#StayAtHome : DAY 13

Ni khat chiah a ngai ta!

Ni khat hnuah chuan ka hreawm dan a zia deuh tawh ang chu! Vawiin chhunah Health Dept lam atangin quarantine ka nih angin min rawn phone a, harsatna ka neih leh neihloh min rawn zawt , ka neih loh thu ka chhang a. "I Quarantine hi vawiinah a zo dawn a, " a rawn ti a, kei chuan, "naktuk alawm" ka ti a, vawiin a nih thu a rawn sawi leh talh a. Kan inhnial ta hrep a, "Ni 19 ah i rawn thleng a, i thlenni kha chhiar nghal a ni a vawiin hi a ni 14 na a ni" a rawn ti leh a. Kei chuan a 13 na anih thu sawiin "Calendar kha en la han chhiar teh" ka ti deuh kher a, a ni a han chhiar kauh kauh a, "e ni khat i la bak anih hi" a rawn ti ta a. Damlo ta ila a client ka ni ang tih ka hlau ang reng! 

Hmanniah DC office atangin min rawn bia a, "A huhova Quarantine ho veng tura ruat i ni a dar 3 ah DC Office ah rawn in report rawh," a rawn ti a, kei chuan, "Hei kei pawh Quarantine in ka awm mek sia ka rawn kal thei lo ang," ka ti a, "lo chhuak tawp rawh" min rawn ti talh bawk a. March 19 ah Aizawl kan rawn thlenin Airport chhungah min check a Doctor in phai atanga haw kan nih avangin ni 14 chhung chu tumah midang khawih loh tur, chaw pawh chhungte zinga ei lovin a hrang a ei tur, chhungte bulah awmloh tur....tih min hrilh teuh a, a hnuah airport pawnah midang nena taxi a chuangho turin min chhuah zalen leh tho bawk a. Thil awmdan ka thlir hian mipui lam ai hian sawrkar thuneitu leh a hnathawk te hian tuna kan hri hlauh mek hi an ngai pawimawh lo zawk a ni awm mang e, tih ka rilruah a awm rauh rauh mai.

Vawiin chu Serchhip zikhlum man to chungchang a lar hle, ka awm hmun atangin theih ang ang ka phone kual a, Aizawl a Local Task Force lam atangin doc a theih ang anh te ka dil bawk a. Ka document neih atang chuan hah taka thawktu loneitute aia  hlawk zawk fe an awm niin a lang a, a pawi hle mai. Kan ramah hian Pathian thu harhnain min tuam mek lai hian simna tellova piantharna chang an lo la awm nual niin a lang.