#StayAtHome : DAY 5

Vawiin chu ka fapa naupang zawkin ka bula awm a chak tlat mai a, kan phal si lova, zing chaw eikhamah step a inhlat deuh taka thu chungin kan inkawm e.

Vawiin chu kan India ram inbuatsaih dan leh mipui chinchang hrelo tam lutuk hian ka rilru a tihah hle mai. Khawvel ralthuam hlauhawm ber ai pawha mite tih leh hlauh, khawvel ram hausa ber pawh rum tir theitu Corona Virus (Covid-19) lakah hian India ram chuan inbuatsaihna hun tha a neih tehreng nen he natna laka fihlim lam pan aiin hun thim leh khirh khan kan hmachhawn mek zel niin a lang ta mah mah mai.

India ram hi ram ropui kan lo inti thin a, mahse kan ropuina hi mihring kan lo tam vang mai niin a hriat ta zawk mah. Sawrkarin theihtawp chhuaha hma a la chungin khawvel ram dangin an hlauh em em Covic-19 hi kan hrechiang lo hle niin a lang zawk ta mah mai. Kan Hindu puithiam thenkhat lahin Bawng zun ina do hneh theiha an ngai tlat te, PM in Janta Curfew a puan ni a, tlai dar 5 a Covid-19 ven naa thawktute lawm nana kut ben paha inhawrkhawma motor leh ke a khawlai fang ta mai kan la awm te hian kan ram chhang chhiat zia a tilang chiang hle. Tuna a lan danah chuan India hian Corona Virus hneh ai chuan he natna avang hian chhiatna lian tak kan tawk dawn niin a ngaih theih, a pawi hle mai.

Mizoram hi he natna atanga kan fihlim leh fihlim loh hi a hriat chiah tawhloh a, mahse mipui vantlanga a darh zel tur veng tur chuan tih theih kan la nei niin ka hria. Kan sawrkar hotute leh tlawmngai pawl te hmalakna hi theihtawpin tawiawm ila, he hri hlauhawm tak hi i do zel ang u. Mizote hi kan duh phawt chuan hnam tangrual thei kan ni, hawh u i tangrual ang u. Nakina kan rum loh nan tun hunah hian thuawih ila kan theih tawkin i fimkhur ang u. India ram hmun danga miten ngai pawimawhlo pawh nise keini Mizo te hi chuan anmahni entawn lovin a hlauhawmzia hre rengin kam theihna zawng zawng nen i fimkhur ang u.

Kan theihtawp kan chhuah bakah mi tanpui theitu vanah Pathian kan nei tih hrereng bawk ila. Keimahni, kan chhungte, kan laina te leh kan Mizo pui te he hri laka kan him theih nan tawngtai ila. Khawvela he hri tuartu, mangang leh thlabar taka hun hmang mek te hi i tawngtaipui bawk ang u.