#StayAtHome : DAY 12

Quarantine chhunga ka lehkhabu chhiar 3-na Swaraj by Arvind Kejriwal(Mizo tawnga leh) chu ka chhiar zo a, mipui rorelna a tarlan hian rilru a luah khawp mai. Democracy ram India a tuna kan dinhmuna mipui kan lal loh dan te rilruah a lo lang a, mipui tan a thawk tur sawrkar hnathawk ten mipuite beisei an phakloh thin zia leh mipuite beidawn ruk thin zia te rilruah a lo lang a. Kan kalphung siamthat atana duhawm deuh deuh nen a lo lang zut zut mai. Mipui rorelna leh mipui sawrkar chungchang hi chu lockdown zawh huna  la sawizauah khek ang.

Chawhnu lamah thian thenkhat ten min rawn phone hlawm a, "Ni engtik nge i inkhung tawh?" tih chu zawhna ka dawn ngei ngei a ni, kei chuan ni 12 na ka hman mek thuin ka chhang hlawm a. Mak tak maiin vawiina min rawn phone tute chuan, "I zawh tep tawh chu, tunah engmah insawiselna i neilo anih phei chuan i chhung te fin daih tawh rawh. Tuman an hre tak tak chuang lovang. I fate an khawngaih thlak e," tiin thurawn inang min rawn pe sup sup mai a. Rilru a phawklek duh hle mai. Kei chuan, "Ni khawp mai, mahse quarantine period tura doctor in min hrilh kha ni 14 a ni sia, a thleng tep tawh e. Ka'n nghak law law ange' ka ti thei hram. Thlemna a lian sawt ta viau mai, fate lah chuan min thlahlel tawh a, ka hmuh theih turin an rawn thulang awllo tawh mai. Fate min thlir reng laia kalsawn san kha ka hreh bawk si a, kan inthlir leh ngawih ngawih thin. Ka chaw ei lai thlengin min hmuh an duh a, min titipui sek an tum hlawm bawk nen! Kei lahin ka ngai ve tawh bawk a, chawhnu lamah pawna ka fapa infiam ka va bihthla thul!

Ka rilruah Bible+a Suria sipai hotu Namaan-a phar damdawi kha ka hrechhuak zawk.mai, Jordan lui a vawi 7 inchiah anih kha. Vawi 7 chiah anih kher kha! Pathian hnenah ka quarantine dawn leh ka inkhung chhung hian theihtawpin ka dil a, ni 14 ka inkhung chhunga harsatna ka tawh loh nan leh he hri laka ka fihlim theih nan. Tunah ni 12 a ni tawh naa engmah harsatna ka neilo tih vanga ka tawpsan ringawt chuan dawt ka sawi tihna a ni dawn si a, engkimtithei Pathian hmaa ka thutiam hi ka bawhpelh theilo a ni. Chuvang chuan he hri laka ka him theihna awmchhun chu THUAWIH hi a ni tih ka hria. Covid-19 hi a invenna damdawi awmchhun chu thuawih hi a ni. Covid-19 hri kan vei loh nan sawrkar thu i awih ang u.