Pope Francis(Jorge Mario Bergoglio) hi tunge anih?

    Khawvela an member mi tluklehdingawn 1.6 te hruaitu leh hotu ber tur thlang tura Roman Catholic Kohhran thuneitu Cardinal ten pindan chhungrila an inkharkhip ni hnihna March 13, 20130-ah Rome-a Sistine Chapel atangin meikhu var tihchhuah a ni a, hei hian Roman Catholic Kohhran te chuan Pope thar an nei ta tih a entir a ni. Hemi veleh hian St. Peter Square-a mipui sang tam tak pungkhawm te chuan rimawi hrang hrang ten an Pope thar chu an lo lawm nghal a ni. A hma lawka Pope nilai Bendict XVI taksa lam hrisellohna avanga a chawlh hnuah Roman Kohhran te chuan Pope thar Pope Francis, kum 76 mi chu lungrual takin an thlang chhuak leh ta a ni.

Tunge a nih?
    A hming tak chu Jorge Mario Bergoglio a ni a, December 17 1936-ah khan Argentina khawpui Buenos Aires hmunah lo piangin a pa chu Mario Jose Bergoglio a ni a, railway a thawk thin a ni. A nu hming chu Regina Maria Sivori a ni.University of Buenos Aires atangin Chemistry-ah Master Degree a zo a, kum 21 mi a nihin puithiam atan hian a inserh hrang tan a ni.
    Kum 1969-ah puithiam atan nemngheh a ni a, kum 1998 atanga 2013 thlengin Buenos Aires-ah Archbishop hna a thawk a, Pope John Paul II khan kum 2001 ah Cardinal ah a dah a, kum 2013 March 13-ah Pope Benedict XVI thlakin Pope a thlan tlin a lo ni ta a ni. Pope Francis-a hi Jesuit puithiam Pope ni hmasa ber leh America mi leh sa Pope atana thlan hmasak ber a ni. Syria mi Pope George III kum 741AD a borla ta hnu lama European mi nilo Pope dinhmun chelh thei hmasa ber a ni bawk.

Roman Kohhran hotu leh Vatican roreltu
    March 13, 2013-ah Pope atan thlan tlin a ni a, amah hi Roman Kohhran-a Pope 266-na a ni. Bergoglio hian Roman Catholic Kohhran hotu lu ber nihna a chelh rual hian Vatican City State a hotu ber nihna a chelh tel nghal a ni. Bergoglio hian a Pope title atan hian Francis tih a thlang a, hei hi mithianghlim Francis of Assisi hriatrengna atana a thlan a ni a, a chhan chu mithianghlim Francis-a hi mirethei te hmangaihtu anih vang ani tiin Vatican thupuangtu chuan a sawi. Francis tih hming hi Roman Pope te hian an hman vawi khatna a ni.

Mite hmangaihtu
    Bergoglio hi February 2001 khan Pope John Paul II chuan Cardinal-atan a nemnghet a, Pope John Paul II a thih pawh khan Pope ni mai thei tura rinkai zingah telin kum 2005 a Pope thar tur Cardinal ten an thlan tum pawh khan a tel ve bawk a. Inthlannaa Pope Benedict XVI thlan tlin anih pawh khan amah hnaih bertu zingah Bergoglio hi a tel niin sawi a ni. Pope John Paul II vuinaah pawh khan a tel bawk.
    Bergoglio hi Cardinal atana dah anih hnuah pawh hian miten a chanchin an hre lar hle a, a mihring inngaihtlawmna te, kohhran humhalh leh siamthat a tum dan leh rorelna dik kenkawh a tum danah te mite hriat a hlawh hle a. A nun hman dan tlawm tak mai chuan mite rilru a hneh hle a, bishop ho chenna lal inah pawh cheng duh lovin in te tak teah a khawsa zawk thin. Car manto leh changkang tak takah pawh chuang duh lovin vantlang veivahna angah hian a kal ve mai thin. Amah hi inngaitlawm tak mai anih avangin Bishop ho an inhmuhkhawm pawhin tlar hnung lam a chuh hram hram thin niin a chanchin ziaktu Sergio Rubin chuan a tarlang bawk.
    Bergoglio hi neih inang inkawp(gay marriage) duhlotu te zing ami a ni a, kum 2010 a Agrentina sawrkarin gay marriage a pawmpui dawn pawh khan a duhlo langsartute zingah telin mahse kha dan kha kenkawh tlang a ni ta tho a ni.

- Laldinpuia