LOCKDOWN - PATHIAN PAWLNA HUN THA

Khawvela hripui hlauhawm Covid 19 thawh hnihna chu tunah kan tuar mek a, a thawh khatna aiin a thawm a na in kan bul hnaiah vei an tam sawt hle, kan fimkhur danah erawh nikum lam kha kan pha ta meuh lo niin a lang. Kan zuam sual ang tih pawh a hlauhawm khawp mai. Hun engemaw chen Kohhran Inkhawm pawh kan neih theih tawh hnuah tunah chuan Biak In te khar a lo ni leh ta a, Inkhawm pawh kan nei thei leh ta rih lo. He Covid 19 hi India ramah kan tuar nasa bik hle a, nitina khawvel hri vei thar zinga a zahve zet chu India mi an ni tih World Health Organisation(WHO) chuan a tarlang. Tin, India mithiam te chuan tuna Covid 19 thawh hnihna kan buaipui mek lai hian a thawh thumna lo thleng mai tur laka inbuatsaih nghal turin sawrkar an ngen a, a thawh thumna hi lo thleng ngei ngei tur 'pumpelh theihloh' an la ti ta deuh deuh lehnghal. Hetiang anih avang hian dan pangngai anga Kohhran Inkhawm te, zaiho te, thu leh hlaa inpawlkhawm te kha kan nei thei lawk dawn rih lo niin a lang a, a pawi hle.

            Mizoram sawrkar chuan hri kai pung zel laka mipui tam zawk kan him theih nan LOCKDOWN a puang leh ta a, sawrkar thuchhuah hi Kohhran mite hian kan zawm a pawimawh hle a ni. Sawrkar thuchhuak zawm hi Kohhran miten kan tihtur a ni a, kan himna tur a ni bawk. Kan Kristianna leh sakhaw changchawia sawrkar dan palzut te hi a fello a, a ringtu zia lo a ni. Sawrkar dan zawm chungin thuawih takin Kohhran mite hi kan awm ang a, hripui laka kan him theih nan leh hripui vei te tan, hripui a reh theih nan, thahnemngai taka hripui dona kawnga thawktu zawng zawng te tan bang lovin kan tawngtai thin zawk tur a ni.

            Sawrkar ina kan himna tur atana LOCKDOWN a puan hi Kohhran mite hian tih tur nei mumal lova awm mai mai nan kan hmang ang tih a hlauhawm hle mai. Pathian pawlna hun remchang atan hman zawk a tha hle. LOCKDOWN chhunga Pathian kan pawl theihna tur atan rawtna han siam ta ila -

 

1) BIBLE chhiarna hun tha: LOCKDOWN chhungin tul zualpui lovah chuan mahni compound chhuahsan phalloh a ni a, thenawm khawveng te nen pawha intlawhpawh lo tura tih kan ni. Hnathawh tur tul em em kan nei anih loh phei chuan hunawl kan ngah hle dawn a. He kan hunawl hi Pathian thu chhiar nan te kan hman tangkai a tha khawp mai. Kum 2020 chhunga awlsam taka BIBLE kan chhiar chhuah theihna hun remchang chu LOCKDOWN hi a ni. Hun pangngaiah chuan tih tur neuh neuh leh mahni hna tul kan neih thin avangin BIBLE chhiarna hun a tlem thin. Mahse tunah chuan kan peih leh peih loh a ni ta mai. BIBLE chhiarna hun remchangah LOCKDOWN hi hmang tangkai ila, A thu hmangin Pathian i bia ang u.

 

2) Tawngtaina hun tha: LOCKDOWN hi Pathian pawla tawngtaina hun tha a ni. Hun pangngaiah kar tluanin mahni hnaah kan buai thin a, Pathian pawla tawngtaina hun kan nei tamlo thinin fianrial hun pawh kan nei tlem thin hle. Mahse tunah chuan sawrkar atangin tihluihnain LOCKDOWN puan a ni a, bazar hmunah kan kal thei lova, Biak inah kan inkhawm thei lova, hunawl kan nghah hle mai. Hei kan hunawl hi Pathian pawla tawngtaina hun atan kan hman tangkai a tul hle. Covid 19 avangin tawngtai thupui kawng hrang hrangin a awm reng, tawngtaipui ngai an awm reng. Hawh u he LOCKDOWN hi tawngtaina hun thaah i hmang ang u.

            Mi thenkhat chuan LOCKDOWN hi an ning thin a, thil sual tih nan an hunawl te an hmang a, an hun tha tam tak thil ho mai mai atan an hmang bawk. Mahse keini ringtute chuan he inkhuahkhirh hun hi Pathian min hnaih tirtu atan i hmang tangkai hlauh ang u. Englai pawhin Pathian kan mamawh reng a, kan thlarau nun tihchak a ngai reng a, kan rinna leh kan thlamuanna hian fiah a mamawh reng a, hemi atan hian Pathian thu hi kan nunah a beh reng a ngai a. Kohhran Biak Inah te inkhawmin Crusade leh Revival te nei kher lo mah ila, keimahni nunah hian insiamtharna/intuaitharna hi awm reng se. Midang Pathian thu hriat atanga lo thlamuang a, lo lungawi ve mai lovin keimahni ngeiin Pathian thu chhiarin amah be thin ila. Heng tihlawhtling tur hian tuna Covid 19 hripui avanga LOCKDOWN kan hman hi ringtute chuan Pathian paawlna hun tha atan i hmang zawk theuh ang u.

- Laldinpuia  08052021