#StayAtHome : DAY 4

Ni 4 lai a liam ta!

Hun hi a kal chak kan ti thin tak na a, bang sana inkhawng thlir chunga hun han hman meuh chuan a lo kal chak lo tawp mai.

Tukin zing ka thawh hlimah kawtah ka han chhuak a, ka fapa upa zawk kum 4 mi chu a pi nen kawtah an lo awm dun a, min hmu chu "a pa khawnge i awm bo daih a, i zin rei tawh lutuk a," min lo ti. Api ten ka awmna min zawhin ka zin tiin an lo hrilh thin a ni awm e. Vawiin hi India Prime Minister Pu Modi-a'n India ram pumah CURFEW a puang a ni awm e. Tumah pawnchhuah phalloh an ti, kei erawh chu ni 3 kalta atang khan Sawrkarin Curfew min puan hnan tawh a, vawiina curfew hi thil thar a ni lem lo.

Vawiin hi Pathianni a ni a, nidang chu nise Biak Ina inkhawm tur a ni, mahse Covid-19 vangin Kohhranin inkhawm a thulh. Chhungkaw tam tak chuan mahni inah hun te hmangin inkhawm ang chiaha hun hmang te, Pathian thu sawina hun atana hmang te an awm ang. Mahse keini chhung ve zawng kan ti thei ta lo(mask vuah chunga sermon thlak a har riau a!), chhung inkhawm erawh kan hmang thei ve zel e. Tukin chhung inkhawmah chhungte thutna atanga hla deuh hlekah dingin Mask vuah chungin hun ka hmang.

Chhun lam a reh ngawih ngawih...ka fate infiam thawm mut hmun atangin ka ngai thla. "Apa motor min hawn hi a lo thleng har tawh e", apa hi khawnge a awm daih le?" an tih ri chuan ka zalen lo tih min hriat chhuahtir thin. Zanriah ei dawnah chhung inkhawm naah chhungte dang thutthlenga an thut laiin anmahni hlat thei ang berin chhuatah ka ding a, hun hmangtu tawngtai lai takin ka fapa naupang zawk chuan, "apa hnenah ka kal duh" tih pahin ka lamah a rawn phei thut mai a, tawngtai laiin ka tlanchhiat tak zuk zuk kha! Chaw eikhamah ka kawr hawnsak hain pawna ka awm kawngka bula dingin min rawn hmuh.

Social media velah mi thenkhatin Covid-19 avanga sawrkar leh NGO kan inbuatsaih dan leh kan hlauh dan hi a nep zawnga sawi an awm thin tih ka hria a, a pawi ka ti hle mai. Hriatlohna hian mifing deuh tura ngaih pawh hi mi mawlah a chhuah thin a lo ni. Internet lamah Italy ho tawrhdan ka en a, Covid-19 vei te tawrhdan ka hmu a, a rapthlak hle mai. Sawrkarin hma a la viau naa kan inveng tha duhlo leh India mite zinga fimkhur lo kan awm thin hi a pawi khawp mai. India chuan Covid-19 vei nitin a neih belh zel, chutih laiin Mizo te erawh kan la him hlauh. Kan him reng thei angem? tih erawh beisei a sang tehchiam lo. Amaherawh chu mipui te kan tanrual phawt chuan vei lo awm ta pawh ni ila, chhiatna lian zawk a thlen hmain kan veng hneh thei ang. Kei ni ang damdawi tha nei lo, damdawi in duhkhawp nei lo leh zuk leh hmuam leh cancer vei tamna ramah chuan he hri rapthlak khawvel chawk buaitu Covid-19 hi lo thleng lo hram teh se.