#StayAtHome : DAY 7

Self-quarantine in ni 7 lai chu ka inkhung hrang ta. Kan vengah chuan YMA te theihtawp chhuahin mipui ten pawn an chhuahloh nan an duty a, kei erawh min phut eih lo! Ka inkhung hrang hi an lawm zawk tlat mai, a va hahdam thlakin a va hreawm si em!

Ka inkhungna room-ah TV en tur a awm si lova, phone erawh duh tawkin ka khawih thei a, a zia viau. Mahse mit leh kut zungpui erawh a kham duh deuh! Vawiin chu social media velah Mizo ten dan kan zawm loh zia leh kan fimkhur loh zia post hmuh tur a tam hle. Positive 1 vawiina hriat a ni chuan rilru a khawih hle, hriat anih hnu lawka ama mimal hming leh chanchin kimchang a darh nghal zung zung erawh a pawi. A dinhmunah inchan ta ila a khawngaihthlak khawp mai.

Tukin ka zing tho chu kawtah ka chhuak a, tihian ka ngaihtuah a, "Ni 7 a ni tawh a, engmah natna ka nei si lova, engatinge hetia inkhunghran reng hi a tulna le. Ka kai loh tih a chiang viau tawh lawm ni? Ni 7 hreawm ka tuar tawh a, mahni inchhung(inhnuaiah) ka tawm a, chhungte thawm ka hre pha a, ka thutpui thei silo. Fate tap thawm ka hria a, ka han hnem thei si lo. Mahni inchhungah pawh lut ngam lova awm reng hi enge a tulna, mi dang pawh an fimkhur seng chuang bik hleinem" tiin keimah leh keimah ka inzawt a. Mahse Lengpui airport a doctor ten ni 14 inkhung tur ti a min hrilh leh a hnua kan District hotute ka phone a, "Ni 14 i chhungte khawih miah lovin nangmahin i inkhung hrang thei angem? " ti a min zawhna, "ka thei ang" ti a ka chhanna kha ka rilruah a lo lang leh thin. Thu ka tiam tawh a, ka hlen tur a ni. Sawrkar thuchhuak chu ka zawm mai tur a ni, ka taksaah natna ka nei emaw ka neilo emaw sawrkar thuchhuak zawm hi ka tan a tha ber a ni, tih hian min hneh leh thin

Hawh u, tunhnaia phai atanga haw Mizo leh hnam dang Mizoram ami zawng zawng te u, he thu hi ka chah duh che u. Sawrkar thupek chu i zawm mai ang u. Damlohna leh inrinhlelhna kan neilo pawh a ni thei, Mizoram pawn atanga haw kan nih hrim hrim chuan he thupek hi zawmin ni 14 i inkhung hrang hram hram ang u. Kan chhungte, kan veng mi leh sa te, kan Mizo pui te leh kan hmangaih te i ti thlabar lovang u. He Covid-19 hi khawimaw daikilkar atanga rawn chhuak tur ani lova, ram dang atanga kan rama rawn lut ten an ken luh palh tur a ni tih hrereng ila. Chuvang chuan kan ram leh hnam him nan ni 14 chhung i inkhung hram hram ang u. I ram leh hnam, i Mizopui te i hmangaih anih chuan he thupek hi lo zawm ve hram teh.