#StayAtHome : DAY 9

'Quarantine atana ka ni la bak aiin ka ni hmanral a tam tawh zawk a, chhungte bulah ka awm thei tep tawh e' ti a beiseina sang tak nen ka mut laiin vawiinah chawhnu herah phone call ka dawng a, Hospital lam atangin a ni a, ka dinhmun te min rawn zawt a, depression ka neih leh neihloh te, insawiselna ka neih leh neihloh te min rawn zawt teuh mai a, kei chuan ka that thuin ka chhang zel a. A hnuah, "Ni 14 inkhung hran tur anih kha i hria maw" a ti a, ka hriat thu ka chhang a, "Ni 14 i inkhung hran chhung khan i chanchin kan rawn zawt zel dawn che a, ni 14 a ral hnuah pawh ni 14 dang nitin i chanchin report a ngaih avangin i chhunzawm leh zel a la ngai ang," a rawn ti chu ka phu zawk mai, enge ka sawi zui pawh ka hre mumal lo, "naktukah ka rawn be leh ang che" a tih chu ka hria a, phone a dah a. Ka rilru a mangang thut mai a, 'ni 14 hreawm ti takin ka inkhung dawn a, tunah ni 9 na ka hmang mek a, ka chhungte ka fin thei tep tawh e, ti a beiseina nen hma lam hu  ka lo siangtuah mek laiin, ni 14 a zawh a ni 14 dang chhunzawm leh chu a va rapthlak dawn ve,' tin ka ngaihtuah a, ka awm a nuam thei ta reng reng lo mai a. Depression ka nei lo ka ti zo chauh na a ka nei tan derin ka hre hial!

Ka ngaih thalo chuan Quarantine lama kan hotu ber Doctor chu ka bia a, ka zawt fiah ta ngat a, ani chuan, "Ni 14 a zawh a insawiselna i neih loh chuan i chhungte i fin thei ang, mahse insawiselna i neih erawh chuan hospital lamah i rawn report vat thung dawn nia" min ti ta a, ka thaw a veng huai mai. Vawiina min rawn phone tu nen khan tawngkam kan inhrefiah tawklo a nih dawn hi ka ti ta a.

Tlaiah ration sem a ni a, chhungkua a mipa puitling awmchhun ka che thei si lova, nu berin a thiar ngauh ngauh mai a....Inhnuai Veranda step atangin ka en reng a, a inthlahrunawm duh hle. Inchhungah mipa hna khawih tur neuh neuh a awm nual a, a khawihtu ber damlo ni si lovin kan che thei der lo mai a, a zialo hle! Ram leh hnam chhan nan inkhung erawh a ngai lawi si!

Nimin lamah kan sawrkar hotuten 'mahni huana kal duh chu dan loh tur' tih thuchhuah an siam chuan kan Mizo mize thalo a tichhuak dawn a ang hle mai. Vawiin lamah pawh veng thenkhatah chuan zu zawng leh leng duh te pawhin huana kal permit an la fur ni awm tak a ni. Huana kal permit la a mi sangha dila sangha lo man ru pawh an awm a ni awm e. A pawi thin hle mai, Mizo te hian heng khawtlang buma dan pawisa lote lakah hian dan khauh taka kenkawh hi kan mamawh ta niin a lang. Misual te hi dim lovin dan hmanga hmehmih tum hi a tha tawh zawk awm mang e.

- Laldinpuia (March 27)