Tun hi a hun tak chu a ni

Mahni mimal tulna avangin India ramin Covid 19 kan vei tantirh lai velin Mizoram pawnah ka zin a, kan zin lai hian India ramah Covid in bu a khuar tan a, sawrkar a ralkhel a, mahse Arunachal leh Guwahati velah erawh nunphung a la buai phah lo hle. Covid 19 vanga fimkhur nachang hria an la awm mang lo emaw tih tur zawk a ni. March 18 zanah Dibugarh atanga Guwahati kan pan lamin Train station-ah screening an lo nei ve a, min en duhdah hla. March 19 zingah Guwahati kan thleng a, Train station-ah Screening an lo nei leh a, mahse mipui intlar kan tam lutuk a, screen lovin min chhuah tawp! Kan fimkhur ve tehreng nen, a ho angreng khawp mai. March 19 a India rama Covid 19 kai tawh zat chu 160 an tling tawh. Hemi ni hian Aizawl kan lo thlawk haw a, Mizoram erawh kan lo ralkhel nasa hle.

March 19-ah kan khua Serchhip tlangin Serchhip ka thlen hian mahni inah pawh lut lovin thenawm te inhnuaiah room siam chawpin ka inkhung a, Covid 19 kai ka inrin  ai mahin sawrkar thuchhuak zawm duh vanga inkhung ka ni. Thuawih ka zir a ni. A chhan chu khatih lai khan Assam-ah kai an la awmlo a, kan chetdan leh fimkhur dan thlir khan kai theihna chance kan nei vak lo a ni. Sawrkar thu zawmin ni 14 ka inkhung hrang a. Ka inkhunghranna lai hian India ram pumah Total Lockdown neih a ni.

Ka inkhunhranna atanga ka chhuah hnuah Consumer lama hruaitu kan nih avangin District Level Covid-19 Committee ah te min telh ve nghal a. Comt leh hmalakna kan neih nikhuaa ka veivah chang a ka rilru a thil lo awm lian tak chu tul lovah kan in lockdown em ni? tih hi a ni. Mipui veivak kan khuahkhirh a, sawrkar hnathawk office kal theilo in lama an tawmim mai mai laiin mirethei leh harsa zawk, khawtlang leh YMA a inhmang te hah takin chhun zan zawmin an duty thung a. State pawn atanga Mizoram luh leh chhuah khap mumal a ni lova. Khatiang anih laia mipui nawlpui zawk lo inkhuahkhirh a vengtina hrui thlung a mipui lo ven a kha tullo tih chang ka ngah mai. Sawrkar hnathawk hlawh nei zawk ten hahdam taka chawlh an hman theih laia mahni hnaa buai em em mai te, mahni hna tul kalsana VLTF a kan in duty chhawk sek mai kha sawrkar lam rel fuh loh nge, khawtlang hruaitute ruahman fuhloh nge tih hi ka ngaihtuah fo thin.

Hri lo luhna tur ber ramri ven leh khar uluk ni si lova a khawchhunga lo inkharkhip vak kha tul ka ti lo thin a, ngamtlak te bulah, ‘kan strict dan em em hi a diklo a ni’, tiin ka lo sawi ve thin. Kha tihlai khan Lockdown duhlotute zingah ka tel a, lockdown ai chuan fimkhur ila a tawk, kan eizawnna hi chawlhsan lovang u tih kha ka ngaihdan a ni. Mahse a tam ber ngaihdan erawh a ni si lo. Kan lockdown chhung khan Kohhranin a tuar a, kan thlarau nunin a tuar a, sumdawng leh nitin eizawng thin ten an tuar nasa em em a, sawrkar hnain a tuar a, sawrkar hnathawk te erawh chuan hlepah an lo chhiar thung awm e.

Tunah chuan Total Lockdown kan neih laia ka ngaihdan letling thawk kha ka ngaihdan a ni ve ta. Kan khawchhungah hriin min chenchilh a, vantlangah kan inthehdarh mek a ni. Community spread a thleng tawh em? tih a inzawh buai a ngai ta lo. Tunah hian vantlangah kan inthehdarh mek a ni. Khawdang atanga hri a loluh hlauhin awmzia a awm lova, ramri khar emaw khawdang a zinchhuah khap emaw, khawdang atanga lo zin hlauh viau emaw kha awmzia a awm ta lo. Covid 19 chu kan khawlaiah a leng mek a, kan bulah a cheng mek a ni. Tuna positive tlemte te hian midang engzah nge an nghawng dawn, engtianga nasa in nge a inthehdarh dawn? Tih chu hriat mai theih a ni ta lo. Hunin a la hril ang chu. Chuvang chuan he hri laka kan inven theih nan chuan tunah hian kan inkharkhip a hun ta chiah tih hi ka hmuhdan a ni. Tun hi inkharkhipna (Total Lockdown) neih hun tak a ni lawm ni? Tun hi a hun tak chu a ni.

- Laldinpuia  22.10.2020