A mamawhte mamawh zat thleng phak lo, hralh sen loh awm si – KHAWNVARTUI

A bul tanna

Serchhipa Khawnvartui retailer te chuan an Khawnvartui dawn tur ni a driver in a sawi chu a tlinglo niin an hria a, an insawirem theihloh avangin ni 16.2.2021 tlaiah khan District Consumer ah thlenin hmalakpui turin an ngen a, Legal metrology te nen tang hovin enfiah a ni a. Heta a lan danah motor MZ 01 M 5334 ina Khawnvartui Serchhip ta tur a rawn phurh chu a driver challan nena en milin a lo thleng chu a kimlo nasa hle mai a, litre 2258 vel a kimlo tih legal metrology ten an hmuchhuak a. Driver chuan DCSO leh Supply Department hriatpuiin barel 10 kawng lakah a hralh thu a sawi a, heta tang hian sawi hlawh tak Serchhip Khawnvartui chungchang buaina chu a lo intan ta a ni.

Thil tisualtu inpuhmawhna

Driver hian atirah Serchhip retailer 3 te hnenah Khawnvartui dah tur zat hi litre 3266 theuh tur anih thu a sawi a. Chu chu driver challan nena en milin a dik theih loh avangin Consumer hruaituten allotment order emaw, litre 3266 Serchhip pek tur a ni tih inziahna lehkha kan dil a, driver chuan lehkha a awm loh thu leh DCSO in chutiang zat dah tur anih thu a hrilh tih a sawi a. Hetih lai hian Serchhip Khawnvartui retailer te pawh hian an dawn zat tur hi an lo hre lawk ngai reng reng lo a, lehkha emaw dawn lawk an nei ngai lova supply lam hian chawpchilh takin an khawnvartui dawn tur hi an rawn hrilh thin a, pawisa te pawh puk tur an dap chawp chung chung thin tih an sawi. 

    Hemi ni(16.2.2021) vek hian Consumer lam hian DCSO biakpawh nghal a ni a, Serchhip retailer te Khawnvartui chan tur dik tak ziahna order/allotment dil a ni a, DCSO chuan order/allotment a awm hran loh thu leh driver ten Khawnvartui lo thleng an unload zawh vek hnuah allotment chu siam anih chauh tur thu a sawi a, Consumer hruaitute chuan DCSO chhuahchhal nghalin chutiang chu thil awmdan anih chuan a fello an tih thu leh allotment hre lawk lova driver ten an rawn phurh thlen ang ang allotment siam anih chuan mipui chanai bo thlau a awm leh awm loh hriat a har tur thu an sawi. Driver in barel 10 a hralhruk chungchangah DCSO chuan a hriatpui loh thu leh a inrawlh loh thu Consumer hruaitute hnenah hian phone kaltlangin a sawi. Motor driver chuan ni 27.2.2021 khan Consumer hruaitute hnenah Khawnvartui barel 10 an hralhruk thin chungchangah hian DCSO an inrawlh thin thu a sawi a, DCSO ten anmahni phone in an share tur zah te pawh an hrilh lawk thin tih a sawi a. Barel 10 an hralh hian Rs 15000 vel an hlep thu leh chutah chuan DCSO in challan an signed manah Rs 11000/- a lak thin thu te, a bang zawng(Rs 4000 vel) chu a mah(driver)in a neih thin thu te a sawi bawk.

Khawnvartui litre 3266 hlan tur ti a driver in a sawi pawh chu litre 65 velin a tling ta chuang lo a, a tlinlohna hi driver leh retailer ten insiamremin retailer ten driver an chawi tir a. Tichuan a Khawnvartui phurh chu unload a ni ta a. Ni 17.2.2021-ah DCSO office atangin he Khawnvartui allotment order chu tihchhuah a ni ta a, challan no 739357168 a ni a, he allotment order ah hian ni 16.2.2021-a Khawnvartui lo thleng kha retailer 3 hnenah litre 4000 veka dawng angin ziah a ni ta tho a ni (Letter no S.11012/6/2009/DCSO(SRCP)/317 Dated Serchhip the 17^th Feb, 2021). A hmaa litre 4000 tur a kimlo a litre 3266 a an unload tir si kha sawrkar lehkhaah chuan a kim a dawng angin a lang leh ta vek a, driver in barel 10 a hralhruk kha DCSO allotment order-ah chuan ziahbo a ni ta a ni.

