State Bank-in a Customer te hnena TDS cut a tum chungchang vel hi

 

India rama banking sector lian ber State Bank of India ina a hnuaia Bank Account nei reng reng te hnam pui (Schedule caste) atanga hnem tanau (Schedule Tribe) te thlenga tun Financial year 2018-2019 March 2019 Quarter atanga Fixed deposit emaw saving account emaw atanga kumkhata pawisa pung atanga za zel a sawm (interest 10%), pan card nei tan leh pan card neilo tan 20% Central sawrkar sum atana laksak tura a tih hi tunlai kan thu buaipui mek a ni a. Mizoram a NGO te pawhin kan buaipui hle anih hi.

Enge ni TDS chu?

TDS kan tih chu ‘Tax Deduction at Source’ tihna mai a ni a. Mimal in sum a lakluh atanga chhiah (tax) lakna chikhat a ni. TDS hi sawrkarin chhiah awlruk thin pumpelh na tura sum lo lut atanga chhiah a lo lak nghal ang hi a ni a, sum pung emaw, commission emaw, hlawh atang emaw pawhin lak theih a ni.

Engtin nge TDS chu cut tur?

TDS hi kumkhat chhunga Bank a kan sum deposit atanga a pung (interest) tlingkhawm leh Fixed deposit atanga kan sum dah pung (interest) atanga lak tur a ni a. Hei hi Pan Card nei tan 10% cut tur a ni a, Pan Card neilo tan chuan 20% cut tur a ni. Senior Citizen-ah chuan Interest Rs 50,000 chinah cut tur a ni thung.

Hetiang hian kan hriatthiam theih nan han hrilhfiah dawn teh ang:

1)      SBI-ah Saving Account kan lo nei ta a, kan account ah englai pawha Rs nuai 2/3 kan dah reng anih chuan kum khatah Rs sing chuang fe in a lo pung hman dawn a. Chuta kan sum dah (saving account) pung chu Rs 10,000 (Sing khat) lo ni ta se, 10% (Rs 1000) chu kan account atangin a incut anga kan sum pung Rs 10,000 ah Rs 9000 chiah kan chang dawn a ni. Pan Card kan neihloh erawh chuan 20% a incut anga Rs 10000 kan account a pung kan neih laiin Rs 8000 chiah kan chang dawn anih chu. Chutiang bawkin Fixed Deposit-ah pawh a ni. TDS hi Bank account a kan sum neih tam lamah ni lovin kan sum dah pung(Interest) atanga chhut tur a ni.

2)      Senior Citizen kum 60 chin chunglam tan erawh chuan TDS lak chin tur hi sum pung(Interest) Rs 50,000 chinah a ni thung.

TDS hian tunge a nghawng ang?

TDS cut hian mipui zawng zawng a nghawng lem lo tih erawh hria ila. Sum ngah deuh leh Bank Account-a deposit tam deuh erawh a nghawng hle thung ang. Mirethei leh mi nawlpui kum khatah Bank interest Rs 10,000/- nei phalo tan chuan engmah nghawng a nei lova, buaipui ve chiam a ngai lem lo. Amaherawhchu mi hausa leh sum ngah, Bank Account a dah vak vak ho erawh hi chu a nghawng nasa viau thung ang.

TDS cut ta se khawiah nge sum a kal ang?

TDS hi cut lo ni ta se, TDS a Bank in pawisa a cut zawng zawng hi Central sawrkar sum bawmah a lut vek dawn a, sawrkar revenue a tipung hle dawn a ni.

Engvangin nge kan dodal?

Mizo te hian sawrkar tha leh hmasawn neih kan duh a, mahse kan sum bawm atanga sawrkar a sum chhunluh/Tax pek erawh kan hreh hle. Hnam hnuaihnung (Tribal) kan nih avang hian Dan pawh hian Tax chi hrang hrang hi min awl nasa hle a, hei hi kan vanneih phah a, sawrkar hnathawk pawh a hlawh tam tam bank account a pung thur thur a, sumdawng pawh a sum lalut tam tam an sum bawm a pung a, mirethei ber leh hausa ber pawhin sawrkar a kan sum chhunluh a inthlau lo hle. Heng te hi Pathian malsawmna a ni kan ti thei angem? Nge kan hnam kan retheih vanga malsawmna kan dawn kan ti dawn? Hnam vannei tak zawng kan lo ni!

Hetiang anih avang hian Section 10(26) of the Income Tax Act 1961-in a tarlan dan chuan Schedule Tribe member Tribal area-a awm Arunachal Pradesh, Manipur, Mizoram, Nagaland, Tripura ami te chu Income Tax awl tura tih a ni a, hemi dan hian Mizoram min lo hum si avangin TDS hi lak loh tur ni awm tak a ni ta a, chu chu tuna Mizoram a SBI in a TDS a lak tum kan dodal nachhan chu a ni ta a ni. Income Tax Act 1961 hi siamthat anih si loh chuan Mizoram a SBI customer tena TDS kan lo pe ve ngawt tur hi thil tullo tak a lo ni ta tihna anih chu.

Pumpelhna kawng dang

TDS hi Central sawrkar hian Mizoram leh hmar chhak state dangah te hian la lui ta se, TDS pek ngai lo pui (Interest Rs 10,000/- aia tam Bank Interest nei) TDS min lo cut palh anih chuan TDS cut anih loh nan Form 15G/15H thehlutin TDS exemption hi a dil theih bawk.

- Laldinpuia

……………….18032019………………