#StayAtHome : DAY 14

Tawpna ni chu!

Tawpna ni han tih hian khawvel tawp lam pang emaw hri len tawp lampang emaw nen inzawmna a nei lem lo a nia! Ni 14 chhung ka quarantine-a a ni tawp ber ka hmang mek a, zanin dar 12 ah hian ka quarantine chu a lo tawp dawn ta tih na mai a ni e. Ka in quarantine hman ni a ka thlalak leh vawiina ka lak ka dah dun chhin a, ka lo danglam hman viau mai! 

Ni 14 kalta a ka hun hman zawng zawng kha ka thlir let a, thil ropui leh dangdai tih ka neilo kher mai! Ka kal na leh chet tlatna vel ka han ngaihtuah a, ka mutna khum atangin ka ban phak deuh vek lehnghal. Mi thenkhat ten ka in quarantine dawn khan lehkhabu te a tam thei ang ber chhiar rawh min ti a, zawm ngei ka tum a, mahse phone kan kawl tawh chuan lehkha chhiar hi a lo har hle a ni. Lehkhabu 3 chiah ka chhiar chhuak hman (Alibaba, Bottle of Lies, Swaraj(Mizo)), hun ka ngah tehreng nen, a ropuilo thei teh e. Ka in quarantine chhung hian thil tam tak ka ngaihtuah lem lo midangte ang thovin Covid 19 chu ka ngaihtuahna luah tam ber a ni. Mizo te hian kan zuam sual ang tih ngawt ka la hlau a ni.  

Pathian that zia hi ka ngaihtuah thin a, mihring finna in a hriat thiam phakloh zia hi a mak a ni. Mizote kan sual leh luhlul tehreng nen Pathianin a hnam anga tun thlenga hremna lian tham min la pelo hi kan vannei ngawt mai. A hmangaihna ropui vang tihloh rual a ni lo. Covid 19 vangin khawvelin Pathian a au a, thil mak khawvel hmun hrang hrangah kan hmu a kan Mizo te zing ngeiah pawh kan hmu. Tuna kan inchhunga harhna hian kan khawtlang nun hi siamtha thei tawh se ka ti ngawt mai. Biak Ina kan harhna in khawtlang a nghawng danglam hleithei si lova. Tunah chuan kan tawmimna inchhung thleng min rawn luhchilh tawh a, hei hian lockdown zawhah khawtlangah rah tha chhuah ngei teh se.

Vawiin chu ni a rei duh hle mai, eng tih mah a tui lo. Naktuk thleng thuai thuai se tih ringawt rilruah a awm. Ka fapa upa zawk lah chuan ka bula awm a chak tawh lutuk a chhunah a reh thei sia ka room luh naah a lo dak deuh reng mai. Min khawih ka phal si lova, "Anih leh hla deuh atangin hmawlhin i ke ka hawlh tal dawn" a ti a, chu erawh ka phalsak ta hram. Pathianin rem a tiha naktuk khawvar min la hruai thleng anih chuan ka chhungte nen hlim takin hun kan hmang thei tawh ang (Doctor pawhin min phalsak thlap tawh e!). 

Ni 14 chhung kha ka thlir let a, dam lohna leh harsatna nei miah lova hun ka hmang thei kha ka va lawm tak em! LALPAN THIL ROPUI TAK MIN TIHSAK A, KA LAWM HLE A NI.

- Laldinpuia