#StayAtHome : DAY 10

Ni 4 chiah nghah a ngai ta!
Ka in quarantine na room kawngka pawnlamah 'Khawngaih takin inchhungah lo lut lo hram ang che" tih ka tar a. Rilru a kal thui hle. Hetiang ang tar a ngai ta mai hi a mak hle mai, mahse tunlai khawvelah chuan tih makmawh a ni bawk si. Hmanlai atanga kan Mizo pipu nunah chuan thenawm te nena inlenpawh tam te kha mifel nihna, khawtlanga mi chal lang leh mi fak hlawhna a ni a, mikhual leh inleng pawh nei ngailo chu an en dan pawh a dang deuh anih kha. Covid-19 avang hian kha culture kha kan tunlai khawvel hian a thlauhthla chiang hle mai. Tunah chuan inleng neilo apiang mifing anni a, thenawm khawveng a leng lova mahni chhungkua inkhung bo thei apiang awhawm an ni ta. Thenawm tha nih tum buai a ngai ta lova, engkim mahni tanghma vek a ni ta. A va khawhar thlak tak em! Engtikah tak he inkharkhipna hi kiang ang maw??

Mipui te hian kan ram leh hnam hi a him a ralmuang taka a awm kan duh chuan kan ram hruaitute thu leh hla hi kan ngaihsak a kan zawm a tha hle mai. Tunah pawh mipui te kan him theihna ber turin sawrkarin thuneihna a lekkawh mek a, mipui te hian i zawm hram hram ang u. Sawrkar tiluhaitu ni lovin khua leh tui tha kan nihna hi i lantir zawk ang u. Sawrkar hian tumah riltama kan thih a remti dawnlo, chuvang chuan sawrkar hmalakna zawm ila i ngaichang thiam ang u. He hri hian engtik thleng nge min tihbuai dawn kan hrelo, tuna kan fimkhur hi nakina kan zalen hma na tur zawk ani tih hria ila, he hri kan kai loh nan theihtawpin tun hunah hian i fimkhur zui zel ang u.

America president boral ta John F Kennedy-a khan, "I ramin enge a tihsak theih che zawt lovin i ram tan enge i tih theih zawt zawk rawh" a lo ti a. Ka ram tan enge ka ve theih ang ti a ka zawhna chhanna chu 'I inah inkhung rawh' tih a ni. Ka zawm nghal e.

- Laldinpuia