Mizote hi Corona virus lakah kan him reng thei angem?

-Laldinpuia

(Ka thil hmuh leh hriatte atanga ka thlirna)

Corona Virus an tih hi khawvel mithiam ten a hlauhawm zia an sawi a, news leh social media ah kan hmu a kan hria a, keichuan ka hlau takzet. Tunhnaiah phai lamah ka zin a, kan state pawna awm laiin Mizoram lama kan Mizo pui ten an hlauhzia thu leh a chanchin hrang hrang chhiar senloh social media ah an post kan lo hre ve a, thin a phu dup dup mai. Ramdang nena inkalpawhna khar an sawirik phei chuan kan hlau a kan thaw a sa phat phat mai. A chhan chu khawvel a buai mek lai hian Mizo hmun danga awm te hian mahni inlum ngeia haw kan rawn duh a, kan haw thei lovang tih kan hlau a ni.

Kan ram lamah school leh college te an khar tih te kan hria a, kan rilru a hluathawng lehzual. Social media ah lah phai lam atanga lo haw te chu khun hran tur an ti awllo a, kan rilru a va hah ru thin tak em! Kan hlauthawng takzet a ni. Chuvang chuan theihtawpin kan fimkhur ve a nia. Mizoram lam atanga min lo rindan ai khan kan fimkhur tih min lo hriatsak teh u. Kei ngei pawhin airport leh train station vela ka Mizopui te, ka thalai pui, zirlaipuite fimkhur zia hi ka mit ngeiin ka hmu e. Train ah AC ah chuang mah ila kawngka kutin kan hawng ngam lova, mawng tawlhin kan hawng a, tui herhhawna kan hmanin lehkha chhanah kan herh a, airport ah mask kan vuah a, glove kan bun a, hand sanitizer in kut kan tifai deuhreng bawk a. Mizorama in hlauthawn zia social media atangin kan lo hria a, in fimkhur tur zia leh in tawmim dan tur te kan suangtuaha, nangmahni tih beidawn che u kan duh lova, rawn haw ngei kan duh ve si avangin he natna tel lova rawn haw tumin tawngtaina nen theihtawp kan chhuah ve a ni. Ina kan haw veleh min lo khunhran intum tih kan hria a, kan lawm e. Fimkhur tluk a awmlo reng a ni. Nangni pawh pawn chhuak lovin chhungtin tawmim turin in inngen niin kan lo hria a, Kohhran inkhawm leh vantlang punkhawm zawng zawng inthulh vek niin kan lo hre bawk a, "Kan khawlai vel chu a reh ve dawn mang e" kan lo ti ve thin. Mahse kan tuar hram hram a niang chu.

Chutiang ngaihtuah chung chuan vawiin(19.3.2020) ah Guwahati airport atangin Lengpuiah thlawhnain mi engemawzah kan lo haw a. Ka thil hmuh leh hriat te hi ka ngaihtuahna tibuaitu a awm nual mai...

Guwahati airport-ah corona virus chungchangah check hranpa kan tawk lova. Lengpuia kan tum hnuah erawh doctor leh nurse ten kan travel history te lain uluk takin kan body temperature an lo check a, mahni ina ni 14 inkhung hrang vek turin min hrilh bawk a. Mizoram sawrkar hmalakna a fakawm hle mai. Airport atanga kan chhuak chiah chu thlawhnaa chuang an chhungte hmuaktu an lo tam hle mai a mi 100 chuang zet an ni ang, mak ka ti hle, "Hri hlauhawm luhka ber siah hmuaktu kan va tam ve" ka ti rilru a. Mahni in a inkhung hran tur, ei leh in pawh a hrangin, thawmhnaw pawh mahni inbuaipui vek tur..... etc tih chu airport a zirtirna kan dawn a ni. Mahse airport kan chhuak chiaha chhungten an lo chang thup a, motor pakhatah an chuangho leh nghal thup tho si. Phai lam atanga haw te hi min khunghrang dawn anih chuan midangin min lo hmuak lovin sawrkarin a bikin motor lo ruahman thei se a tha va em! A fare chu keimahnin chawi mai ila. Corona virus inkaidarh dan an sawi kha a tak tak anih phei chuan tuna Lengpuia mikhual kan inhmuah dan khu chu a va him silo ve, phai atanga rawn haw te chauh ni lovin a hmuaktu, phurtu driver chenin khun hran ve awm tak.

