#StayAtHome DAY 3

#StayAtHome : DAY 3

Tunhnaiah phaia ka lo zin ta kher kher chu aw.... Tih mai a awl tan ta riau mai. 'Engkim mai hi engmahlo mai a lo ni' Thuhriltu in a lo tih kha a thleng dik chho tan dawn niin a lang. Awmna ngaia Minute 10 pawh rei ti thin kha ni 3 ka awm ta. Thutna ngaiah kan thu reng peih si lova mahni mutna khum kan hel kan hel mai zawng anih hi!

Mahse vawiin lam chu ka vannei a, nimin lam aiin ka awmna a nuam ta. Thenawm te inhnuai siam chawpa ni 14 inkhung ka tum kha chhung ten an ngaingam lova, nupui fanau ten an room min kian a, inchung lamah chhuatah an riak a. Inhnuai lama kan roomah keimah in ka awm thei ta, mutbu tha erawh ka chang lo! Tunah chuan chhungte titi ka hre phak a, inchunga fate inchhaih thawm pawh hnai takah ka hre phak ta! Chhunah kawngka inhawng saah ka han dak zeuh zeuh ngam ta. Naupangin min hmuh erawh chuan "a pa, a pa motor lem min hawn em?" an lo ti chul a, kei erawh chuan, 'Bawihte, ka chah mek a lo thleng trep, ka bul hnaiah lokal suh' tih pahin ka tlanchhiat san. Tum dang chu nise ka pawm anga ka kokichhuan leh ngei awm si a.

Zanriah eidawna chhung inkhawmah an bulhnaia awm ngam si lovin ding chungin ka tel ve thei tawh a, veranda-ah ka chaw tur min pe a, ka chaw ei zawh thutchawlh pahin inchhung lama ka chhungte chaw ei pawh ka thlir thei ta e!

Engvangin nge mi tam tak pawhin he hri hi engahmah an ngai lova, sawrkarin inkhung hran tur a tih pawhin an zawm duh si lova, kei hian zawm ka tum bik le tih ka inzawt thin. Mahse he ka thiltihah hian miten ho ti mahse ka inchhir tlat lo, phaiah ka zin a, kan rama hri thalo hawn thei ka nih avangin dan angin ka in report a, ni 14 inkhung hrang turin Doctor ten min hrilh a, ka zawm mai a ni. He hri (covid-19) in khawvel a tihbuai zia ka hria a, mithiam te leh khawvel ram ropui te an manganzia ka hria a, keimah, ka chhung te, ka laina te leh ka chipui Mizo ten kan kai ve ang tih ka hlau em em a, theih ang tawkin ka inveng ve a ni. COVID-19 kan state a a rawn luh ve loh nan ka tih theih tawk ka ti ve a ni e.

Pathian hnenah COVID-19 kan state a rawn luh ve loh nan ka tawngtai a, kei leh ka chhung ten kan kai ve loh nan ka dil thin a. Pathian tanpui tlaka ka awm theih nan theihtawp ka lo chhuah ve a ni.