PMJDY Bank Account nei te tana hamthatna

Consumer te i harh ang u –XXII

Pradhan Mantri Jan Dhan Yojana(PMJDY) hi India sawrkar programme hnuaia kum 2014 atanga din tan a ni a, India khua leh tui a tam thei ang ber tena Bank Account an neih theih nana Prime Minister Narendra Modi-a hmalaknaa din a ni. He Scheme hnuaiah hian India khua leh tui tupawh kum 10 chin chunglamin Bank Account an hawng thei. He programme hi kum 2014, August 15 (India Independence Day ni tak) khan Modi-a hian a lo hawng nghe nghe. He Scheme hi Department of Financial Services, Ministry of Finance, Govt of India in a enkawl a ni a, April 9, 2020 thlenga an website a an record danin he scheme hnuaia Bank account nei hi mi vaibelchhe 38.8 an awm tawh a, an account a an sum dah belhkhawm chu vaibelchhe 119,706.97 a ni. He Scheme an hawn ni(August 14,2014) hian mi maktaduai 15 in account an hawng nghal a. Ni 23-29, August, 2014 khan mi 18,096,1030 in account an hawng thar hman a. Hei hi Guiness World Record-ah kar khat chhunga Bank Account hawng tam ber tiin record a ni nghe nghe.

PMJDY Account nei te hlawkna

PMJDY Account hi sawrkarin Bank Account nei ngailo ten Bank Account an neih a, Bank an chhawr tangkai theih nana a ruahman anih angina Saving Bank Account pangngai anglo takin hamnthatna engemaw zata thuam a ni a, hei hi account neite tan a tangkai hle.

• Account hawn nan hian pawisa chawi a ngai lova, minimum balance a ngailo bawk. Zero balance in account a maintain theih tihna a ni.

• PMJDY Account neite hnenah hian RuPay Debit Card(ATM Card) pekchhuah a ni.

• He Scheme hnuaia Bank Account nei ten accident an tawhin cheng nuai 1 thleng insurance pek an ni. (Hei hi kum 2018 atangin Rs nuai 2 a tihsan a ni).

• He Scheme hnuaia Bank Account nei (15.8.2014 atanga ni 31.1.2015 chhunga Account hawng te) an boral anih chuan Rs 30,000/- an chhung ten an dawng ang.

• He Scheme nei te hnenah an account a sum a awm remchanloh pawhin Overdraft hmangin Rs 10,000 thleng an hman phalsak a ni.

Accident insurance

He Scheme hian hamthatna a ken zinga pawimawh tak chu Accident insurance hi a ni. PMJDY Account nei, Rupay ATM Card nei te chuan accident an tawh hma ni 90 chhunga vawi khat tal an Bank account hmang a transaction an lo siam hman anih chuan Insurance Rs nuai 2 an claim thei a ni. Hemi claim tur hian Account hawnna Bank-ah kalin form fill up tur a awm bakah document tul te submit tur a ni a, accident atanga ni 60 chhungin document hi submit ngei ngei tur a ni. He insurance hian accident avanga boral te chauh a huam a, mahni intihlum emaw natna avanga boral te emaw a huam lo.

PMDJY Account nei te tan Covid-19 chhawmdawlna

Finance Minister Nirmala Sitharaman chuan March 26 khan Dovid-19 avanga chhawmdawl nan PMJDY account nei hmeichhia te hnenah thla thum chhung atan(April-June) Rs 500 zel an thunsak tur thu a sawi a, hei hi India rama hmeichhia he account nei mi vaibelchhe 4.07 a huam dawn a ni. PMDJY account nei hmeichhia te hnenah April 2020-ah Rs 500 theuh an thunsak a, May leh June ah Rs 500 ve ve thunsak leh a ni ang.

- Laldinpuia