Buaina a zual zel

DCSO chuan Khawnvartui avanga buaina a awm hnuah hian Khawnvartui barel 10 hralhruk chu a hriatpui loh thu chanchinbu news item ah te tichhuakin Consumer hruaitute hnenah te a sawi bawk a. Mahse mipui chanai barel 10 driver in a hralhruk chungchangah pawi a tih thu leh driver thil tihsual chungchang emaw thil tisualtu leh a inhnamhnawih zawnchhuaha an chunga action lak emaw chungchang a sawi lang ngailo thung. February 21-ah DCSO ruahmanna angin MJA Serchhip kaihhruaina hnuaiah DCSO leh District Consumer Association ten inbiakna kan nei a, he tah hian Khawnvartui hralhruk chungchang thubuai kal mek chu DCSO hian sawilan a remti lova, hun kal zela thawhho dan tur sawiho a rawt tak daih avangin thu awmze nei lovin he meeting hi tihtawp a ni ta a ni. Hetih lai hian Truck neitute rawn inrawlhin Consumer-ah an driver aiawhin ngaihdam an rawn dil a, Khawnvartui barel 10 rawn dah let an intiam bawk a. Consumer lam chuan he thil dikloah hian a motor neitu leh driver piah lamah Supply Department thuneitute thuk takin an inrawlh ni a kan hriat avangin motor neitute ngaihdam dilna leh inremsiampui tura an rawn ngenna chu kan pawmpui thei ta rihlo a ni.

            Khawnvartui buaina chungchangah hian Central YMA hotuten Chief Secretary hnenah thlenin ani chuan Anti Corruption lamah hma lo la nghalin ACB ten he thubuai hi an chhui mek a ni. Tin, Mizoram sawrkar lam pawhin tum 2 zet inquiry la in he thubuai chungchang hi an rawn ngaihven tawh bawk.

Thudik chu

Khawnvartui hi IOC atanga mipuia hralh tura lachhawngtu(agent) chu Serchhip District-ah chuan Mizofed an ni a, mahse Mizofed te hian Khawnvartui lo thlen leh thlen loh te, engzah nge lo thleng tih pawh an hriatpui ngai miahlo! Tun hma chuan challan te hi an dawngin hming an sign ve thin a, mahse tunah chuan engmah an hnen a thleng ngailo (Khawnvartui buaina a awm hnua lo thleng lehah chuan driver ten Mizofed ah challan a rawn keng thin tawh!).

            Retailer te chuan Khawnvartui hi kum 1 ah vawi 2 an dawn thin thu an sawi a, chu chu mipuiah litre 2/2.5 tein an sem thin tih an sawi a, retailer te sawi dan atanga tehin mipui ten kum khata Khawnvartui kan dawn hi litre 5 vel anih chu. Khawnvartui kan dawn tlem avang hian a mamawh te an harsa hle a, black in man to tak tak a an lei a ngaih phah thin a, Khawnvartui hmang chi khawl nei leh thingtlang lama mei chhem nana hmang thin te chuan an dawn chhun te hi ren takin an hmang thin a, Khawnvartui sem hunah pawh an ration card duhtawk lovin midang a mamawh ve lemlo ni a hriat card hawh tur an zawng khawm fo thin.

Hetiang anih lai hian IOC Area Manager sawi dan chuan Mizoramah Khawnvartui hi 264KL thla tin kan dawng a, hei hi Tanker Trip 22 hu vel a ni a, chu chu Mizoram District 8(District thar hi PDS lamah siamfel a la ni lovin ka hria) ten kan insem tlang a, a lo berah District 1 hian trip 2 vel zel chu dawng ang kan ni mai thei.

