Veng entawntlâk Serchhip Chanmari

Tunhnaiah Serchhip Chanmari Veng Village Council ten Ni za inhlawhna (MGNREGS) a\anga an sum hmuh dan leh an hmanna kimchang  takin mipui hriattheih turin an rawn po chhuak a, a vengchhung ami ni ve lemlo te pawhin an thiltihdan chu a \ha kan tiin ral khat a\angin kan lo fak hle a ni.

MGNREGS(Ni za inhlawhna kan tih mai) hi Central sawrkarin a mipui ten sawrkar a\anga inhlawhna an lo neih ve theih nana a duan a ni a. Ni za inhlawhna hi mipui sum a ni a, tumahin an pawhpen sak tur a ni lo tih dan hi kan hre \heuh awm e. Chutih laiin Mizoram angah chuan India ram hmun dang te nena khaikhin theihloh chang kan awm a, kan hlawhfa rate leh kan hnathawh tur te pawhin a inmil hleihtheih loh avangin dan angin kan thawk ta hlawm lo a. Tunah phei chuan thawhloh hlawh kan la a ni deuh ber e. Hetianga thawh loh hlawh kan lak tak deuh furah chuan kan VC lam lahin \hahnem an lo ngai bawk a, awm an tih ang tawk tihluihna deuhreuhin an lo cut ve mai niin a lang. Chutih lai chuan VC term hmasa lam leh tunhmaah te mipui sum cut a\anga hnathawh mumal awm leh si lo ni a a lan avangin leh mipui sum cut chu VC member ten an fanghma no ei mai ni a ngaihna a awm avangin sawiselna a nasa hle a. Serchhip-ah ngei pawh buai deuh laih kan nei anih kha. Sawrkar lam a\anga order awm angin a thawk duh ten an thawh theih nan VC ten hma an la a, a thawk duhlo te chu an chanvo hrek sak lem lovin dan kalhin an thawh tirlo leh tho a, a thawk duh awmchhun(dan ang taka an chanvo chang duh te) erawh hna hahthlak leh rim tak thawhtirin an hrem a ni deuh ber e. Khatiang kha kan boruak tehnuai anih avang khan MGNREGS khan min ti buai hle a ni. VC te khan mipui te lungawina zawng lovin anmahni duh danin mipui kaihhruai an tum ni berin a lang.

Tunah chuan VC te inthlang tharin VC hmel thar hmun tinah kan lo nei ta a, tun hmaa boruak awm avang khan an fimkhur tlang ta deuh niin a lang. Tunah pawh Serchhip Chanmari veng VC te chuan an area-a Job Card awm zat te, mipui pawisa an lakchhuah zat leh mipui hnena an sem zat, mipui ten hmasawnna hnathawh tura an thawhkhawm leh chumi a\anga hmasawnna hna an thawh tawh te kimchang takin an rawn pho chhuak mai a, hei hi langtlang rorelna a ni a, an fakawm hle. Hetiang hi kan rama VC dang te pawh hian kan kalphung ni thei se, langtlang rorelna hi mipui te pe thei \heuh ila a lawmawm hle ang. Chanmari VC te hmalak dan hi darthlalanga hmangin hetiang hian Serchhip khawchhunga VC dang te pawh hian ti vek thei se mipui tan chuan thil \ha tak a ni ang.

            An VC te hmalakna avanga Chanmari veng kan sawi lai a rilrua tunhma a\anga lo awm, fak an phu ni a ka hriatna chu an veng chhunga Gas sem an buaipui dan chungchangah a ni. Serchhip District Consumer te hian Serchhip-a Gas sem dan hi kan enzuiin mipui ten buk tling ngeiin Gas an la em tih kan thlithlai \hin a, Sub Hqrs YMA te nen \ang hovin YMA branch tinah an venga Gas sem lo enpui turin YMA lam te pawhin ngenna an tichhuak a. Serchhip khawpui chhunga mahni area a Gas sem uluk taka vil leh hlawh nei miah lova lo bukpui thlap thlap thei chu Serchhip Chanmari Branch YMA te hi an ni a, an fakawm hle. Sawrkarin eirawngbawlna Gas rih dan tur a ruahman vek a, a rih tur bituk anga a rit lo anih chuan inngaihhnathiamna awm lovin agent ah an complaint in Gas buk dik tak mipui ten an phut a, 'Kei chu tling lo mahse ka duh tho' ti fal awm miah lovin YMA hruaituten an ruahman angin vengchhung mipui ten dawhthei takin sawrkar laka an chanvo dik taka an chan theih nan an nghak a. Gas semtu ten a bukna an ken theihnghilh palh pawhin a bukna an lak hma chu sem an phal ngai lo. An fakawm hle a ni.

            Serchhip Chanmari veng hian kan rama Dikna mutthlu mek hi an kaiharh mek a, mipui ten sawrkar laka kan chanvo dik chang turin an khawtlang hruaituten hma an la a, mipui ten an zui mek a ni. Tun hmaa veng kilkhawr, tawp leh ruihhlo tamna veng(ka \awng lo haw lo se) ni a kan lo hriat \hin kha, tunah chuan Serchhip mipui ten kan entawn theih turin kawng engkimah hma an hruai mek ta anih hi. 

Laldinpuia 29/10/2020