LPG Online Booking a Hose Pipe Replacement Message chungchang

- Laldinpuia, Secretary, SDCA

Tunlai hian LPG Online Booking thin te tan online a Book dawn chiah hian “Your LPG Suraksha Hose is due for replacement” tih hi a lo lang thin a, hei vang hian online a Booking tithin tam tak ten harsatna an tawk a a tihdan an hre mai lo thin tih hriat a ni a. Hetiang hian he problem solve dan leh hemi lo awm chhan hi lo tarlang dawn ila.

A hmasain hemi chungchang hi lo sawifiah lawk ila. LPG hi sawrkar atanga kan hmuh a ni a, chuvang chuan LPG connection kan neih hian sawrkar service kan lei tihna a ni ber awm e. Hemi avang hian sawrkar atanga puihna subsidy pawh LPG Cylinder kan lei apiangin Rs 144.64 kan bank Account-ah kan dawng tel nghal a ni. Tin LPG Connection kan neih hian insurance policy tha tak mai kan nei tel nghal a, Gas puak leh Gas vanga harsatna leh kangmei chhuah thuah insurance kan claim in zangna dawmna Rs nuai 50 thleng kan hmu thei bawk a ni. Hetiang anih avang hian LPG Customer zawng zawng te hian hemi insurance tinung tur chuan IOC dan siam te hi kan zawm a ngai a ni. IOC in dan a siam ang chuan kum 2 danah kan Gas connection te hi Mandatory Inspection hi neih ziah tur a ni a, hetah hian kan Gas dik leh dikloh te leak a awm leh awm loh te Company authorised Mechanic in min check sak thin tur a ni a. Tin, connection neih ruala kan lei tel thin Suraksha Hose Pipe pawh hi kum 5 danah thlak ziah tur a ni.

Heng hi tunhma khan Agency lam ten an ti mumal ngai lova, mipui lam nen insiamremna ang deuhin an namnul deuh mai mai thin a. Amaherawhchu tunlaiin engkim deuh thaw online system a tih a ni tawh a, engkim langtlang tawhin dan zawmlo emaw, a nih tur anga thil tilo te kha awlsam taka a lan theih tawh avangin dan zawm thlap thlap a lo ngai ta a, chuvang chuan tuna connection nei ho te hi kum 5 liamta hma lama Hose Pipe lei deuh vek tawh kan nih avangin LPG online a kan Book dawn apiangin Hose Pipe notification hi a lo lang ta a ni. (Tun hnaia dan in a huam china Hose Pipe Agency atanga lei hetiang msg dawng kan awm chuan agency ah emaw kalin msg hi a tihtawp tir theih a ni, Hose Pipe a hranpaa lei leh kher a ngai lo).

Hose Pipe lei ngai kan nih a LPG kan Book dawna hetiang msg a lo lan thin chuan Hose Pipe kan lei hma chu he notification hi a lang zel dawn a, chuvang chuan dan in a phut angin Hose Pipe hi Agency atanga kan lei mai kha harsatna kan tawh pumpelhna tur chu anih hmel. Hose Pipe hi IOC rate-ah chuan 1.2 metre hi Rs 170 man a ni a, 1.5 metre hi Rs 190 man a ni.

Whatsapp portal-a Gas Book thin te tan hetiang ang msg a lo thlen a a tih dan lo tarlang ila:

Online a Gas I book dawnah Hose Pipe Replacement message a lo lan khan YES tih click tur.

YES tih click zawhah menu a lo lang leh ang a, LPG Refill kha click tur, a hnuah menu a lo lan nawn leh chuan LPG Cylinder refill tih click leh tur a ni. Hemi zawhah hian special delivery option a awm thin a, hei hi chu NO tih click tur a ni. Hemi zawhah kan Booking ref no a rawn lang ang a, tichuan payment kha NO kan ti leh ang a, sms in ref no kan dawng ang a, Gas kan book tawh tihna a ni. Hemi kan tih thlen loh chuan gas kan la book lo tihna a ni.

Hose Pipe hi tunhnaia Agency atanga kan lei tawh anih chuan Hose Pipe lei tura message kan dawn hunah khan NO tih click tur a ni a, hemi zawhah Menu atangin LPG Refill click in a book leh mai theih bawk.