Mizote hi Corona virus laka kan him reng thei angem? Part-II

-Laldinpuia
(Ka thil hmuh leh hriatte atanga ka thlirna)

Phailam atanga Mizoram thlirna:
Mizoramin covid-19 kan vei tlang a, kan social media zawng zawng a luah a. Phai lama awm Mizote pawhin kan vei. Keini chuan news en bak chu sawi tur vak kan hrelo, Mizoram lama whatsapp lamah erawh thurawn zawm sen loh an post zut zut reng. Phaia awm Mizo te chu kan fimkhur a, theih ang tawkin kan inveng. Vai ho pawh an fimkhur ve tho. Mahse dawrah thei lei tur inchuh a awm lo. Dibugarh-ah March 18,2020 khan kan Bazar a, Hand sanitizer lei tur a tam vak lo a mahse nei chu an awm nual, an inchuh ve lo. Vitamin C, Mask leh Hand Glove phei chu duh zah zah lei tur a awm. MRP aiin a man a sanglo.

Phaia awm tam zawk in fate, in chhung te, in naute, in thian te hian Mizoram rawn haw hi kan hreh. Rawn haw chu kan chak lutuk, mahse kan hreh takzet a ni. Covid-19 Mizorama rawn hawntu nih hi kan duhlo, kan hmangaih che u a, kan kai kan hlauh ang bawkin in kai kan hlau. Mahse mi ramah chuan kan thla muang lo a ni. Chuvanga lo haw chu kan ni.

Mahse in lo fimkhur zia social media atangin kan lo hria a, YMA branch tam takin thuchhuah an siam tih te kan lo hria a, kan va lawm em. Kohhran hialin Inkhawm a thulh tawh
phei chuan kan ram hi kan fimkhur takzet anih hi kan ti a. He natna hi kan hlau a, a thawm hriat hian kan tirilah kan khur. Kan lo haw hunah hmuaktu kan nei ang tih kan hlau a, khawtlangin min enhrang ang a, kan veng/kohhran/thenawm ten min tih anga min hlau ang tih kan hlau hle. Chutiang a thlen loh nan keimahni zawk hi awm hrana midang chim lohva inkhung hran hi kan duhzawk. Kan inbuatsaih dan thawm kan hriatin India ramah a che tha ber kan ni ngei ang, kan him ngei ang, kan lo ti ve thin.

Phai lama Mizote kan fimkhur:
Corona India rama case a awm tirh laiin loh theihloh thilah phai lama zin a ngai tlat mai a, kan thian 3(kei, sir Ramtea, Sir Chhama) te Lengpui atangin Guwahati ah chuta tangin Pasighat ah kan zin a. Kan zin hma tangin kan huphurh lawk hle. Chuvang chuan a fimkhur thei ang berin kan zin a, zin hmaiin hand sanitizer tam tawk kan siamchawptir a kan keng a, a khat tawkin kut kan nuai reng!

Trainah kan chuanin ei leh in kan ti ngam lova, kan kut lawngin thil kan khawih ngam lova, tui herh haw dawn pawhin tissue paper in tap kan vawnchhan hram hram thin. Airport ah pawh kan fimkhur e, kan zirlai tam takin mask leh glove an bun kan hmu, hand sanitizer kan pai deuh vek a, trolley kut lawngin kan khawih tha ngam lova, passenger waiting rooma thutnaah pawh fimkhur takin kan thu. Airport a wash room a kan luh pawhin automatic water tap lo chu kan hmang tha ngamlo a nia. March 19,2020 zinga Guwahati Mizoram House kawtah taxi atanga kan chhukin ka hahchhiau in ka ka  ka ang palh a chumi zawha ka chil ka lem ngawt mai a, corona virus ka ngaihtuah chhuak nghal a, ka ngaih a tha thei lova, ka thian te ka hrilh nghal a, kan thian 3 kan hlauthawng lutuk a, a bula thingpui dawrah kan kal nghal a thingpui sa ver vawr kan in nghal tawp!(Tuilum in in corona hrik a tihlum thei an ti sia).

Phailama kan zirlai te, Kristian te leh kan Kohhran missionary te pawh an fimkhur hle tih kan zuk hmu a, a lawmawm hle. Chuvang chuan ram pawna Mizo awm te hian he natna kan kai loh nan kan awmna ram a mite(vai ho) aiin kan fimkhur zawk a theihtawp kan chhuah ani tih hi min lo hriatsak teh u.

Kan rawn haw e....
Hlau leh khur chungin Lengpui Airport ah kan tum a, zirna in an khar a, YMA leh Kohhranin ina awm tam turin thuchhuah an siam bawk sia a va reh dawn em, Lengpui atangin engtin nge Aizawl kan pan tak ang? tih chu kan tum hma atanga zawhna awmna ni. Sawrkarin a ngaihtuah mai ang chu, tiin kan inhnem. Lengpuia kan tum hmaa kan thlawh kual laiin vansang atangin khaw pakhat ka hmuhah chuan field ah an inkhel sup sup ka hmu thei bawk!

Lengpui airport terminal ah kan lut a, doctor leh nurse ten kan body temperature uluk takin an lo check, an va fakawm em! Ral hmatawng diktak an ni. Kan zirlai leh midang thlawhnaa chuang ve te pawh an fimkhur hle, mask leh glove an bun deuh vek. Keini chu glove kan lova kan thil khawih chhanah toilet paper roll kan pai a, kan pawt thla deuh chhen thung!

Airport atanga kan chhuak chiah chu.....pawn lamah chuan corona chu kan lo hlau leh vak der silo. Social media a kan insawithaih nasat tehreng nen awmzia a va awmlo em!
Kan Inkhawm thulh chhan, sawrkar programme thulh chhan, school chawlh chhan te hi awmzia a va awmlo ve. Khawlai lenchhuah a ngai reng, public transport fimkhurna leh inzirtirna awm hranlo a ngai reng, kan va hrethiam lo em!

Keini state pawn atanga rawn haw te chuan theih ang anga fimkhur hi kan duh a, inah kan inkhung hrang nghal e. Kan chhungte hmai chhanah kan hmu ngam lova, kan fate min hmangaihtute kan kuah thei lova, ral atangin kan fate hlim thawm mittui nen kan ngaithla mek a ni. Kan chhungten duhlo mahse keimahnin a tul tih kan hriat avangin kan fimkhur a, kan ram, kan khawtlang, kan chhungkua a him nan hmun hranah kan hriselna kan ngaichang mek a ni. Hetih lai hian he natna hi kan ramah darh ta tho se tunge a pu darhtu ber ni ta ang? State pawn atanga haw te min khunghran rual hian, min hmuaktu kan chhungte, taxi a min phurtu driver te, sumo a kan chuanpui leh driver te an khun hran ve chuan siloh chuan kan 100% in kan him angem. Mizoram kan rawn haw a kan awmdan hmuh hian ngaih a va ngamlo tak em! Kan hmangaih zoram mipuite u, hmun dang atanga rawn haw in thian, tu leh fate, chhung leh khatte kan fimkhur ang hian lo fimkhur ve mawlh teh u.

Corona virus in kan state a lo thlen loh nan leh vei kan awm loh nana theihtawpa kan tawngtai rual hian kan tawngtaina a hlawhtlin theih nana theihtawpa fimkhur hi kan tihtur a ni e.