KA PA

Kha thil thlen dan kha
    Nov 24, 2017(Zirtawpni) a ni a, ka thawhna Presbyterian English School Serchhip-ah kan tih thin danin Zirtawpni tlaiah thawktu zawng zawng te tawngtai rual kan nei thin a. Principal ka nih angin a kaihruaitu ka ni a. Tawngtai thupui an thawh sup sup a, ka pa tana tawngtai thupui te an rawn thawh takah chuan sawizui pahin report ka pe a, ka pa cancer natna avanga Serchhip damdawi ina awm mek chu a that zel thu te, a ngaihtuah awmloh tih thu te ka sawi luam a, zinga school ka kal dawna ka tlawh khan a dinhmun hniam lam a pan lutuk lo ni a, a lan avang khan sawi ka ni a. Tichuan tawngtaina kan neih zawha school kan ban chuan Bazar vela hmelhriat ka pa dinhmun min zawttute hnenah pawh ka pa chu a that zel thu ka chhang a. Mahse khatih hunah khan dawt ka lo sawi reng a ni tih ka lo hre reng reng lo. Tlai ina ka haw chuan zana damdawi ina ka pa riahpui ka rilruah a awm ta tlat mai a, ka pa damloh chhung hian vawi engemaw zah damdawi inah kan lut a, vawi khatmah zan ka riahpui ngailo. Riahpui ka tum pawh hian ka pa khan a ngaih loh thu a sawi zel a, ka nu riahpui loh chu a duhlo. Nupa inhmangaihna hi a lo nasa em a ni tih ka hriat phah. Tichuan a thalai zuanzang zawk ten riahpui lovin ka nu chu kan riahtir ta zel a.

    Damdawi ina zan riah tumin ka chho a, damdawiin ka thlen chuan ka pa chu vawiin lamah a zual deuh avangin ka chhungte thlaphang chuan kan unau chu riak vek turin min ti a. Khami zanah khan a tirah a zual viau naa a hnu lamah erawh a zia leh deuh a, muthlu chungin zan kan hmangral a, a tuk nileng nen. Nov 25 zanah erawh beisei a bo hle mai, zantir atangin a awmdan a hniam tial tial tih kan hmu a, a thaw chu kan en a ni deuh ber mai. Inchhungah chhungkhat hmeichhe ho an awm duh avangin kan unau leh chhunghnai te chu verandah thim hnuaiah ngawi rengin kan ding a, tumah kan inbe lo. Ka pa dinhmun chu kan ngaihtuah tlang a nih hmel. Doctor lo vei vel te chuan, 'theihtawp chu kan chhuah a, Pathian thu thu a ni mai' an rawn ti a. Tihtheih an nei tlem tawh hle tih erawh an chezia atang chuan a lang reng mai si. Kha hun hreawm tak kha a rei hle a ni. Ka pa hnenah khan sawi tur tam tak ka la nei a, mahse ka aw a hria nge hre lo pawh kan hre tawh silo. A damloh laia damdawi ina ka kan thin khan thu tam tak min fah hman a, mahse a chauh kan hlauh avangin a tawngtam deuh chuan tawnglo a awm hahdam turin kan ti thin a, mahse tunah erawh a tawng leh theih tak mialin tiin kan kil thup mai si. A damloh laia a sawiduh zawng zawng kha lo sawitir ila tha tur a nia! Tichuan Nov 25, zan dar 8 a rik chuan khawvel atangin min lo kalsan ta. A tan engkim a tawp ta.

Ka pa thu min hnutchhiah
    Ka pa khan kan napan laiin lo a feh tur ten min hruai ve fo thin a, hnathawk turin min phut ngai lova, hnathawh dan erawh min zirtir fo thin a. Ram hnathawh hahthlak zia te min hrilh a, a takin min entir a, mahse hnathawk turin min phut ngai lova. Kan tan engkim hah takin amahin a thawk mai thin. Midang a phut ve ngailo. Ram hna kan thawh hi a phal ngai lova, kan tih ai amahin tih vek a duh thin, amaherawhchu midang zinga hnathawh leh hnatlan nikhua reng rengah a zawmthaw leh zelthel zinga tello turin min fuih thin. Thil a theih loh ti tawp ai chuan tum chhin phawt hi a duh zawng a ni thin.
    Damdawiina a awm laiin tumkhat ka han kanin he tihian min hrilh, "Hei zankhat mitchhin pawh tawk thei mai ka ni a, chutiang hunah chuan i nu hi tha takin lo enkawl ula. In unau hi tlem te in ni a, in phatsan tham in ni lova, chuvang chuan lo inhmangaih tawn dial dial rawh u. Ro inchuh vang tein in lo intibuai ange, a naupang ber i ni a, i u te thu lo awi thiam ang che" tiin min hrilh. Kei chuan a inngaihtuah lungpuam anga a chauh phah ang tih ka hlauh avangin, "Ka pa i dam leh vat dawn alawm' ka ti a, thildang ka sawipui daih a, mahse a thusawi kha ka rilruah erawh ka vawng reng.
    Ka pa khan Pathian a tih a, a rawng a bawl thin. Mahse sual amah hnimhnai rengtu chu a hnehlo fo thin a, mahse Cancer natna hmangin Pathian chuan alamah a pawt hnai a, a hnukchah thlengin a angchhungah a humhim ta a ni.

    Midangte chhungkaw hlim taka hun an hmang han hmuh te hian khawhar a zual thin a, thu thlukna leh thil han tih dawn a biakrawn tur, 'Ka pa' ti a han koh ve mai tur awm ta lo hi rilru a na thar leh fo thin.

Laldinpuia 25-11-2020