State Bank-in ATM hman man a tisang leh dawn

Consumer te i harh ang u - X

            India rama Bank lian ber leh Customer ngah ber State Bank of India te chuan tunhnaia Service Charge nasa taka an tihdanglam hnuah, tuna Service Charge an hman mek hi ennawn lehin June 1, 2017 atanga hman turin Service Charge thar lak a ni dawn.

            He Service Charge lak thar dan tur hi hetiang hi a ni ang – ATM atanga pawisa lakchhuah(withdraw) reng rengin vawikhat lakchhuahah Rs 25/- zel a in cut tawh dawn a ni. He charge hian ATM Card RuPay Classic Card hmangtute erawh a huam lovang. Tunah hian State Bank ATM atang hian Account pakhatin thla khatah a thlawnin vawi li(4) pawisa a lachhuak thei a, vawi li aia tam ATM atanga pawisa lakchhuah a nih chuan Bank Counter atanga lakchhuahin rs 50/- + Service Tax, State Bank ATM Booth atanga lakchhuahin Rs 10+Service Tax leh Bank dang ATM Booth atanga lakchhuahin Rs 20+ Service Tax chawi zel a ngai tawh ang. Heng pawisa chawi tur te hi khawlin kan Account a kan balance awmsa atang khan a lo cut mai dawn a ni. Hetianga ATM hman atanga chawi a awm takah phei chuan tum lohvin kan pawisa hi a incut  zel dawn tihna a ni a, chuvang chuan mipui te tul lova pawisa lakchhuah leh ATM atanga kan lak kan lak thin hian kan fimkhur loh chuan kan account atangin pawisa kan chawi zel dawn tihna anih chu.

            Pawisa lachhuak lova, ATM emaw Green Channel emaw Internet Banking kaltlanga fund transfer kan siam erawh chuan chawi a tlem thung. Rs nuai 1 chinah Rs 5+ service tax chawi tur a ni a, Rs nuai 1 atanga nuai 2 chinah Rs 15+ service tax chawi a ngai bawk ang.

            State Bank hian kumin April 1, atang khan Service Charge thar an hmang a, hei hi mi tam takin kan ka hre tawklo hle a, chutih lai chuan an Service charge thar hman mek hi tidanglam leh nghalin tunah hian ATM hman man hi an rawn tipung leh ta a ni.

            Hetianga India rama Bank lian ber State Bank tena Service Charge leh Cash handling charge an rawn la chiam mai hi, Modi-a sawrkar a Cashless Transaction promote na chikhat ni a ngaih theih a ni a. India ramah hian pawisa lem a tam em em mai a, tunah pawh hian Rs 2000/- note lem hi hmuh tur a awm leh teuh tawh mai a, chuvang chuan sawrkar hian dan lova pawisa lem siam thin te ven nan leh India economy dinhmun chawikanna atana pawimawh ber ni a a ngaih angin Cashless Transaction hi an kalpui ta chiam niin a ngaih theih. Nikum November 8 zanlai atangin India Prime Minister Narendra Modi-a chuan India rama Rs 500 leh Rs 1000 a ti thi thut mai a, kha ta tang khan mipui kuta pawisa hi a tlem thei ang ber dah tumin Cashless Transaction an promote nasa hle a, sawrkar transaction zawng zawng te pawh Cashless hmanga tih vek a nita a, tin mipui lama pawisa leh subsidy pek thin te pawh Cashless vekin Bank transfer kaltlang a buaipui a ni ta vek a ni.

            He Cashless Transaction hi awlsam zawka India mipui ten an hman a, an kalpui theih nan Dec 30, 2016-ah khan Prime Minister Modi-a’n New Delhi-ah Mobile Phone Application thar Bharat Interface for Money(BHIM) tih chu a lo release tawh bawk a, he Mobile Application hi a hmang thiam tan chuan a awlsam hle a, awlsam taka pawisa inthawnna atan a tangkai hle.

            Kan hriat angin tunlai khawvel a changkang tawh a, thil thar a chhuak thut thut a, heng dan thar leh thil thar te hi a kalhmang hria tan chauh a siam a ni lova, India ram mipui zawng zawng nghawng nghal thei anih thin avangin mipui ten kan hriat chian a, kan lo belhchian ve hi a tul hle a ni. Consumer te hian kan ram kalphung thar leh tihdan thar te hi belchiang ila, keimahni hamthatna leh kan dinchhuah nan hman tangkai i tum theuh ang u.

- Laldinpuia

Secretary, Serchhip District Consumer Association