Central sawrkar ina Khawnvartui mipuia a sem danah hian Ration Card 1 ah thlakhatah litre 1 zel dawng tur anga ruahman ni a sawi a ni a. Hemi tehfung hi han hmang ta ila, Serchhip bik thlirin tuna Khawnvartui retailer te hian kum khatah vawi 2 an sem a, vawi khat semah litre 2.5 in an sem a, kum khatah ration card 1 in litre 5 an la tihna anih chu. Litre 12 quota awm si litre 5 mipui chan a ni a, Litre 7 kha tuten nge a hlawkna tel ta ang? Sawrkar atanga kan Khawnvartui chan tur lo kal hi kan hnena thleng aiin a ruka an lo hralhruk a tam zawk niin a lang.

DCSO Record thar bera a lan danin tunah hian Serchhip DCSO huamchhungah Ration Card nei AAY 1962, PHH 10095, Non NFSA 6622, kan vaiin 18679 kan awm mek a ni.Mizorama Khawnvartui lo thleng nena khaikhinin kan District ah thla tin Trip 2 emaw Trip 1.5 pawh lo thleng se Ration Card nei zawng zawng hian litre 1 per month chu kan la thei hrim hrim niin a lang. Mipui chanai eiru thin te thiltih dan hi a lo tenawm hle a ni.

Thudik tanin i tangrual ang u

Khawnvartui chungchanga thil diklo lian tak inphumru awm hi haichhuak a, mipui tena an chanai dik tak an chan theih nan Mizoram hmun hrang hranga Consumer lama tuimi te kan tanrual a ngai hle mai. Diklohnain a upbeh rei tawh lutuk avanga an chanai tur pawh sawi thei tawh lo mipui te hnenah hian kan chanai dik tak hi kan sawi thar leh a tul a, kan chanai kan chang kim em tih hi kan vil zui reng a tul bawk ang. Thil diklo hi lianin a titute hrawl viau mahse thudik lamah kan tan tlat chuan mipuite hi kan lamah an tang a ni tih kan hriat a huaisen taka dikna atana kan beih zel pawh a tul hle a ni.

DCSO tam tak hian Khawnvartui hi hmun thenkhatah hralhna a hnawn thu hi an sawi fo thin a, a mamawh ngawih ngawih sawrkar dana kum 1 a litre 12 dawng tura ngaih ten an dawn kim loh thu erawh an sawi ngailo thung. Supply hotuten an khawnvartui lak te Retailer thenkhatin stock an ngah avangin an khul duhlo/lei tur an awm lo tih an sawi lai hian retailer thenkhat chuan Black in man to tak takin an hralh reng thung. Chuvang chuan thuneitu thenkhat te hi chu hmun thenkhata hralhna an hriatloh chhuanlamin midang te nen intiamrualin hralhruknaah ngampa takin an lo inhnamhnawih ve thin pawh a ni mai thei. Ration card nei zawng zawng hian Khawnvartui kan mamawh kher lo a, hetih lai hian a mamawh te erawh hi chuan thla khata litre 1 pawh hi an khawp khamlo thung si ang. Hemi ah hian sawrkar lam hian ruahmanna felfai deuh a siam a tul a ni. A then laia hralhna an hriatloh chuan a mamawh ngawih ngawih khaw dangah tam tak an awm a, heng te hnenah hian semzai dan ngaihtuah zawk se. Kan mamawh aia tam kan ramah Khawnvartui a lo lut ni a lang hi sawrkarin zirchiangin a mamawh te chan dan a rualkhai em, a mamawh lotute hnenah hralh sen loh thleng thin hi hmun danga siamrem dan a aw mem tih te zirchian a hmalak a tha khawp mai.

Tuna Khawnvartui chungchang thubuai hian mipui te min tiharh se, sawrkar laka kan chanvo tur kan chang em? kan chanai tur min pawh thensaktu an awm em? tih te hi chik tlang ila­, kan chanvo tur dik tak kan chan theuh theih nan theihtawp i chhuah tlang zel ang u.

-          Laldinpuia, Secretary Serchhip District Consumer Association