Chapchar kut hi

    Mizo ten Kut kan neih pathum - Mim kut, Chapchar kut leh Pawl kut zinga Mizo rilru luah bertu Chapchar Kut chu kan lo thleng leh dawn ta reng mai a. Chapchar Kut hi Mizo tena kut kan neih hrang hrang zingah chuan a nuam fal lawr lak pawh ti ila kan tisual awm love, tunlai thlenga kan chinchhoh zui tak zel awmchhun a ni. Kut dang Mim kut leh Pawl kut te hi chu tunhnaiah hian han tharthawh leh thin bawk mah ila Chapchar Kut angin miten an hlut tawh lo niin a lang. Hetih lai hian Chapchar kut erawh tun thlengin kumtin hman a la ni ta ziah a, tun thlengin Mizo ten kan la hlut em em a ni.

    Hetih lai hian Chapchar Kut kan hman dan phungah hian sawi duh tlem ka neih chu kan hman thin dan mawlh hi a ni. Chapchar Kut hi Mizo Traditional kut diktak a ni a, Mizo ten kan pi leh pu te chindan leh zia kan phochhuah theihna hun remchang ber a ni bawk. Chuvang chuan tunlai thangthar khawvelin min chiahpiah mek lai hian kan pi leh pute rilru ang leh kan hmanlai hun tarlang thei zawnga kan hman thiam a pawimawh hle a ni.

   Kan khawvel a changkang chho zel a, hemi rual hian phak leh phak lovin dingdihlip chungin Zofate pawh hian hmasawnna leh changkanna hi kan ban ve rawk rawk a, chumi rual chuan kan hnam ziarang kan phochhuah theihna hun remchang ber kan Chapchar Kut pawh hi kan her danglam hret hret mek niin a hmuh theih a. Hei hi a tha lo hle in ka hria. Thangthar te rilruah chuan changkang deuh a, sound system tha tak hnuaiah rik deuh bung bung kha kan rilruah a awm pawh a ni mai thei. Mahse he Kut kan hman ina a tum ber erawh hi chu kan ngaihtuah chian a hun ta hle mai.

   A bik takin kan khawpui ber Aizawl lamah hian an hmandan hi sawisel tur tam tak awm mahse a lungawi thlak rih viau chuan a hriat, kan ram hotu ber kan Chief Minister Kut pa a kan hman pawhin timna nei hauh lovin puan a veng mai a, a ngaihsanawm khawpin ka hria. Chutih laiin District Capital danga an hmanna TV a han hmuh hi chuan rilru a khawih thin khawp mai. Kut Pa a kan hman te foreign Coat suit nen an induang han hmuh te, a organising lam pawhin kekawrtlawn ha a, Mizo puan a hming leka an bat ve de de chauh han hmuh hi chuan kan hnam ziarang hi kan tlan bosan nasa ta hle tih a hmuh theih. Khawpui ai mah hian thingtlang lam hian Chapchar Kut kan hman danah hian inenfiahna tur kan ngah niin ka hria. Hnamdang thawmhnaw siamchhuah nalh tak tak nen induangin a changkang thei ang berin awm mah ila he Kut niah kher kher hi chuan mi mit kan la lem lo tih hi kan hriat a tha khawp mai. Chu ai chuan a Mizo thei ang bera kan awm khan kan hnam kan chawisang a, kan hnamzia kan zahpui lo tihna a ni. Kuminah pawh hian Mizoram hmun hrang hrangah Chapchar Kut hi kan hmang leh ngei dawn a, District thenkhat chuan an hmandan tur te pawh chipchiar takin an rel tawh ang. A buatsaihtu lam te hian hei hi kan rilruah awm se ka duh khawp mai. Chapchar Kut hi Mizo te kut a ni a, Mizo taka hman tur a ni tih hi.

    He Kut hi kan Mizo pipu te nundan leh an chindan hrang hrang te thangthar leh kan naupang zawkte hrilh hriatna hun remchangah hmang ila, zaithiam lar zaitir a sound system changkang tak nena tih bung bung lam kha ni lovin a Mizo thei ang berin, hmanlai culture kha a theih chen chenah thangthar te mithmuha entir chunga he Kut hi kan hman thin a pawimawh khawp mai. Chuvang chuan Chapchar Kut kan hman dan hi kan inenfiah deuh a tulin ka hria. Tunlai changkanna nena hmehbel tum vak emaw, tih changkan vak emaw chi a ni lo. Kan Mizo Kut a ni a, Mizo takin kan pi leh pute hunlai a an hman dan ang khan hmang ila a mipui nawlpui rilruah he Kut hi a hlu zual sauh ang a, hnamdang leh ramdang mi tan pawh en chakawm tak a ni ngei ang. Tunlaia kan hman dan hi chu hmanlai si, changkang si a ni deuh berin ka hria. Kan hotute, kan khawtlang hruaitute i harh teh ang u, kan hnam nun a boral mek anih hi.

- Laldinpuia

17.2.2013