Engzat nge Lalpa tan kan sengkhawm ve?

Khawvela thuhriltu lar leh ropui Billy Graham-a chuan kum 99 mi niin Feb 21, 2018 khan Chatuan ram a lo pan ta a. Amah anga Pathian thuhriltu lar hi khawvel mihring zingah an la piang leh lo niin an sawi thin. Billy Graham-a khan kum 1947-2005 chhung khan khawvel hmun hrang hrangah zinin Lal Isua chanchintha hrilin Crusade a nei thin a, khawvela mihring piang tawh zinga Lal Isa chanchin midangte hrilh hnem ber a ni a, a crusade kaltlangin khawvel mihring maktaduai 215 zet hnenah Lal Isua chanchintha hi a hrilh hman a ni an ti. A rawngbawlna avangin thlarau bo mi maktaduai 3.2 ngawt ten Lal Isua chhandamna an neih phah bawk. A thih hlim khan a fapa Franklin Graham-a chuan Twitter-ah tihian a sawi, “Tumkhat chu ka pa hnenah “Vanram hi khawiah nge a awm?” tiin an zawt a, ani chuan, “Vanram chu Isua awmna hmun a ni a, chu hmunah chuan ka la kal thuai dawn a ni”. Ka pa chuan tukin zing khan he khawvel hi chhuahsanin kum 80 chhung zet a rawng a lo bawlsak Lal Isua, khawvel chhandamtuin chatuana atana a hmun buatsaihah a kal ta” tiin.

Tumkhat chu interview an neihah, “Vanram a i thlen leh thlenloh turah in rinhlehna te i nei ve thin em?” tiin an zawt a, Billy Graham-a chuan, “Keimah lamah ka innghah chuan nei ve tehreng mai, vawi tam tak ka inringhlel thin. Mahse keimaha innghat lovin Bible thuah ka innghat a, ka mihring thatna avangin Vanramah ka kal dawn lova, mitam tak hnena Lal Isua chanchin ka hrilh avangin Vanramah ka kal dawn lova, Lal Isuan Kros-a min tuarsak tawhna avang zawkin Vanramah ka kal dawn a ni” a ti.

Keini Mizo Kristian te hi enge kan dinhmun ve le, Kohhran a kan rawngbawlna te hi han inenlet ila, engtiang chiahin nge Lal Isua tan thahnem kan lo ngaih a, a rawngbawl hna hi kan lo kalpui thin? Kum chuti zat rawng ka bawl tawh, Kohhran/thalai hruaituah kum chuti zat a zawnin chanvo ka chelh tawh tih te hi em ni sawi tur kan neih chhun le?  Billy Graham-a atang hian ringtute hian zirtur tam tak kan nei. Kum 80 chhung zet thuhrilin rawng a bawl a, a rawngbawl chhung hian chawhrualin nitin thlarau bo mi 110 vel zel Lal Isua ke bulah a hruai a ni. A va ropui em!

Sawi tur kan va nei ve ta lo em! Kum engzah nge Kohhranah ka tel tawh? KTP rawngbawlnaah ka tel tawh? Chutih laiin kumtin member hla/thlarau bo engzah nge Lalpa beram huangah ka sengluh ve tawh? Kumtin sual bawia tang kan chhehvelah an pung mek zel zawk em ni? Rawngbawltu theuh te hi he Darthlalangah hian han inen ve teh u, sawi tur a vang, thawh tur kan va ngah si em!

Sawi mai a tawk ta lo, sawitam aiin thawh tam hun a ni e. Kan awka chauh nilovin kan nun leh chezia nen Lalpa chanchintha hi kan hril a hun ta a ni. Pathian mi Rev Billy Graham-a nun atang hian rawngbawltute hian zirlai pawimawh tak kan nei a ni tih hriain kan chhehvela ringtu tluchhe mek te chhanchhuak tur hian theihtawp i chhuah thar leh ang u. Engzat nge Lalpa tan kan sengkhawm ve? tih hi kan rilrua zawhna awm reng, a chhanna keimahni thawhchhuah tur lo ni theuh rawh se.

-          Laldinpuia  21-02-2018