#StayAtHome : DAY 11

Tv Fredick Lalrindika kaltlanga TV Home Crusade neih chuan Covid-19 boruak thim tak a luahlana a lawmawm phian mai. Mizo Kristian, hri vei hlau reng renga inkharkhip te tan thlamuanna a rawn thleng ta niin a ngaih theih a, mi tam takin piantharna an chang niin social media atangin ka lo hria a, thil lawmawm tak a ni. Pathian hnathawh ropui tak a thleng hi a lawmawm hle a ni. Hetih laia Social Media vela sawrkar dan kalh zawnga pawn lama zai leh lam hup hup hmuh tur a awm erawh kha chu a pawi hle mai. Mizo Kristian ze thalo kan tih thin, mahni inthununna tello a rilrua a thawj dan ang apianga chet mai thin zia kha a lo lang leh ta a ni ber e. A va zialo tak em! Phai atanga rawn haw insawiselna nei lemlo pawh sawrkar thu zawma ni 14 inkhung hran hin kan neih mek lai hian khang tuna a hri tai darh mek laia a huhova dan kalha lo awmkhawm te kha chu sawrkar lam hian dan khauh tak hnuaiah ni 14 chhung quarantine ve awm tak a ni!

Speaker ber pawh khan, sawrkar dan zawm a pawimawhzia kha a sawi lawm lawm si a, chuti chunga Covid-19 kai ve theilo ang maia sawrkarin inkharkhipna khauh tak a kenkawh laia a bawhchhe zawnga an che ta mai kha chu a pawi hle mai. Pathian thu hi kan la zawm tak tak theilo a ni awm mang e.

Ringtute hian he khawvela kan awm chhung chuan sawrkar dan zawm te, khua leh tui tha nih te, midang tana harsatna siamtu ni lova kan chhehvela mite tanpuitu nih zawk hi kan tih tur a ni. Sawrkar dan pawh kan pawisa tawhlo anih chuan kan thlarau chan chu midang tan pawm a har tawh khawp ang. Pathian thu(Bible) te hi duh lai lai lachhuaka kan thlarau chan leh kan hun tawng nena hmehbel phet kan tum (a context lam thlir si lovin) te hi i fimkhur deuh teh ang u. Engkimtithei Pathian leh a thu thianghlim te hi kan khal kual nasa lutuk mah mah deuh a ni.

Hawh u, sawrkar dan zawmin mahni inah inkhung theuh ila, kan chhungkua leh keimahni mimalah harhna lo thleng se. Chu harhna chuan nakinah quarantine zawh huna kan chhuahvah theih hunah midang kangkai rawh se.

- Laldinpuia