Eng huna ding nge kan nih?

"Zan hi a ral lek lek tawh a, khua a var dawn ta e"

    Tunlaia kan khawvel hun tawng hrang hrang te, boruak inmun mek te hi han thlir ta ila, eng huna ding nge kan nih tih hi inzawh kher ngai lovin a hriat theih mai awm e. Khawvel ina kan huntawng mek langrual zual pahnih khat chauh i han tarlang teh ang.
    Mizoramah chuan Korean film a lar em em a, Korean film-a a changtute mize entawnin kan thalaipui(a bikin mipa) tam tak chu tuai(homosexual) ah an inlet mek a. Kan hmeichhe lam lah chuan Korean film-a a changtute vun ngo ang put duhin vun ngo na atan tiin damdawi an ei a, an muhlum phuk phuk mai bawk a. Ruihhlo avangin kan thalai naupang te te ten nunna an chan zut zut reng bawk a. Mizo dana awm nem zawka kan ngaih thin kan hmeichhe tleirawl te chu tunlaia kan rama kan buaipui ber sual khawihtu an ni ta tlat mai. Hmeichhia in mi in an rawk a, an hal a, mi motor an ru a, mi pawisa a ruksak bawk a, a rapthlak hle mai.
    Khawvel hmun dang thlir ila, America leh United Kingdom ramah chuan Kristian tena kan huat em em mai, neih inang inkawpna 'Gay Marriage Bill' chu an pawm rup mai a. Mawngkawhur leh patil te chuan zalen takin tual an lengin inneih an sawngbawl thei tawh dawn a ni. Nikum a America President inthlana Barrack Obama thlan tlin nawn a nih leh chiahah khan mawngkawhur te chuan zalen ta angah inngaiin an huangtau hle a, a tlin zan la la khan US a state 3-ah chuan Gay Marriage Bill an kaltlangpui tur thu hi an puang nghal nghe nghe a ni. Hetih lai hian United Kingdom Parliament chuan Feb 5 khan an rorelna sang House of Commons ah an sawiho chiam hnuin member 400 atanga 175 in an duhlo chungin a duhtu lam an tam avangin Gay Marriage Bill hi hman turin an lo remti tawh bawk a ni.

    Middle East lam lo thlir ila, Israel chuan kumin January khan inthlanpui an nei zo chauh va, an Prime minister thar Benjamin Netayahu chuan Iran chungchang chu ngaih pawimawh hmasakah neiin tunah hian Iran do turin tan hmun an siam ru mup mup reng tawh bawk a ni.
    Khawchhak lam thlir ila, tun hnaiah khan China Indo lawng, a tum tak kapfu chat chat thei chu East China Sea (Japan leh China sawrkar ina an inchuh mek Senkaku-Diaoyu Island vel)-ah hmuh a ni a, heng indo lawng te hi indona hmanraw bikah lo chuan tuipuiah hian tirh zen zen an ni ngai lova, hei hian Japan leh China inkar boruak a ti thalo hle a ni. Hei vang hian Japan chuan tuipui, boruak leh khawmual veng turin a sipai te a inralrin tir nghal nghe nghe.
    Heng lo pawh hi tunlai khawvel thil thleng danglam leh maksak tam tak a awm, heng hi a entirna ang chauh a ni ang. Heng tunlaia kan chhehvela thil thleng mek leh inmun mek te hi han ngaihtuah ta ila, Kristian te hian eng huna ding nge kan nih tih hi awlsam tein kan hre thei awm e. Kan khawvel hun hmawr tawh zia leh inpeih lo te inpeih a hun tawh a ni tih hi sawi lo mah ila tunlaia kan hun tawng mek hian min hrilh reng tawh a ni. Chuvang chuan Kristian te chuan hun awmzia hi kan hriat a tul ta hle mai. Engtik lai pawha kan Lalpa hmaa ding tura kan inbuatsaih hi a hun takzet tawh a ni. Kan khawvel hun tawng mek te thlir hian khawvel hi a chakna te chawpin a boral mek zel a ni. He khawvel chakna te, thiamna te, finna te, nawmsakna te hian mi tam tak a eiral a, boralna lam ah a hruailut mek zel a ni. He khawvel hi a chhunga chengte nen hian a boral mek zel a ni, he khawvel rual hian i boral ve lul suh ang u.

"Tunlai thil awmzia in hriat avang leh, muhil thawhharh a hun tawh tak zet tih in hriat avangin chu chu ka sawi a ni; tunah chuan kan rin tirh lai ai khan kan chhandamna chu a hnai ta zawk si a. Zan hi a ral lek lek tawh a, khua a var dawn ta e," (Rom 13:11-12)

- PC Laldinpuia
8.2.2013