Lockdown chhungin Kohhranin engtin nge hma kan lak ang?

 Kum 2020 kum kan hmang tan chauh tihin hripui avangin kan buai a, he Covid-19 avang hian kum 2020 chhunga Kohhranho tena kan programme duan leh ruahmanna awm te chu a rawn tisukuk zo a, rawngbawltuin Kohhran huangah rawng a bawl hleithei lova, Pathian pawlna leh harhtharna chang ni a inhria te pawhin an duhzawng sawina hun an nei hleithei lova, rawngbawltu te pawhin kan rilru a Pathian thu awm ve sawichhuahna hun kan nei lova. Kohhran member nawlpui ang pawhin Kohhran hote inhmuhkhawm leh Pathian biak inkhawma Pathian faka zai hona leh a thuchah ngaihthlakna hun pawh kan nei hleithei ta lo. A pawi hle a ni.

Hetiang anih tak avang hian Kohhranin programme a nei hlei thei lova, sawrkarin hripui inkaidarh a hlauhawm avangin inkhawm a la phal bawk si lova. Chuvang chuan inkhawm chak viau mah ila a theih rih siloh avangin Kohhran mipui te kan hawihai a, tunah phei chuan Pathianni pawh serh nachang hre lova nidang ang maia mahni hna tul thawk ta hmiah hmiah te pawh kan awm nuk tawh a ni. Hetianga engmah ti lova kan awm mai mai hian Kohhran hlutna leh Pathianni hlutna a titlahniam zel ang tih pawh a hlauhawm ta hle a ni. Chuvang chuan Lockdown chhung hian Kohhran ten kan beram te kan chawm nun zel theih nan engtin nge hma kan lak tak ang? Tih hi zawhna pawimawh tak a ni. Inkhawm leh programme dang kumin chhungin March thla hnu lamah kan neih theih takloh avangin kan awl thawng a, hunawl kan ngah em em tihna erawh a ni der silo, hripui kai hlau chungin hun kan hmang a, zalen viau ang tak, ralti ru tak siin hunk an hmang a, hei hi thil nuam a ni hauh lo. Kan hun hman dan hian kan nitin nunphung a tibuai a, kan eizawnna a nghawng a, kan ngaihdan a her danglama kan thlarau nun chenin a nghawng a ni. Hetiang rilru ang pu hi Kohhran mipuite zingah tam tak an awm mek lai hian Kohhran hian engtin nge hma kan lak ang? Inkhawm theih hun hi kan nghak ngawt ngawt ringatw mai dawn em ni? Kawng dang a awm em?

Hetiang anih lai hian khawpui leh hmun thenkhatah chuan Kohhran hoten tunlai khawvel thiamna leh Media te remchangah hmangin Kohhran programme online in an nei thei reng thung a. Hetianga online kaltlanga Kohhran programme neih hi mi zawng zawng huaplo mahse a hre pha chin leh a ngai pawimawh chin tlem te pawhin an lo hlawkpui chuan thil tha tak anih avangin engmah programme nei lova hun khawhral mai mai ai chuan ruahmanna remchang tak te pawh a ni awm e. Tunlaia Mizoram leh hmun danga Kohhran tam takin Online kaltlanga rawngbawlna an neihna hmanrua langsar zualte chu Zoom Meeting te, Google Meet te, Webex Meet etc te an ni a, heng application te hi mobile phone kaltlang pawha awlsam taka meeting neihna te, programme neih theihna te a ni a, internet signal thatna hmunah chuan a tangkai hle a ni. Heng application te hi awlsam taka midang ten video kaltlanga inbiak pawh nan hman theih a ni a, changkang taka presentation hmang tel chunga thusawi nan pawh hman theih a ni. A thlawnin a application hi download mai theih a ni a, a tangkai hle. Zoom meeting hi thil tihkhawm nan Mizo ten an hmang tangkai hle a, programme tawi te han buatsaih mai nan a tangkai hle a, mahse felfai, darhzau leh mumal taka hmang tur chuan a man chawi a ngai thung.

Heng Social Media te hi sawrkar, pawl leh mimal ten an hmang tangkai hle a. Hetianga mi tam takin an hman tangkai mek hi Kohhran te pawh hian rawngbawlna remchang atana kan chhawr tangkai thiam a tul hle a ni. Ruahmanna felfai tak Kohhranin siam se, a ngaithlatu leh a lo thlirtu tana ninawm lo thei ang turin tawifel takin Kohhran hian online in programme felfai tak hmang thin se, kan rawngbawltute ngaihtuahna chawl thup mai hi tihnun thara, kaihthawh thar an ngai hle a ni.

-          Laldinpuia (2/10/2020) …………..