BPL chhungkua(PMUY Beneficiary) te tan thla 3 chhung Gas a thlawnin

Consumer te i harh ang u –XXIII

(Pradhan Mantri Garib Kalyan Yojana (PMGKY) Scheme)

Sawrkar laipui chuan Covid-19 vanga harsatna thleng mekah mi rethei leh harsa zawk te dawmkanna turin kawng hrang hrangin hma a la mek a. Hemi atan hian scheme thar ‘Pradhan Mantri Garib Kalyan Yojana’ (PMGKY) tih chu a duang chhuak a, he scheme kaltlang hian BPL Gas Free connection tihsak tawh ‘Ujwala beneficiaries’ te tan April-June 2020 chhungin Gas a thlawna pek a ni ang. He Scheme hian Pradhan Mantri Ujwala Yojana(PMUY)hnuaia Gas Connection nei zawng zawng a huam dawn a. Connection ti thi tawh emaw, transfer tawh emaw chu a huam lovang. Hetiang hi kalphung tur tlangpui chu a ni ang –

• PMUY hnuaia Gas connection nei zawng zawng Bank account ah April chawlhkar khat naah Gas man thar ber (Revised Selling Price) milin pawisa thun a ni ang a, pawisa thun anih thu hi customer phone no ah sms hmanga hrilh an ni ang. Customer te chuan he pawisa hi Gas lak nan an hmang thei dawn a ni. Pawisa dang hi May thla leh June thlaah thun leh a ni ang. Gas man hi Customer ten connection an neih ang(14.2 Kg refill emaw 5 Kg refill emaw) zelin thunsak an ni ang.

• Customer te chuan an Gas subsidy luhna Bank Account kha pawisa a luh leh luh loh an check ang a, pawisa a lut lo anih chuan Gas Agency ah complaint tur a ni. Tunah hian pawisa hi 1st installment thun tawh a ni.

• SMS an dawng theilo emaw, an Gas connection nena an thlunzawm an phone number an hmang tawhlo anih chuan Gas Agency-ah kalin an mobile number siamthattir tur a ni.

• Customer te hian Gas semna atangin Gas hi a thlawnin an dawng ringawt dawn lova, sawrkarin an account a Gas man tur a lo thunsak kha Gas lakna man tur a ni.

• He Scheme hnuaia thla 3 chhunga Gas a thlawna la te chuan an Bank Account ah subsidy hranpa an dawng lovang. Gas man tur erawh an account ah an dawng thung ang.

• Gas refill hi refill atanga ni 15 a ral hma chu a dang lak leh theih a ni tawh lo.

• He Scheme atan hian State wise quota hranpa a awm lo a, India ram puma Ujwala Gas connection nei zawng zawng ten thla 3 chhung(April-June 2020) Gas bur 3 a thlawnin an dawng dawn a ni.

• He Scheme kaltlanga Gas lak dan turah a hnauai tarlan khawi emaw ber hmang hian Gas booking tih tur a ni:

 Customer te chuan Gas refill hi Mobile phone-a IVRS(Intensive Voice Response System)/SMS/Whatsapp hmangin an book tur a ni.

 Mobile Phone Apps hmang emaw, website kaltlang emaw, OMC number missed call a book tur a ni.

 Annexture Form-I kaltlangin a book theih bawk. (Hei hi mahni distributor te hnenah a zawh theih ang).

Sawrkar laipui ina BPL Gas Connection neitu te tana hamthatna a siam hi a dawng thei tur chuan kan dawn ngei hi a tha a, dawng thei si phone number emaw Bank account emaw harsatna awm avanga dawnglo kan awm anih chuan Distributor te hnenah emaw Serchhip District Consumer Association te hnenah in report tur a ni e. Mipui ten an chanvo an dawn theuh theih nan Supply Department leh District Consumer Association te chuan theihtawpa hmalak mek zel a ni e.

- Laldinpuia