Speech on World Consumer Rights Day 2024

-Laldinpuia

Secretary, Serchhip District Consumer Association

Kumtin March 15 hi ‘World Consumer Rights Day’ atana hman thin a ni a. Kum 1962 March 15 khan United Staes President John F. Kennedy-a chuan US Congress ah thu sawiin, khawvel ram hruaitute zinga Consumer te dikna chanvo humhalh tura mumal taka thusawitu hmasa ber a ni a, Consumer rights sawi chhuak hmasatu a ni a, hei vang hian he US Congress a Consumer Rights a sawi ni hi a hnu lamah kumtin serh a ni chho ta zel a, ‘World Consuer Rights Day’ atana hman a ni ta a ni.

Theme 2024

World Consumer Rights Day ah hian kumtin thupui (theme) neih thin a ni a. Kumin 2024 a kan theme chu ‘Fair and Responsible AI for Consumers’ tih a ni. Hemi ina a tarlan leh kawh ber chu khawvel hmasawnna leh changkannain a ken tel Artificial Intelligent lam hmasawnna mek zelah hian Consumer te dikna leh chanvo inkawhhmuh leh humhalh a ni a. Mihring finna leh khawl thluak finna kan chawhpawlh a kan inchenchilh mek karah hian Consumer tena kan chanvo humhalh zel hi kan mawhphurhna a ni tih hi he thupui ina tarlan a tum chu a ni.

Consumer chu tute nge ni?

Consumer chu mi tupawh, sum senga bungrua emaw hna(service) emaw leitu leh hmangtu zawng zawngte hi a huam vek a. Mi zawng zawng hi kawng engemawah chuan Consumer kan ni thei vek a, chuvang chuan Consumer tih hian mi zawng zawng, mi te leh mi lian, hna hniam leh hna sang thawk te, thawhchhuah neilo te pawh a huap vek a ni. 

Thil lei leh hralh chungchangah hian thil zuartute hi Consumer an ni lova, sumdawnna tur emaw sum siam pun lehna tur atana bungraw leitute hi Consumer tih hian a huam lo bawk. Mahni hman tur leh mahni mamawh atana bungrua emaw serivce emaw leitute hi Consumer an ni. (Entir nan: Chawhmeh mahni ta tur leh ei tur leitute hi Consumer an ni a, hralh chhawn leh tur atana Bazar emaw a neitute hnen atanga a hlawma latute hi Consumer chuan a huam lo a ni)

Dawrkai te hi Consumer an ni lova, Dealer/Franchise te hi Consumer an ni lo bawk a, tin ram nei hawhtu(tenant) te hi Consumer an ni chiah lo bawk.

Consumer te humhalhna(Consumer Act)

India rama Consumer te humhalhna dan siam hmasak ber Consumer Protection Act 1986 chu ni 24.12.1986 atang khan hman theih tura pawm a ni a, kum 1987 atang khan a taka hman tan a ni. He Consumer Act hi siamrem ngai te siamtha a, a huamchin te tihzauh belhin kum 2019 July 8 khan Lok Sabha-ah Consumer Protection Act 2019 chu pharh a ni a, July 30, 2019 ah pawm a ni a, August 6, 2019 ah Rajya Sabha in a pawm veleh a, July 20, 2020 atang khan Consumer Protection Act 2019 (tuna kan hman mek) hi hman tan a ni. 

Consumer te thubuai(Consumer disputes)

Consumer Protection Act 2019 chuan Consumer te thubuai ngaihtuahtu hlawm hrang hrang hetiang hian a din a,

1. National Consumer Disputes Redressal Commission(Section 58(1)(a)(i) of CPA 2019): National Commission tih a ni a, India rama Consumer te thubuai ngaihtuahtu sang ber a ni. Rs nuai 200 chin chunglam thubuai a ngaihtuah thei.

2. State Consumer Disputes Redressal Commission(Section 47(1)(a): State Commission tih a ni. State Level a Consumer thubuai ngaihtuahtu a ni a. Rs nuai 50 atanga Rs nuai 200 thlengin a ngaihtuah thei.

3. District Level Consumer Disputes Redressal Commission(Section 34(1)) : District Comission tih a ni a. Consumer thubuai ngaihtuahtu hniam ber a ni a, Rs nuai 50 thleng thubuai a ngaihtuah thei. Tunah hian Mizoram a District hrang hrangah District Commission hi din a ni.

Consumer te chanvo

Consumer Protection Act 2019 chuan Consumer te chanvo kawng 6(Section 2(9)) a tarlang a, chungte chu –

1. Right to choose: Duhthlan theihna

2. Right to be informed: Inhrilhhriatna

3. Right to be assured: A him leh tha finfiah theihna.

4. Right to be heard : Kan lungawi lohna te ngaihsakna.

5. Right to seek redressal : Harsatna court a chinfel

6. Right to Consumer Awareness : Awareness kan dawng thin tur a ni.

Artificial Intelligent leh Consumer te

Artificial Intelligent(AI) kan tih mai hi Computer Science chi khat a ni a, khawl changkang tak, hriatna leh finna nei, mihring pangngai nena inbia leh thawkho thei tura duan a ni. Mihring te anga ngaihtuahna leh thutluk siam theihna nei, mihring te ai maha data leh information lakhawm chak tura duan a ni a, amaherawhchu Pathian thilsiam a nih ve loh avangin thlarau erawh an nei lo!

