I Gas book dan hrechiang rawh

Consumer te I harh ang u - XLIII

 

Tunlai hian Gas Home Deliver a book ten harsatna kan tawk zeuh zeuh a, Gas book tu ten Gas kan book in a tlang mai lo ta thin a, IOC atangin message kan dawng thin a, kan msg dawn chu hetiang hi a ni : Refill booking not allowed as the Consumer has alerady exhausted the Annual limit of 213 Kgs.

 

Hetianga message kan dawn chuan IOC in a kum khat chhung(financial year)atan a subsidy Gas min pek theih ang kan quota(bur 15) kan la zo tawh tihna a ni a, chuvang chuan sawrkar kum thar (April) hma chuan Gas online in kan book thei tawhlo tihna a ni.  

 

Hemi chungchangah hian thil awmzia leh Gas kan lak dan kalphung hi mipui ten kan hriat a pawimawh hle a, kan gas book dan te pawh a book theih apianga book vak vak lova kumtluan daih thei tura fimkhur taka kan book a tha ang.

 

Indian Oil Corporation hnuaiah hian Gas connection nei te hian domestic connection (14.2kg) hi kum khatah kg 213 subsidy in kan la thei a.  Chu chu bur 15 tihna a ni. Tuna Gas book danah hian ni 15 danah Gas hi a book zel theih a, hetiang anih chuan Gas a book theih apiang hian book zel ta ila, thla 8 ah kum khat chhunga kan quota kha kan hmang zo vek dawn tihna a ni a, thla 12 chhunga quota thla 8 a kan book zawh vek chuan a hnu lam thla 4 kha Gas online in kan book thei dawn tawhlo tihna a ni. Hetiang anih avang hian Consumer te hian Gas kan book hian fimkhur taka rilru hisap nei ran chunga kan book a ngai. A book theih alawm tih chang chawia kan book vak vak khan kumtawp lamah kan quota la thei lovin min siam a, a book a awlsam avanga kan card hmanga midang kan book sak emaw, midang hnena kan Gas kan hralh khan, kum tawpah keimahni harsatna min thlen thei a ni. Chuvang chuan kum khata bur 15 tla tawk turin chhungkaw tin te kan in siamrem thiam a tul hle a ni.

 

Tin, hemi piah lamah Gas online a kan book tawh a a booking a dik ngei chuan Gas bur kan dawn hma chu book nawn loh tur a ni a, Gas bur kan dawn har chuan kan delivery agent ah emaw Mizofed ah emaw complaint tur a ni. Agent ten kan DAC an tihbo avanga book nawn tura min ti anih pawhin Gas dawn hma chu book nawn loh tur a ni a, DAC hi lo tibo palh pawh ni ila agency ah awlsam takin a lak leh theih a ni.

- Laldinpuia