PMSYM - Mi harsa leh sawrkar hnanghet neilo te tana Sawrkar in a siam Pension Scheme

Consumer te i harh ang u –XX

Sawrkar hian mipui te hamthatna tur leh dinchhuahna turin programme leh scheme tam tak a duang chhuak thin a, chung zinga mi rethei leh harsa zawk te tana tha tak leh chhenfakawm tak chu February 15, 2019-a an siam thar Pradhan Mantri Shram Yogi Mandhan Yojana (PMSYM) hi a ni awm e. He scheme hi engtiang chiaha tha leh tangkai nge a ni tih lo thlir ho dawn ila.

Enge PMSYM Scheme chu?

He PMSYM Scheme hi sawrkar hnathawk nghet lo leh thla khata Rs 15,000/- aia tlem lalut tena an zawm theih Pension Scheme a ni a. A zawm thei chin hi kum 18-40 inkar an ni. Sawrkar in a Pension Scheme dang a lo siam tawh National Pension Scheme(NPS), Employees’ State Insurance Corporation(ESIC) Scheme emaw Employments’ Provident Fund(EPF) ang hi policy lo nei tawh tan a zawm theih loh bawk. Income Tax pe ten he Scheme hi an zawm theilo bawk.

He Scheme hi zawmtu ten an zawm atangin an Bank account kaltlangin kum 60 an tlin thlengin he Scheme zawmna pawisa hi an thun ang a(hei hi Bank a kala thun ziah ngai lovin scheme kan zawm atangin automatic in Bank account atangin a in cut mai ang), kum 60 an tlin hunah thlatin Rs 3000/- an damchhung zawng pension an la thei dawn a ni.

PMSYM kalphung tlangpui

* He Scheme zawm tur hian kum 18-40 inkar nih a ngai a. A zawmtu kum a tlem poh leh thla tina pawisa a pek tur hi a tlem mai dawn a ni. He Scheme thatna em em chu pawisa kan dah zat chiah kha sawrkarin contribution a lo neih ve dawn vang a ni. Entirnan, kum 18 miin he scheme hi a zawm chuan thla khatah Rs 55 chauh a dah a ngai a, sawrkarin Rs 55 a lo dahsak ve zel ang a, thla khata a pension account a pawisa lut tur chu Rs 110 a ni ang. Chutiang zelin kum 20 miin a zawm chuan thla khatah Rs 61 a pek a ngai ang a, kum 40 miin a zawm chuan thla khatah Rs 200 a pek a ngai ang.

* Heng pawisa te hi an zawm atanga kum 60 an tlin thleng deposit tur a ni a, he Scheme an zawm hma leh pension an dawng hma dawn tihna a ni. Kum 60 an tlin hunah chiah thla tin Rs 3000/- an dawng tawh ang.

* He Scheme zawmtu hi a lo boral palh anih chuan a kawppui in a boral ta pension scheme kha a zawm thei ang a, a boral ta pension Rs 3000 atanga 50% Rs 1500 a kawppuiin thla tin a la thung ang. He Scheme zawmtu hi a pension hmaa a boral anih chuan a kawppuiin pawisa dah zawmin a scheme hi a chhunzawm thei ang a, chumi chu a nominee in a duhlo anih chuan a boral ta in pawisa a lo dah tawh zawng zawng kha a pung nen a la chhuak thei ang. He Scheme zawmtu in engemaw vanga he scheme hi a titawp leh duh anih chuan a pawisa dah tawh sa leh a pung a lachhuak thei ang.

* He Scheme zawm hi thil harsa lo tak mai a ni a, Aadhaar leh Bank Account neih chuan awlsam takin a zawm theih a ni.

* He Scheme zawm duh te chuan mahni awmna hnai ber a Common Service Center kaltlangin a zawm theih a ni.

* He Scheme zawmtu hi sawrkar hnathawk nghetlo emaw a nih a, a scheme zawm hnua sawrkar hna tha zawk a lo hmu palh anih chuan sawrkar atanga hamthatna a dawn leh he scheme hi a kal kawp theihloh avangin, sawrkar hna tha zawk a hmuh hnuah he scheme hi a titawp ang a, a pawisa dah tawhsa leh a pung kha a la thei tho dawn a ni.

* He Scheme chungchanga thu zawhfiah duh nei emaw, hriat duh nei te chuan phone no 1800 267 6888 (Toll Free) ah englai pawhin a biak pawh theih.

He scheme hi India ram mipui ten an zawm nasa hle tawh a, ni 15 february 2019 a India ram pumah puanzar a ni a, thla khat lek hnu ni 20.3.2019 thleng khan he Scheme zawmtu zat hi mi 24,85,727 zet an tling tawh a ni. Sawrkar laipui hian mirethei te dinchhuahna tur leh sum leh pai an denchhuah a, invenna (Security) an neih theihna tur Scheme hrang hrang a duangchhuak mek zel a, chung zingah chuan tuna awm tawhah chuan he Scheme hi a tha ber pawl a ni awm e. Mizoramah pawh hian mi harsa leh rethei, sawrkar hnathawk nghet lemlo, nitin thawhchhuah hmanga intungnung ve mai mai kan tam hle mai a, heng te tan hlei hlei hian he scheme hi a tangkai a, chuvang chuan a hria apiang ten kan chhehvela mi harsa leh sawrkar hnathawk nghet lemlo te nakina an kum upat huna chhawmdawlna/pension an lak ve theihna tur anih avangin kan hrilh hriat a a kalhmang leh nihphung kan puanzar tam hi a tul hle a ni.

-Laldinpuia

Secretary

Serchhip District Consumer Association

 

 

.....

Update : A hnuaia mi hi a scheme zawmtute kum leh an pawisa dah zat tur chu a ni -