A man tlawm ngawt zawng lovin a quality tha leh tlo

Consumer te i harh ang u -XIX                           


    Khawvel pumah Consumer ten i (World Consumer Day) hi March 15-ah hman \hin a ni a. Kum 2019-a World Consumer Day thupui chu 'Trusted Smart Products' tih a ni. Kan khawvel a lo changkang chho ta zel a, khawl thil kan hmang nasain khawl changkang tak tak te chu kan nitin hun hmanpuitu leh a tellova kan awm hleihtheih tawhloh te a lo ni ta a, hetih lai hian kan hmanraw hman leh kan khawl thilte hi a nih tur angin hna an thawk em? A quality a \ha tawkin a rintlak tawk em? A man nen a inphu tawk em? Tih hi a hmangtu (Consumer) te hian kan hriat a \ul hle mai a. Heng Digital hmanraw hrang hrang te hi \ha leh rintlak, a siamtuten an fak mawi(advertise) ang taka \ha kan neih hi dan chuan a phut tlat a ni.

    Digital khawvela cheng kan nih tawh avangin Smart device hrang hrang nen kan inthlunzawm ta chuk pawh hi thilmak a ni hran ta lo. Tunah hian khawvela mihring aiin heng Smart product(Mobile phone, Tablet, TV, ipad, Smartwear etc) hrang hrang te hi khawvelah a tam tawh zawk a, khawvel pumpuiah Smart product chi hrang hrang 23.1 billion(tluklehdingawn) zet a awm niin mithiam te chuan an chhut a ni. Tin heng kan smart product hrang hrang te hi a tam zawk hi chu Internet nena inthlunzawm ngai te a ni hlawm a, hetianga internet kaltlanga network sensor a a inbahkualna hi Internet of things(IOT) an tih chu a ni. Mithiam te chuan kum 2020-ah chuan smart device hrang hrang internet nena inthlunzawm hi 50 billion(tluklehdingawn) vel a awm tawh tur thu an sawi a, he internet sumdawnna hian hma a sawn chak hle bawk a, kum 2025 ah chuan khawvel pum a internet sumdawnnaa sum chevel hlutna hi Dollar 6.2 trillion(tluklehdingawn tak) vel zet a nih tawh tur thu an sawi a, hei hi khawvel puma Healhcare hlutna(Dollar 2.5 trillion) leh thilsiamchhuah lam hlutna(Dollar2.3 trillion) belhkhawm ai pawhin a tam zawk a ni.


    Hetiang khawpa Smart device leh a kaihhnawih sumdawnna hi lian leh \hangchak anih lai hian, kan lo hmuh phak vet e hi a rintlak em? A nih tur ang a ni em? Tih hi kan hriat tur pawimawh tak chu a ni. Sum seng ve \euh si a, thil tlo lo deuh kan lei anih chuan \ul lovah sum kan khawhral mai mai tihna a ni dawn a. Chuvang chuan Consumer te hian kan thil lei te a quality a \ha em? A rintlak em? tih finfiah hi kan chanvo a ni.

    A tak ang taka thilsiam(counterfeit) hi khawvel chawkbuaitu pakhat a ni ve reng reng a. Forbes in 2018-a a report dan chuan hetiang thil lem siam hi khawvela dan bawhchhiatna lian ber a ni, a ti hial. Hetiang ang a copyright neitu thu lova a ruka an bungrua ang lo siamruk hralh avanga sum chevel hi kumtin Dollar 1.7 trillion (tluklehdingawn tak) vel zet a tling a, chu chu sumdawnna lian leh lar tak damdawi tawlhruk(drugs) leh mihring hmanga sumdawnna(human trafficking) ai pawhin a lian zawk a ni. Heng thillem siam kawngah hian a bul tumtu leh a hnar kaitu ber chu China a ni a, khawvela bungraw lem siam zawng zawng 80% hi China a\anga lokal a ni. He sumdawnna lem hian India ram pawh nasa takin a nghawng mek a. China ram atanga bungraw quality \ha lo leh man tlawm te te tawlhluh \euh \euh anih avang hian India rama thilsiam chhuahna lamah nasa takin nghawng a nei chho a, hemi avanga India sawrkar ina thilsiam chhuahna lama kum tina sum a hloh zat chu Vaibelchhe 39,239 zet a ni. India ramah bungraw hralhchhuah zinga 30% hi bungraw duplicate ni a chhut a ni. Industry hrang hranga a hloh nasa ber chu vaihlo leh a kaihhnawih siamchhuahna a ni a, cheng Vaibelchhe 9139 a hloh thin. Mobile Phone siamchhuahna hian an tuar leh a, cheng vaibelchhe 6705 zet an hloh \hin bawk. India rama Road accident thleng thin zinga 20% hi motor part duplicate hman vang anih thu mithiam te chuan an tarlang bawk.

    Hetiang ang bungraw lem kan rama lo lut hi enge a \hatlohna ber chu ni ta ang? A man a tlawm si a, a hmangtuin kan duh phawt chuan a \ha mai lawm ni? Kan ti mai thei. Kawng lehlamah chuan thil tih awm tak pawh a ni mai thei. Mahse hetiang ang bungraw security awmlo kan lakluh vak vak hian kan economy a nghawng a, Tax lak anih \hinloh avangin ramin a tuar a, ramchhunga sumdawng leh sawrkar thlengin an tuar thei a ni. Tin, company branded item reng reng chu a rintlak a, a tlo a, pawisa senral nen a inphu hle \hin bawk a ni. Company rintlak loh khawchhak lam a\anga man tlawm tak taka an rawn zawrh Smart Phone te, inchhung bungraw hrang hrang te kan lei a, a hnu reilo teah a chhe thuai a, siam mah ila a hma angina a \ha hlei thei tawh \hin si lova, \ul lovah kan sum kan khawhral fo \hin.

    Heng heng thil mantlawm, pawnlang a mawi leh nalh ve tak anga lang, mahse belhchian dawl silo an siam chhuah te hi a siamtute hian a nihphung (specification) mumal tak an tarlan \hin loh avang leh hmanhmawh taka quality chhe taka siam anih \hin avang hian achhiat hma mai bakah mihring hriselna atan pawh a tha lo a, hna a thawh tur ang a thawk thei \hin lo. Smart Phone man tlawm lutuk lei te hi a radiation pekchhuah a tam \hin avangin mithiam te chuan mihring hriselna atan pawh a \ha lo thei hle niin an sawi. Chuvang chuan thil mantlawm ringawt um lovin, warranty mumal tak awm thei bungrua lei \hin ila, kan bungraw lei te kan pawisa senral ang huin a \ha tawkin a rintlak em? tih te hi Cosumer ten i ngaihven \hin ang u. Kan thil lei dawnah a man tlawm ngawt zawng lovin a quality \ha leh tlo zawk lei ila kan sum tam tak luangral tur kan hum thei dawn a ni.

- Laldinpuia
Secretary, Serchhip District Consumer Association