Keini chu chhungten min lo hmuah an tum pawhin, "min khun hran an tum sia min lo hmuak lo mai ru, inhmu rihlo ang u," kan ti kha a nia. Mahse airport pawn lamah erawh boruak a dang ta hle mai, Taxi hman tur pawh kan hmu angem? kan ti rilru kha a nia, mahse tlan duh an lo tam mai a lo ni. Lengpui atangin Taxi in Aizawl kan chho a, Taxi driver titi chu mak ka ti tawlh tawlh mai. Tunlai hri vel vangin passenger phur lova chawlh an tum uk a mahse an eizawnna a nia sum an mamawh si a an chawl ngam leh lo tih te, taxi ah chuan vai leh sap te an phur nitin a Corona lo lut ve palh pawh nise Lengpui Taxi driver te chu a pu darhtu leh kai hmasa an nih a rin thu te, sawrkar atangin fimkhur  zirtirna leh anmahni hriselna endik engmah a awmloh thu te a sawi a. 

Taxi chuan kan tlan zel a, Aizawl khawpui chhung kan lut a, danglamna hmuh tur a vang hle, City Bus a tawt em em reng a, motor veivak a tam reng a, pawna vakchhuak an tam reng a...Thingtlang sumo a tawt em em vek a, passenger tawt tak takin an chuang bawk a. Nidang ang thovin dawr zawng zawng a inhawng a thil lei an insul pel zut zut bawk si a. Social media vela an sawi peih nen a takah an va fimkhur lo leh si em, tih chu ka ngaihtuahnaa awm a ni. 

Sumoin Serchhip panin ka haw nghal a, state dang atanga haw ka nih avangin miten min lo tih viau takah tiin en laiin haw duh lovin tlai sumo ah ka haw a. Kawng lakah chaw eiin kan chawl a, ka fimkhur tehreng nen kan chaw eina Hotel lah an fimkhur teh chiam lo, tunhma ang vek a ni. Chutah Serchhip bazar kan thleng a, thalai tihtur neilo an lo leng suau suau mai a, mi dawr kawrah phone khawihin an lo thi bial laih hlawm bawk a. Corona virus hi a hlauhawm zia social media a a darh nasat tehreng nen, YMA ten thuchhuah an siam a, Kohhranin a siam a, Sawrkarin a siam bawk a. Mahse hlauh hi kan lo nei tak tak lo anih dawn hi tih min ngaihtuahtir hial mai. Mizotena khawvelin a hlauh em em pawh kan hlauh loh chhan hi kan huaisen vang nge kan mawl vang ni ta ang? Mizorama positive hmuh hnuah chauh nge a ram mipuite hi kan fimkhur dawn hmuh hma atang hian? 

Tunah chuan mihring inbuatsaihnaah chuan he natna atangin kan him aiin himloh a rinawm mah zawkin ka hre ta, Pathian chauh kan innghahna awmchhun a ni tawhin ka hria. Kan him theih nan bang lovin i tawngtai ang u.

Vawiina Lengpui to Serchhip inkar motor a kan tlan laia keima hmuh leh hriat chin atang hi chuan Mizoramah hian corona virus te kai awm ve palhin midang inkaidarh palh ta se chu KEINI ZAWNG HREM ZIA RENG KAN NI, KAN THILTIH MAN CHAUH HMU KAN NI tih hi kan sawi theih awmchhun niin ka hre ta.

He natna laka kan him theih nan Pathian hnenah sual thuphachawi chungin bang lovin i tawngtai ang u.