Serchhip Bye-Election Candidate te bihchianna

 - Laldinpuia

April 17, 2021-ah Serchhip Bial-ah Bye-Election danglam tak neih a ni dawn a, tun tum Bye-Election hian tum dang a Bye-Election neih dan nen a inan loh avangin mite ngaihven a hlawh a. Zoram pum huapa Politics lam ngaihven chin chuan tunah hian Serchhip lam an thlir thup a ni.

Serchhip Bye-Election neih turah hian party tinin candidate in siamin theihtawp an chhuah theuh a, tlin ngei tumin an party chakna zawng zawng nen hma an la theuh niin a hriat. Mizo politician lar te leh ram pum huapa party hruaitute Serchhip ah an insulpel zut zut reng tawh mai a, hei hian tun tum Bye-Election tur boruak rih zia a tarlang.

Tun tum Bye-Election-ah hian candidate 6 an awm dawn a, mi tha tak tak vek an ni a. Heng candidate te dinhmun tlangpui hi Election Commission of India website-a an affidavit tarlan atangin han bihchiang thuak thuak teh ang: 

 

LALHRIATRENGA CHHANGTE:

Ani hi Bharatiya Janata Party(BJP) candidate a ni a. Kum 56 a upa a ni. Election Affidavit-a a address ziah danah H.No 159, College Road, Serchhip a cheng a ni. A sum leh thil neih hlut zawng belhkhawm chu Rs 4,95,000/- a ni a, a nupui hian Bank AC leh kuta a sum neih chu Rs 1,63,000/- a ni a, a fate sum neih chu Rs 102,750/- a ni. Pu Lalhriatrenga Chhangte hian New Serchhip ah inhmun 3 a nei a, a hlut zawng chu Rs 54,50,000/- a ni. A nupui hian Aibaikawn-ah huan ram a nei a, Kulikawn-ah in hmun a nei bawk. A hlut zawng hi Rs 68,00,000/- a ni. A faten New Serchhip-ah inhmun Rs 2,50,000/- hu an nei bawk. Thiamna lamah B.Tech(Mining Egg), LLB a ni. Eizawnna lamah Pensioner a ni a, a nupuiin hnathawh a nei lo. Fapa 1 leh fanu 2 an nei. A sum lakluhna chu a pension hlawh a ni.

VANLALRUATA:

Mizoram Peoples Conference(MPC) party candidate a ni a. Election Affidavit-a a lan danin kum 45 a upa niin N-95/N, Maubawk, Aizawl-a khawsa a ni. A sum leh thil neih(movable asset) hlut zawng belhkhawm chu Rs 8,30,965/- a ni a. A nupui sum leh thil neih hlut zawng belhkhawm chu Rs 50,000/- a ni. A fate sum neih belhkhawm chu Rs 16839.36/- a ni. Industrial Grown Centre, Luangmual-ah ram a nei a, a hlut zawng chu Rs 20,00,000/- a ni. Eizawnna lamah arvulh leh consultancy chu a sum lakluhna a ni a, a nupui hian dawr a nghak thin. Thiamna lamah BA(History) a ni.

VANLALZAWMA :

Mizo National Front(MNF) Candidate a ni a. Election Affidavit-a a ziah danin kum 65 a upa niin T-27, Tuikhuahtlang, Aizawl-a cheng a ni. A sum leh thil neih(movable asset) hlut zawng belhkhawm chu Rs 12,988,273.10/- a ni a, a nupui neih hlutzawng chu Rs 15,80,021.19/- a ni. Tuikhuahtlanga RCC flat a neih bakah ITI vengah Farm House a nei a, a hltu zawng chu Rs 168,00,000/- a ni. A nupui hian Aizawlah hmun 6 ah inhmun a nei a, a hlut zawng belhkhawm hi Rs 148,00,000/- a ni. Thiamna lamah MA(History) a ni a, amah hi Politician hlun Ex-MP a ni, Pension hlawh hi a sum hmuhna a ni a, a nupui hi sawkar hnathawk pension a ni bawk.