Kum 2015 khan Tim Urban-a chuan ‘The AI Revolution: The Road to Superintelligent’ tih article ngaihnawm tak hemi AI chungchangah hian a lo ziak tawh a, he a article-a a tarlan dan chuan, “AI tuna khawvela thleng mek hi ngaihven tur thil pawimawh ani satliah lova, nakin hun thlenga kan ngaihven tur pawimawh tawpkhawk a ni” a ti hial a ni. Artifical Intelligent hian tunah hian khawvel a luhchilh nasa tawh a, dodal theih pawh a ni tawh lo a, kawng hrang hranga hman tangkai leh a hmang thiam leh tangkaitu nih hi khawvel inelna leh intlansiakna ber pawh a ni. Khawvel huapa company lian leh hlun hrang hrang Amazon, Microsoft, Apple, Google, Facebook etc te pawh AI lamah an intlansiak mek a, technology lama hmahruaitu nih tum reng rengin an hman hlel mek a ni. AI hmasawnna leh intlansiak mek naah hian kan sawrkar laipui pawh hi a muthlu hauh lo. Hmanni lawk March 7, 2024 khan Union Cabinet chuan ‘India AI Mission’ kum 5 chhunga cheng vaibelchhe 10371.92 sen ralna tur chu a pawm tawh nghe nghe a ni.

Artificial Intelligent hi chi hrang hrang, kawng hrang hrang tarlan tur a awm a, amaherawhchu tun tumah chuan Artificial Intelligent in mipui nawlpui a nghawng dan, Consumer te thlirna atangin kan tarlang dawn a ni.

Khawvelina computer thiamna hmanga khawl siamchhuah device kan hmuh theih zinga 77% velah hian AI technology hi hman a ni tawh a. Khawvela sumdawnna kawnga company tam tak hian AI hi an hmang tawh a. Company tam tak hian an website ah AI Chatbox dahin customer te harsatna sukiang turin AI technology hi an hmang fur tawh a. Mithiam ten an zirchianna atanga a lan danin kum 2027 ah chuan company 80% hi chuan Ai powered intelligent automation hi hmang dawn niin an sawi. Tunah hian kum 2023 report ah chuan customer service company 23% te hian sales counter ah AI an hmang tawh a ni. Creative Strategies ten an zirchianna atangin smartphone hmang zingah android customer 96% leh iphone customer 98% te chuan Google leh Apple a AI digital assistant ‘Ok Google’ tih leh ‘Siri’ tih te hi an hmang tangkai mek a ni. An zirchianna atanga a lan danin kum 2024 ah chuan khawvelah hian 8.4 billion AI powered digital voice asistant unit a awm dawn a ni an ti a, chu chu khawvela mihring aiin an tam zawk a ni. Tunah hian global AI market hi a thang chak hle a, kum tin 36.62% in a thang a, kum 2025 ah chuan AI global market hlutna hi 190.61 billion dollar a ni dawn a ni an ti.

Hetianga sumdawnna thil a mihring aia khawl finna leh hriatna hman tam hian mihring hna tur tam tak a chhawk a, hna neilo an tam phah dawn a ni tiin a duhlo te chuan an sawisel thin a, mahse AI technology hian hna a siam zawk dawn niin a zirchiang mite chuan an sawi a, AI specialist mamawhna hi a nasa hle dawn a, kum 2025 ah chuan AI specialist maktaduai 97 hi AI industry ah hian mamawh an ni dawn zawk a ni an ti. 

AI khawvelah Consumer te chanvo

Artificial Intelligent in min hualvelna karah hian Consumer te hian kan chanvo hi a a la ngai reng a, Consumer Protection Act hian min la hum reng a ni tih kan hriat a tha khawp mai. AI technology te hi mihring te harsatna siam tur a duan a ni lova, mihring te pui a kan hnathawh tur tam tak min thawhsak tura duan te an ni. Chuvang chuan AI technology in harsatna min siam anih chuan a device hmangtu company emaw, a dawr emaw khan Consumer rights an bawhchhia a ni a, dan angin an chungah action lak theih tho a ni.

Consumer te hian kan chanvo hi humhalh tlat ila, sumdawnna kawnga mihring te pui tura khawl thluak nei tam tak mithiam ten an sia chhuah leh hman mek hi kan hnualsuat thei lova, a hman tangkai dan kan thiam zawk a ngai a ni. AI customer service te hi englai pawha biak pawh theih an nihna leh thinrim emaw, awka vin emaw a min be ve ngailo an nihna te hi lehlamah chuan a hahdam thlak hle a ni. Tin, company AI chatbox an hmang a kan duh ang chhanna min pe theilo anih pawhin mihring pangngai kan biak duh thu thlenin customer service pangngai be turin min refer thei bawk.

Khawvel a changkan chho zel a, kan nunphung a changkang chho zel a, Artificial Intelligent kan tih hi kan la hmelhriat chiang tawlh tawlh dawn, a tello chuan kan nunphung hi a buai zawk mah tawh ang. Hetiang hunah hian consumer te hian khawvel changkanna mil zela kan inzir chhoh zel a, kan nunphung kan her rem zel a, chutih karah Consumer kan nihna anga kan dikna leh chanvo kan humhalh chhoh zel hi a tul hle a ni. Hei hi World Consumer Right Day ah hian i hrereng ang u.