#StayAtHome : DAY 6

Vawiin chu Covid-16 chungchanga Mizoram chhung leh pawna Zofate inkara thlir dan inanglo hi ka rilruah ka vei tlat pek a. He thil hi a tak ngeia tawngtu ka nih avangin sawi ve ka duh.

March 18,2020 khan kan zinna hmun Pasighat, Arunachal atangin Dibugarh-ah Train a Guwahati a phei tumin kan kal a, hetih lai hian Covid-19 avangin Mizote kan ralkhel hle tawh a, Assam sawrkar pawhin hmun thenkhatah chuan School leh Office a khar vek tawh. Dibugarh University-ah kan kal a, Covid-19 avangin Compound chhungah luh theih a ni tawh lo.  Hetih lai hian vai ho chu a then an phili viau tawh laiin ngai thutak lemlo leh hlauh nachang hrelo pawh an tam mai. Mizote chu kan buai hle tawh a, kan fimkhur tawh khawp mai. Hetiang ang boruakah hian phai lama awmhmun nghet neilo, zin veivak tan phei chuan mahni ram lama haw hlan a nghahhlelh awm duh hle. Kan Flight hi Guwahati to Aizawl March, 19 a ni a. Dibugarh-a kan awm lai hian Covid-19 vangin Go Air in Aizawla an Flight Service an ti tawp vek an rawn ti thut mai a, kan buai hle. Engtin nge kan tih tak ang?

Mahni chhungte awmlohna mi ram atanga he hripui thawm hriat chu a thlamuanthlak lem loh khawp mai. Dibugarh-ah hian Mizo Missionary, vai inluah te inah kan innghat a, an inluahna neitu vai chuan Missionary te chu kan chanchin te, kan zinna hmun te a lo zawt a, min lo hlau viau a ni awm e, keini pawh kan awm a nuam tehchiam lo. 'Flight cancel anih chuan Bus in haw mai ang' kan ti a, Bus ticket online in kan en a, a lo full vek tawh bawk nen, mang a ang duh hle. Haw theilo ta ila engtin nge kan awm ang? tih mawlh chu kan rilru kaptu a ni. Tun ang hunah Hotelah thlenna kan hmu angem? Kan Mizo pui te pawhin khualzin tun ang hunah an mikhual duh angem? tih chu kan zawhna chhan harsa tak a ni.

Mahse vanneihthlak takin Flight an cancel leh loh thu kan hre hlauh mai chu a lawmawm duh hle mai. Hei vang hian mahni ramah tluang takin kan lo thlen theih phah a ni.

Hemi ka sawi duhna chhan chu tunlai hian mi thenkhatin Social Media ah 'Covid-19 hi phailam atanga rawn haw te bak hian an pu darh dawnlo, kan ram luhna zawng zawng inkhar ang u' tih lam thu an thehdarh nasa hle a. Mizoram chhung atanga thlir chuan thil awm tak pawh a ni, mahse Mizoram pawnah Mizorama haw chak tak chunga kan awm laia hetiang thawm kan hriata a ruka kan manganzia ka ngaihtuah kha chuan thil hi thlir zau ve chu a tha mang e, tih ka tilruah a lo lang thin. Mizoram pawna kan Mizopui tam tak awm te hi rawn haw chak ngawih ngawih,  duh hun huna haw theilo an ni tih erawh kan hriatpui a tha khawp mai. An laka kawng kan lo khar mai zawngin mi ramah lainattu nei lovin an vakvai mai dawn si a.  Kan mihausa leh awmthei fa te a haw tur ang chu an rawn haw kim tawh pawh a ni thei e, mahse mahni inchawm chunga mihnuaia inhlawhfa ve hram hram, duh hun huna haw ve theilo te Mizoram pawnah kan thalai tam tak an awm tih hi i theihnghilh lovang u. Heng mite hi lo welcome a an awmna hmuna fimkhur tura hnem tur zawk kan ni.

Chuvang chuan he Covid-19 hri hlauhawm tak, khawvel ram hrang hrang tena inthurual taka an do rawn hi keini Zofa tlemte te hian unau inhmuh thiamloh phah nan kan lo hmang hlauh dah ang e, kan tawngkam leh thusawi danah te i fimkhur ang u. Mahni hma kan sial lutuk nalamah hian kan hnam inpumkhatnaah pawi kan khawih palh ang tih a hlauhawm e. He hri hi kan ramah a luh kan hlau a, sawrkar leh pawl hrang hrangin kan do tlang a, a lawmawm e. Fimkhur tak chungin theihtawp i chhuah zel ang u.

-Laldinpuia