Good Friday@Cancer Hospital, Zemabawk

    Vawiin hi Good Friday a ni a, khawvel hmun hrang hranga Kristian te chuan urhsun takin kan lawm hlawm a. India ram hotu ber Pu Modi-a'n thiam takin programme dang Kristian te hunpui tihbuai tumin han duang mahse, huaisen taka dodaltute azarah a thupek sut lehin Mizoram pawhin hlim takin Good Friday kan hmang thei a, a lawmawm hle. Hetia Kohhran hoten Lal Isua tuarna tawmpuia Biak Ina urhsun taka hun an hman lai hian kei chuan Zemabawk lama CANCER HOSPITAL-ah Cancer natna vei te tawrhna ka va hriatpui ve thung a!
    Zemabawka Cancer Hospital kan neih saw Cancer vei te tan chuan a lo hlu hle mai. Saw hmunah sawn mi chi hrang hrang an lokal khawm a: A then te chu chhungkaw enkawltu ber, chhungkuaa hotu ber pa ber anni a, a then nu ber anni a, a then te chu fasen te te nei lai an fate rawn kailut chunga lokal an ni a, a thente chuan hmeichhe la naupang tak, an pasal ten an rawn kaihluh tak te pawh an awm a. An vai mai chuan natna tihbaiawm tak CANCER in a taksaa hmun a khur te an ni hlawm a. Cancer natna hi engtiang chiaha na nge tih hi a la veilo tan chuan sawi mai theih a ni lova, damdawi lam thiamna neilo tan chuan enge a hlauhawm dan pawh kan sawi thiam lo. Mahse ka hriat ve dan tlanglawn ber chu, 'Tihdam theihloh natna', a damna tak tak tun thlenga la hmuhchhuah loh natna a ni tih hi a ni.


    A hming ringawt pawh hi mi tam takin an tih pawh hi thil awmlo a ni lem lo. He Cancer Hospital-a awm te tan chuan cancer hi thil thar a nilo, nitin Chemotheraphy la an inkal chhawk tluk tluk a, hmelhriat leh hriatloh an ngai pawimawh lova, he hmuna awm te chuan inpawh takin an titi ho thei vek a ni. Enge i natna? tih zawhna an dawng ngai lova, 'I eng lai nge Cancer?' tih chu an zawhna zawh lar ber a ni. He hmuna awm te hian a tam zawk chuan hlim takin an natna chu an dawngsawng a, a lokal thar te erawh chu an hmel a nguiin a hmuh a hreawm thin hle. An inhnemna tawngkam ber chu, 'Tikhan Chemo i khai anga nakin lawkah i dam tha mai ang, hlau thawng reng reng suh' an inti a, mahse an rilru chhungril takah erawh chuan dawt an sawi tih an hre reng si! A natna veitute hi an beidawng a, mahse he hmunah chuan beiseina in thla a zar thung. An natna tuar ve dang nena an titi a an inkawm thei hi an tan a hlu a, chu chuan an na tawrh mekah nasa takin a chhawk niin a lang. Chuvang chuan he hmun hi Cancer vei te tan chuan hmun tha leh hahdamna hmun a ni. Helai hmun hi Cancer vei te tan chuan thlamuanna leh hahchawlhna, beiseina hmun anih laiin mi dam tha pangngai tan chuan beidawnna hmun a ni thung niin ka hria. A cancer vei ten, beisei takin chemo an khai laiin anmahni awmpuitu a dam tha lai a zawkte chu kan mangang a, 'Engtikah nge a dam ang?' tih ai chuan 'Engtik thleng nge Chemo kan lak theih ang, engchen nge a natna hian a daih ang a, he chemo hian eng chen nge a nunna a pawhsei theih ang?' tih chu kan rilru a zawhna awm a ni.
    He hmuna ka awm lai hian dam hlutzia ka hrechiang lehzual a, insawiselna em em nei lova hlima taka awm man to zia ka hrechhuak a. Mahni hmasialna avanga midang te chhiatna tur zawnga hma la thin te, diklo taka sum eiru leh chheprelh thin te leh Pathian rawngbawltu nihna duh avanga an rawngbawlpui te hek a sawisel thin ten an hmuh veloh hlimna leh thlamuanna ka chhar chhuak a. He hringnun hlutzia te, kan damchhung reilo tea nunkawng chhukchho kan zawh naa nitin a ke pen chheh dan tur kawng thar pawh min hmuhtir a ni.
    Hei hi tun tum Good Friday-a ka chharchhuah thlamuanna chu a ni.

- Laldinpuia 14/4/2017