawh ila, mihring mawina leh thahnem ngaihna ai chuan kan rawngbawl chhan Pathian duh dan a ni angem tih hian thunei zawk rawh se. KTP te hian kan rawngbawlnaah hian tihtak zeta Pathian lawm tlaka rawng kan bawl theih nan tun atang hian hmalam panin i kal zel ang u.

-         Laldinpuia

(Ni 22.01.2018 Zan KTP Inkhawma ka thusawi)