Serchhip-a Bial KTP hruaitu hmasa Pu Dengthangpuia kan chan ta

 - Laldinpuia

 

Serchhip Pastor Bial KTP hming leh a chanchin sawi a pianga a hming kan lamrik thin, Serchhip Bial KTP dintu leh Treasurer hmasa ber Pu Dengthangpuia chuan ni 7.8.2023(Thawhtanni) khan a khualzin kawng te zawh zovin a chhandamtu hmel hmu turin a haw ta a, a tuk ni 8.8.2023(Thawhlehni) khan ui tak chungin Serchhip Vengchung thlan mualah vuiliam a ni. Serchhip Bial KTP din tirha a dintu te zing ami anih avang hian KTP chanchin chhuina kawngah kan biakrawn ber thin a ni. Kum 2016 kuma Serchhip Pastor Bial KTP ten Diamond Jubilee kan lawm dawn pawh khan vawi engemawzah an chenna inah kalchilhin an hunlai chanchin a hriat ang ang te kan zawt thin a ni. Jubilee kan lawman programme-ah pawh chanvo pawimawh tak pein ni 22.10.2016(Inrinni) chawhma inkhawm banah khan Serchhip Pastor Bial KTP Diamond Jubilee Lungphun min hawnsak nghe nghe a ni.

 

Serchhip Bial KTP hi kum 1956-ah khan Serchhip Kohhran(tuna Serchhip Vengchung Kohhran kan tih tak)ah hian din a ni a, a din ni tak hi ziaka dah document kan hmuh zawh loh avangin kum 2016 a Serchhip Bial KTP ten kum 60-na champha(Diamond Jubilee) lawm tura kan inbuatsaih lai khan kan buai hle a. Pu Dengthangpuia hi Bial KTP treasurer hmasa ber a ni a, a din ni a hriat theih leh theih loh kan zawt a. Hetih lai hian amah hi a tar chak tawh lovin a beng a chhet nasa hle mai a, chute chung chuan theih ang angin kan kawm a. Bial KTP an din ni hi chuan ziaka lo chhinchhiah a neih loh avangin a hriat bik tawh loh thu sawiin, ama hriat dan chuan Serchhip Bial KTP an din hunlai chu vahchap vanglai, thal lai a nih ngei thu a sawi a, March-April bawr vel ni a a hriat thu a sawi bawk. Bial KTP din tirh a Asst Secretary hmasa ber Pu Kapthianga, Aizawl a awm pawh biakrawn a ni a, ani chuan Pu Dengthangpuia sawi ang tho chu a hriat dan ani tih a sawi bawk. Hetiang anih avang hian hruaitu hmasa a dam la awmchhun te tawngka atang leh document awm thei te behchhanin Bial KTP te chuan kan din hun min tihchiansak turin Bial Standing ah kan thlen a. Bial Standing lam chuan ngun taka lo chhuizui vein Serchhip Pastor Bial KTP din tan hun chu March 17, 1956 a ni e, tiin an rawn tichiang ta a ni(Bial standing vawi 7-na, 2015-2016).

Serchhip Bial KTP a din kum 1956 hian hruaitu mumal taka inruat a awm lo a ni mai thei, hruaitu kan hmuh theih hmasa berk um 1957 a hruaitute chu heng mite hi an ni –

Leader : Pu Lengchhinga

Asst Leader : Pu H. Chhunthuama

Secretary : Pu F. Chalthanga

Asst Secy : Pu Lalrampara, Pu Kapthianga

Treasurer : Pu Dengthangpuia

Finance Secretary : Pi Aichhungi

Kum 1957 khan Serchhip Bial KTP ding tir chuan Mizorama KTP dintu Rev O.W. Owen-a chu chah chhovin a hovin Bial Conference ni 12-14 April 1957-ah Serchhip Kohhran-ah an hmang nghe nghe. Hetah hian Pu Owen-a hian ‘Mihring hi enge a nih?’ tih thupui hmangin thuchah a sawi nghe nghe.

Serchhip Bial KTP lo ding tir hi Serchhip Kohhran(Vengchung Kohhran) hian an kut ken deuh chawt a, an Kohhran hi Bial KTP dingtir enkawlna kawngah an thawh hlawkin Bial KTP in a phuisui phah hle. Bial KTP lo ding tir hi thalai te tan a tangkai em em a, Kohhran mipui atang pawhin phurpuitu leh tuipuitu tam tak an awm a. Chutih lai erawh chuan Kohhran nu leh pate atangin sawiselna an tawng ta fo mai a. Biak In chhungah Solfa a zai an phalsak lo a, KTP puala hun neih pawh an phalsak lo a. Biak ina tingtang nena zai chu khawvel thil riauva an ngaih avangin Biak inah tingtang lakluh an phalsak lova. Khuang khata zai chu thlarau hnawhbo naah ngaiin khuang khata zai an duh lo bawk a. Kohhran a rawngbawltu KTP lam awn deuh te pawhin KTP tan zawngin Biak inah thu an sawi tha ngam lova. Pu F. Chalthanga(L) Chhiahtlang a mi, Bial KTP Secretary hmasa ber chu a hunlaiin Kohhran rawngbawltu a ni a, Kohhrana thuhril hna te chelh ve a duh si a, Bial KTP ah Secretary a ni bawk si a. Kohhran mipui ten Biak ina a a thusawi an phal theih nan a hunlaia tlangval tam takina an thiam chak, tingtang perh pawh a thiam duhloh phah hial a ni (source:Tingtang ka tum thiamloh chhan by F. Chalthanga).

Heng ang a hunlaia harsatna hrang hrang lo paltlanga tuar daitu, vawiina KTP member ten Kohhran kut ke ni chunga hlim taka Pathian rawng kan bawl theih nana KTP fawng lo chelh tang tangtute zing ami Pu Dengthangpuia’n min boral san ta hi a pawi hle mai a, Serchhip a KTP member te tan channa nasa tak a ni.