 

RAMHLUN EDENA:

Independent candidate a ni a, election affidavit-a a tarlan danin kum 50 a upa a ni a, Falkland VC Road, Aizawl-a khawsa a ni. A sum neih belhkhawm(movable asset) hi Rs 9039/- a ni. Ram leh inhmun engmah neih a neilo. Thiamna lamah BE a ni.

PC LALTLANSANGA:

Indian National Congress(INC) Candidate a ni a. Election affidavit-a tarlan anih danin kum 48 a upa a ni a, House No 257, Kulikawn-II, Aizawl-a khawsa a ni. A sum leh thil neih(movable asset) belhkhawm chu Rs 45,41,038/- a ni a, a nupui sum leh thilneih belhkhawm chu Rs 8,29,387/- a ni. PC Laltlansanga hian Aizawl ITI, Mission veng leh Serchhip-ah inhmun a nei a, heng a inhmun neih hlut zawng belhkhawm chu Rs 80,00,000/- a ni. A nupui hian Serchhip Hmar Veng-ah inhmun neiin a hlut zawng chu Rs 6,00,000/- a ni. Thiamna lamah MA(History) a ni. A sum lakluhna chu self employed a ni.

LALDUHOMA:

Zoram People’s Movement Party(ZPM) candidate a ni a. Election affidavit-a tarlan anih danin kum 71 a upa a ni a, H.No 157, Chawlhmun-II, Aizawl a cheng a ni. A sum leh thil neih(movable asset) hlut zawng belhkhawm chu Rs 42,45,854.00/- a ni a, a nupui neih hlutzawng belhkhawm chu Rs 5,46,914.00/- a ni. Chawlhhmuna ama chenna in bakah Sihhmuiah ram a nei a, a in leh ram neih hlutzawng hi Rs 1,90,00,000/- a ni. Amah hi MP leh MLA lo ni tawh a ni a, heng a a pension hlawh hi a sum lakluh a ni. Loneimi a ni a, a loneih naa a thali hralhna atangin sum a lalut bawk. A nupuiin hnathawh a nei lo. Thiamna lamah BA a ni.

Khaikhawmna:

Kan candidate ten Election Commission a affidavit an thehluh atanga thlir hian an tha hlawm hle a, Serchhip bial tana mi tha tak tak hlir anni tih a lang. Candidate te zingah tumah Court thubuai nei an awmlo a, a lawmawm hle. Kan candidate te zinga tu pawh hi lo tling ta se, Serchhip bial tan hmasawnna a nih ngei a beiseiawm.

Tun tum Bye-Election ah hian Mizorama party tinin Candidate an siam vek a, an Candidate zinga 3 Pu Lalhriatrenga Chhangte, Pu PC Laltlansanga leh Pu Ramhlun Edena te hian Serchhip khawchhuak/bial chhung mi leh sa tih chu campaign au hla atan an hmang hlawm. Candidate zingah ZPM Candidate Pu Lalduhoma chu a upa ber a, kum 71 a ni a, PC Candidate Pu Vanlalruata naupang berin kum 45 a ni. Candidate te kum chawhrual hi kum 56 a ni. Candidate te hi an vai hian mithiam tak tak, thluak tha leh NGO leh khawtlang kaihhruaina kawnga experience nei tha tak tak te an ni hlawm. Candidate zinga 4 – Pu Vanlalruata, Pu Vanlalzawma, Pu PC Laltlansanga leh Pu Lalduhoma te hi MLA Election hnuhnung berah khan an in candidate tawh a, Pu Lalduhoma hi Serchhip Biala thlan tlin a lo ni tawh a, kum 2020 kum khan MLA dang ten an hekna avangin Assembly Speaker in a disqualify a ni. Pu Lalhriatrenga Chhangte hi MP inthlan hnuhnung berah a in candidate tawh bawk. Pu Lalduhoma leh Pu Vanlalzawma te hi MP leh MLA lo ni tawh ve ve an ni a, midang zawng hi chu ram rorelna khawla la tel ngailo an ni.